Ba’zida biror qiyinchilikka uchrasak, nima qilishni bilmay qolamiz yoki folbinga yuguramiz. Buning yechimi boshqa ekanini unutib qo‘yamiz.

Alloh taolo o‘z kalomi bo‘lmish Qur’oni karimda bunday deydi: «Yo‘q! (Ey, Muhammad) … Siz (yolg‘iz) Allohga sajda (ibodat) qilib, (Unga) yaqin bo‘ling!» (Alaq, 19)

Bu oyatning mazmunini qarangki, Allohga sajda qilgan har bir inson Unga yaqinlashib borar ekan. Shuning uchun ham ulamolar “Sajdada uzoq vaqt bo‘l», deb ta’kidlashadi.

Alloh yana aytadiki: «Kechaning bir qismida ham Unga sajda qiling va uzun tunda unga tasbeh ayting!» (Inson, 26)

Oyati karimadan kechaning bir qismi ibodat va sajda uchun qulay vaqt ekani ayon bo‘ladi.

Ana shu amal barcha muammolar yechimidir. Ba’zida biror muammoni hal qilish uchun o‘ylab bahs qilib ketaveramiz. Buning yechimi esa sajda ekanini unutib qo‘yamiz.

Bir o‘ylab ko‘ring, biror bir muammoning yechimini topa olmadingizmi? Mahzunmisiz yo betob bo‘lib qoldingizmi?..

 Har bir mushkulotning yechimi – Allohga sajda qilib, najot so‘ramoqdir.

Bilib-bilmasdan qilgan gunohlarimiz mavjud ekani haqida o‘yga tolamizmi? U holda darrov sajda qilaylik. Chunki Parvardigorning o‘zi: «Kechaning bir qismida ham Unga sajda qiling va uzun tunda unga tasbeh ayting!» (Inson, 26), deya amr etyapti.

Beixtiyor aytamizki, ixlos ila qilingan sajda bilan biz jannatda yuqori darajalarga erishimiz mumkin. Shuning uchun bu oddiy yechimdan qochmasdan, sajdada qoim bo‘laylik.

Alloh taolo Qur’oni karimda mushriklardan ozor chekayotgan Rasuliga bunday deydi:

«Shaksiz, Biz ularning (Sizni masxara qilib) aytayotgan so‘zlaridan dilingiz siqilishini bilurmiz. Bas, Siz Rabbingizga hamd bilan Unga tasbeh ayting va sajda qiluvchilardan bo‘ling! (Shuningdek), to Sizga aniq narsa (o‘lim) kelguncha Rabbingizga ibodat qilavering!» (Hijr, 97-99).

Alloh o‘z Rasuliga shunday yo‘lni tavsiya etayotgan ekan, biz ham o‘z hayotimizda sajda orqali najot topishimizni unutib qo‘ymaylik! 

 Baxtiyor ABDULLAYEV,   

O‘zbekiston musulmonlari idorasi xodimi