Saxovatpesha iordaniyaliklar
Iordaniyadagi “Sabil Hayr” jamg'armasi 22 yildan buyon muhtojlar, kambag'allar va yo'lovchi musofirlarga taom tarqatish bilan shug'ullanadi.
“Reuters” xabariga ko'ra, jamg'arma kuniga 3500 dan 4000 gacha taom tayyorlab, ro'zadorlar sayohatchilar va yo'lovchilarga etkazib beradi. Bu xayriya ishlari Ma'an ahlining xayr-ehsonlari hisobidan amalga oshiriladi.
“Sabil Ma'an” shirkati mas'uli Mahmud Abu Solihning aytishicha, ro'zador ziyoratchi va yo'lovchilarga iftorlik xayriya qilish odati yuzlab yillar davomida ota-bobolardan meros bo'lib kelmoqda.
Abu Solih ta'kidlashicha, ba'zan Allohdan ajru savob umidida bevalar, etimlar, hatto bolalar ham ehson ishlariga o'z hissalarini qo'shganlar.
Falastinlik umra ziyoratchisi Naja Muhammad Abu Hadra jamg'arma haqida bunday deydi: “Biz Saudiya chegarasida iftorlik qilishni niyat qilgandek. Ammo og'iz ochish mahali Ma'an shahriga to'g'ri keldi. Ma'an ahlidan Alloh rozi bo'lsin, bizni iliq qarshi olib, iftorliklar berishdi. Bundan juda mamnun bo'ldik. Ular g'oyatda saxovatli kishilar. Barcha mehmonlar qatori men ham Iordaniya xalqiga minnatdorchilik bildiraman.
O'MI xodimi I.Ahmedov tayyorladi
YUNЕSKO bilan O‘zbekiston mahalla tizimi tajribasini xalqaro darajada targ‘ib qilish masalasi muhokama qilindi
O‘zbekiston va YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibiyati vakillari o‘rtasida onlayn uchrashuv bo‘lib o‘tdi, deb xabar bermoqda “Dunyo” AA.
Mamlakatimizning YUNЕSKO huzuridagi Doimiy vakolatxonasi ko‘magida tashkil etilgan muloqotda mahalla bilan bog‘liq madaniy an’ana va urf-odatlar, ularni xalqaro darajada targ‘ib qilish istiqbollari muhokama qilindi.
YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibi Fumiko Oxinata va Osiyo-Tinch okeani mintaqasi uchun mas’ul dastur mutaxassisi Nikolas Tan mavzu yuzasidan o‘z fikr-mulohazalarini bayon etdi.
O‘zbekiston tomonidan Tashqi ishlar vazirligi, O‘zbekiston mahallalari uyushmasi hamda YUNЕSKO huzuridagi Doimiy vakolatxonasi vakillari mahallaning ko‘p asrlik tarixi, uning jamiyat hayotidagi alohida o‘rni va milliy an’analarni saqlashdagi ahamiyati haqida so‘z yuritdi.
Uchrashuvda mahalla O‘zbekiston xalqi turmush tarzining ajralmas qismi ekani ta’kidlandi. U insonlarni yaxshi qo‘shnichilik, o‘zaro yordam, hamjihatlik va katta avlod vakillariga hurmat tamoyillari asosida birlashtiradi.
YUNЕSKO Kotibiyati vakillari taqdim etilgan materiallarga katta qiziqish bildirdi. Ular O‘zbekistonda mahalla bilan bog‘liq shakllangan jamoat hayoti tartibining o‘ziga xos xususiyatlarini e’tirof etdi.
Suhbat davomida O‘zbekistonning nomoddiy madaniy merosni targ‘ib qilishdagi roli alohida qayd etildi. Shu nuqtayi nazardan, o‘zbek mahalla tizimi tajribasi YUNЕSKO Kotibiyati mutaxassislarida katta qiziqish uyg‘otdi.
O‘zbekiston musulmonlari idorasi Matbuot xizmati
