Avval xabar qilingan, 2017 yil 18 oktyabr kuni Ozarbayjon davlati bilan hamkorlikda tashkil etilayotgan “Islom hamjihatligi: O‘zbekiston va Ozarbayjon misolida” nomli xalqaro anjumanga tayyorgarlik ko‘rish doirasida shu hafta avvalida O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Ortiqbek Yusupov Buxoro shahriga tashrif buyurishdi. Ushbu xalqaro anjuman munosabati bilan O‘zbekiston Respublikasi, jumladan, Buxoro shahridagi Mir Arab madrasasiga yuqori martabali mehmonlar va Kavkaz musulmonlari idorasi rahbariyati tashrifi kutilayotgani munosabati bilan joylardagi tayyorgarlik ishlari ko‘zdan kechirildi.
Muftiy hazratlari madrasa o‘quv binosi va ta’lim jarayoni bilan yaqindan tanishdilar. Mir Arab madrasasida olib borilayotgan tayyorgarlik ishlari, ta’mir jarayoni va o‘quv xonalarini jihozlash bo‘yicha bajarilgan ishlar ko‘zdan kechirildi. O‘z navbatida sinf xonalarning jihozlanishi bo‘yicha tavsiyalar berildi. Shuningdek, bilim yurtining faxriy bitiruvchilari tahsil olgan sinf xonalar, xususan, Checheniston Respublikasining birinchi Prezidenti Ahmad Qodirov va Shayxul islom Ollohshukur Poshshozodaning ushbu madrasada tahsil olgan xonalari holati bilan yaqindan tanishildi.
Mehmonlar Bahouddin Naqshband ziyoratgohida ham bo‘lib, u yerda yangi tashkil etilgan Mir Arab oliy madrasasidagi talablarning o‘quv jarayoni va yotoqxonadagi sharoitlar bilan yaqindan tanishishdi. Muftiy hazratlari bilim yurtidagi shart-sharoitlarni yanada yaxshilash borasidagi taklif va mulohazalarini bildirarkan, axborot resurs markazi va kompyuter texnologiyalaridan samarali foydalanish, kutubxona fondini yanada boyitish, talabalar chet tillarini, xususan, ingliz va arab tillarini chuqur o‘zlashtirish zarurligiga alohida urg‘u qaratdilar.
Mehmonlarga Buxoro viloyati hokimi O‘. Barnoyev xamrohlik qildi.
O‘zbekiston musulmonlari idorasi
Matbuot xizmati
Bugun, 15 iyul kuni imom-xatiblar faoliyatini yanada samarali tashkil qilish bo‘yicha Sirdaryo viloyati Xovos tumanida navbatdagi amaliy tadbir o‘tkazildi. Namunaviy-amaliy tadbir yig‘ilishi mazkur tumandagi "Xovos" jome masjidida bo‘lib o‘tdi.
Mazkur tadbirda Sirdaryo viloyati bosh imom-xatibi Habibulloh domla Zokirov yig‘ilishga boshchilik qildi. Shuningdek, vakillik xodimlari, tuman, shahar bosh imom-xatiblari hamda otinoyilar, mahallalardagi “Haj – 2025” ziyoratchilari ma’naviy-ma’rifiy tadbirlarga jalb etildi.
Ishchi guruh a’zolari tomonidan hududdagi 20 ta mahalladagi 120 ta xonadon holidan xabar olindi. Jumladan, nogironligi bor xonadonlar, notinch oilalar va ijtimoiy himoyaga muhtoj oilalar qamrab olindi.
Sirdaryo viloyati vakilligi
Matbuot xizmati