Avstraliyada bosh ofisi joylashgan “Iqtisodiyot va tinchlik instituti” mutaxassislari tomonidan Global Terrorism Index hisobotini beshinchi marta e’lon qildi.

Hisobotda dunyo bo‘ylab 2000-2016 yillarda sodir bo‘lgan terror voqealari tahlil qilingan.

Ushbu hisobotda O‘zbekistonga terrorizm ta’siri kam bo‘lgan mamlakatlar qatoridan joy berilgan. O‘zbekiston reytingda dunyoning 163 mamlakati orasida 125-o‘rinni egallagan. Terrorizmning iqtisodiyot va tinchlikka ta’siri kam ekanini O‘zbekistondagi terrorchilik xavfi darajasi maksimal 10 balldan 0,077 ballni tashkil qilganida ko‘rish mumkin.

2016 yilda O‘zbekiston indeksda 117-o‘rinda qayd etilgan va 2017 yilda o‘z o‘rnini yanada mustahkamlagan.

Reytingda birinchi o‘rnida terrorchilikdan eng ko‘p jabr ko‘rgan mamlakat joylashgan bo‘lsa, 130-pog‘onada esa hujumlarga duch kelmagan davlat joylashgan.

Terror xavfi yuqori bo‘lgan davlatlar qatorida Turkiya (9-o‘rin), Ukraina (17-o‘rin), Saudiya Arabistoni (26-o‘rin), AQSH (32-o‘rin), Qozog‘iston (67-o‘rin), Tojikiston (72-o‘rin), Qirg‘iziston (79-o‘rin) qayd etilgan.

Yuqorida keltirilgan ma’lumotlar asosida aytish mumkinki, xalqaro ekspertlik guruhlari O‘zbekistonni xavfsiz mamlakat sifatida qayd etib, bu yerga tashrif buyurish sayyohlar va investorlar uchun xavfsiz ekanini bildirmoqdalar.