Avvalroq, 29 oktyabr kuni O‘zbekiston delegatsiyasi Moskva shahrida o‘tkazilgan “Islom aqidasi va akademik islomshunoslik: hamkorlik va rivojlanish istiqbollari” nomli ilmiy-ma’rifiy anjumanda ishtirok etish uchun jo‘nab ketgani haqda xabar bergan edik.

Galimjon Barudi nomidagi X Xalqaro ilmiy o‘quvlarda O‘zbekiston musulmonlari idorasi raisi o‘rinbosari Ibrohim Inomov hamda Toshkent islom instituti rektori Uyg‘un G‘ofurov, Toshkent islom universiteti islomshunoslik ilmiy-tadqiqot markazi direktori v.b. Jasur Najmiddinovlar ishtirok etdi.

Ushbu Xalqaro anjumanda O‘zbekiston vakillari o‘zlarining ma’ruzalari bilan ishtirok etib, O‘zbekistondagi holat, olib borilayotgan islohotlar to‘g‘risida anjuman ishtirokchilariga ma’lumot berdilar.

O‘zbekiston musulmonlari idorasining mustaqillik yillaridagi faoliyati,uning tasarrufidagi ta’lim muassasalaridagi ta’lim tizimi to‘g‘risida fikr yuritdilar.

O‘zbekiston musulmonlari idorasi raisi o‘rinbosari Ibrohim Inomov o‘z nutqida O‘zbekistonning ko‘pmillatli ekani va ularning o‘zaro totuvlikda istiqomat qilayotganini aytib, diniy va millatlararo bag‘rikenglik yuqori darajaja shakllanganini qayd etdi.

O‘zbekiston zaminidan buyuk allomalar yetishib chiqqani, ular islom dinining taraqqiy etishiga ulkan hissa qo‘shganlarini islom olami tan olgan. Imom Buxoriy, Imom Termiziy, Abu Xafs Nasafiy, Abu Ali ibn Sino, Ahmad Farg‘oniy, Abu Rayxon Beruniy, Burxoniddin Marg‘inoniy, Abu Mansur Motrudiy, Abu Mo‘yin Nasafiylar jahon madaniyati rivoji yo‘lida faoliyat olib borganlar.

Mustaqillik yillarida O‘zbekistonda fiqh, hadis, tafsir va aqida maktablarining ochilishi, haj va umraga boruvchilar uchun kvotalarning oshirilishi, masjidlar va diniy ta’lim beruvchi dargohlar sonining ko‘payishi mamlakatimizda yangi davr boshlanganini tasdiqlaydi.

Bundan tashqari, ushbu anjumandan vakillarimiz chiqishlaridan fotolavhalarni havola etgan edi.