Bolalar tarbiyasiga doir foydali maslahatlar

No‘mon ibn Bashir roziyallohu anhudan rivoyat qilinadi: Rasululloh (sollallohu alayhi va sallam) dedilar: «Farzandlaringiz o‘rtasida adolat qilinglar». Imom Muslim rivoyat qildilar. Bashir roziyallohu anhuning ayollari: «Mening bolamga xizmatkor sovg‘a qiling va bu narsaga Rasululloh (sollallohu alayhi va sallam)ni guvoh qiling», – dedi. Bashir roziyallohu anhu Rasululloh (sollallohu alayhi va sallam)ning oldilariga keldilar-da: – Falonchining qizi (ayollarini aytayaptilar – tarj.) o‘zining o‘g‘liga xizmatkor tuhfa etishimni so‘rayapti… – dedilar. Rasululloh (sollallohu alayhi va sallam): – Uning aka-ukalari bormi?, – deb so‘radilar. Bashir dedilar: – Ha. – Ularning hammalariga ham bunga qilganingdek tuhfa qilganmisan? – deb so‘radilar Rasululloh. – Yo‘q. Rasululloh (sollallohu alayhi va sallam): – Bunday qilish yaramaydi, men faqatgina haq narsaga guvohlik qilaman, – dedilar. Imom Ahmad rivoyatlarida Rasululloh (sollallohu alayhi va sallam): «Meni javrga guvoh qilma, albatta, bolalaringning sendagi haqqi ular orasida adolat qilishingdir», – dedilar.

Shuningdek, muqaddas dinimizda qiz farzandlarga alohida e’tibor berishligi haqida Payg‘ambarimiz (sollallohu alayhi va sallam) shunday marhamat qilganlar: «Kimning bir qiz farzandi bo‘lib, unga yaxshi ta’lim, go‘zal tarbiya hamda Alloh taolo unga ato etgan ne’matlaridan qiziga ham sarflasa, Qiyomat kuni shu qizi uning uchun do‘zaxdan to‘suvchi parda bo‘ladi»  (Tabaroniy rivoyati).

Bayhaqiy rivoyat qildilar: Anas roziyallohu anhu dedilar: Bir kishi Rasululloh (sollallohu alayhi va sallam) bilan birga o‘tirgan edi, uning o‘g‘ilchasi kelib qoldi va u o‘g‘lini o‘pdi-da, bag‘riga olib o‘tqazdi. Keyin uning qizchasi keldi, u qizchasini oldi-da, yoniga o‘tqazdi. Rasululloh (sollallohu alayhi va sallam): «Sen ular o‘rtasida adolat qilmading», – dedilar. Salaflar bolalarini o‘pishda ham ular o‘rtasida adolat qilishni yaxshi ko‘rishardi.

Muslim Atayev,

tarix fanlari nomzodi,

O‘zbekiston musulmonlari idorasi

Fatvo bo‘limi xodimi