Islom institutida imtihon
Bugun soat 6:50 da Toshkent islom institutida Maxsus sirtqi bo‘limga o‘qishga kirish uchun hujjat topshirgan abiturentlarga imtihon boshlandi. Imtihonga O‘zbekiston musulmonlari idorasi raisi o‘rinbosari Ibrohim Inomov va O‘MI ta’lim va kadrlar tayyorlash bo‘limi mudiri Jaloliddin Nuriddinov boshchiligidagi kuzatuvchi mehmonlar tashrif buyurdi.
Maxsus sirtqi bo‘lim bevosita Prezidentimizning tashabbusi bilan tashkil etildi.
Maxsus sirtqi bo‘limga O‘zbekiston musulmonlari idorasi raisi, muftiy Usmonxon Alimovning “Respublikamizda faoliyat yuritayotgan ikki mingdan ortiq jome masjidlarni oliy diniy ma’lumotga ega imom-xatiblar bilan ta’minlash uchun Imom Buxoriy nomidagi Toshkent islom institutida uch yillik Maxsus sirtqi bo‘lim tashkil etish maqsadida”gi (29-sentyabrdagi 01A/092-sonli) buyrug‘i ijrosi yuzasidan o‘n kun muddat ichida (1-10 oktyabr kunlari) abuturiyentlar qabul qilindi.
Maxsus sirtqi bo‘limga respublikamizda faoliyat yuritayotgan, kamida besh yillik stajga ega bo‘lgan imom-xatib, madrasa mudarrisi va Imom Buxoriy xalqaro markazi xodimlaridan iborat jami 181 nafar abiturent hujjat topshirgan. Shulardan 60 nafari 3 fan (aqoid, fiqh va arab tili) bo‘yicha imtihonlar asosida qabul qilinadi. Har bir fanga abiturentning javob berishiga qarab 75,6 balldan qo‘yilmoqda. Bilet olgan har bir abituriyent javob berishdan oldin 20 daqiqa davomida lug‘atlardan foydalangan holda o‘tirib tayyorlanishi mumkin. Imtihon olish uchun Toshkent islom universiteti, Toshkent islom instituti va “Ko‘kaldosh” o‘rta maxsus bilim yurtidan malakali mudarrislar jalb etilgan. Imtihon natijalari bo‘yicha mandat 14 oktyabr kuni e’lon qilinadi. Maxsus sirtqi bo‘limga o‘qishga kirgan talabalarga darslar noyabr oyida boshlanadi.
O‘zbekiston musulmonlari idorasi
Matbuot xizmati
Bir marta "Subhanalloh" deyish uchun fursat berilsa...
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
O‘lim bir eshik. Barcha insonlar undan o‘tadi. Eh koshki, bu eshikka kirgandan keyin mening uyim qanaqaligi ma’lum bo‘lsa?!
Birodar! Qarang, qabrdagilar bir-birlariga juda yaqin yotishibdi. Lekin ular sirtdan yaqin qo‘shni. Aslida esa, bir-birlarining yoniga ham bora olmaydilar.
Usmon roziyallohu anhu qachon qabr yonidan o‘tsalar, shu darajada yig‘lar edilarki, soqollari ko‘z yoshlaridan ho‘l bo‘lib ketardi.
U kishidan: "Siz nega jannat va do‘zaxni esga olganingizda yig‘lamaysiz. Lekin qabrni ko‘rib yig‘laysiz?" deb so‘rashdi. U kishi shunday dedilar: «Rasululloh sollallohu alayhi vasallam: "Qabr oxiratning ilk manzilidir", deganlar. Shunga ko‘ra, agar mayyit qabrdagi azobdan najot topsa, undan keyingi hayot oson bo‘ladi. Agar qabrdagi azobdan najot topa olmasa, u holda undan keyingi hayot qiyin bo‘ladi.
Yana Rasululloh sollallohu alayhi vasallam: "Men qabrdan ko‘ra daxshatliroq biror manzarani ko‘rmadim", deganlar.
Biz uchun bu qabrlarda ibrat yo‘qmi? Qarang, boy ham, faqir ham, zo‘ravon ham, kuchsiz ham, oq tanli ham, qora tanli ham, podshoh ham, fuqaro ham barcha barobar yotibdi. Ular dunyoga qaytishni xohlaydilar. Boylik jamlash yoki qasr qurish uchun emas, balki, koshki men bir namoz o‘qish uchun muhlat topsam, koshki bizga bir martagina "Subhanalloh" deyish uchun fursat berilsa, deb, shu amallarni qilish uchun dunyoga qaytishni xohlaydilar. Lekin endi iloji yo‘q. Nomai a’mol yopilib bo‘ldi. Ruh jismdan chiqqan. Hayot muhlati tugab bo‘lgan. Endi har bir mayyit o‘z amalining garovi o‘laroq qabrida yotibdi...
«Nasihatlar guldastasi» kitobidan