Qanday qalbdan Qur’oni karim ko‘tarilmaydi?
Yahyo qori Turdiyev (“Hasanboyota” jome masjidi imom noibi):
1978 yil To‘ytepadagi masjidda imomlik qilayotganimda Marokashning muftiysi bilan hamsuhbat bo‘ldim. Qur’oni karimdan tilovat qilganimda muftiy ko‘zida yosh ila quyidagi so‘zlarni aytdi: “Inson oltin, gavhar kabi qimmatbaho toshlarni hech qachon oddiy yog‘och sandiqda saqlamaydi. Alloh taolo ham Qur’oni karimni saqlaydigan qalbni O‘zi yaratadi va O‘zi himoya qiladi.
Alloh taolo qorining qalbiga O‘zining kalomi Qur’oni karimni omonat qilib topshirar ekan, avvalo, qalbni yaratadi, so‘ngra u qalbga Qur’oni karimni joylaydi. Ana shunday qalbdan Qur’oni karim ko‘tarilmaydi. Bunday qalb Qur’oni karimga xiyonat qilmaydi. Doimo uni takror qiladi va uning odoblariga rioya etadi”.
Shundan so‘ng, muftiy Rasululloh (sollallohu alayhi va sallam)ning ushbu hadislarini aytib so‘zini yakunladi:
“Allohumma ya musarrifal qulub, sarrif qulubana ’ala to’atika”,
(Yo qalblarni o‘zgartiruvchi Alloh, qalblarimizni toatinga burib qo‘ygin)
“Allohumma, ya muqollibal qulub, sabbit qulubuna ’ala diynika”
(Yo qalblarni o‘zgartiruvchi Alloh, qalblarimizni diningda sobit qilgin)
Davron NURMUHAMMAD
yozib oldi
“Network News Pakistan”: 2025 yilda O‘zbekiston Markaziy Osiyo aholisi uchun eng ommabop sayohat yo‘nalishi bo‘ldi
Pokistonning “Network News Pakistan” elektron nashri “O‘zbekiston turizmi o‘sish bo‘yicha Markaziy Osiyoda birinchi o‘rinni egalladi” sarlavhali axborot maqolani e’lon qildi, deb xabar qilmoqda “Dunyo” AA.
Unda Butunjahon sayohat va turizm kengashining (World Travel & Tourism Council – WTTC) “Sayohat va turizmning 2026 yilga qadar iqtisodiy ta’sirini o‘rganish” hisobotiga ko‘ra, 2025 yilda Markaziy Osiyo dunyoning eng tez rivojlanayotgan sayyohlik mintaqasiga aylangani ta’kidlangan.
“WTTC o‘z tadqiqotlarini dunyoni 13 ta yirik mintaqaga bo‘lgan holda olib boradi. 2025 yil yakunlariga ko‘ra, Markaziy Osiyo turizm sohasini rivojlantirishning bir nechta asosiy ko‘rsatkichlari bo‘yicha dunyoda birinchi o‘rinni egalladi. Shu bilan birga, O‘zbekiston bu ko‘rsatkichlarning barchasi bo‘yicha Markaziy Osiyo mamlakatlari orasida yetakchiga aylandi”, – deyilgan manbada.
Nashrda qayd etilishicha, 2025 yilda turizmning Markaziy Osiyo yalpi ichki mahsulotiga qo‘shgan umumiy hissasi 17,7 foizga, sohaning bevosita hissasi esa 19,6 foizga oshgan. Mintaqada turistik xizmatlar eksporti (visitor exports) yil davomida 26,4 foizga o‘sib, 9,9 milliard AQSH dollarini tashkil etdi.
Mintaqadagi turistik xizmatlar eksporti umumiy hajmining deyarli yarmi O‘zbekiston hissasiga to‘g‘ri keladi. Jumladan, 2025 yilda O‘zbekistonga 4,8 milliard AQSH dollari miqdorida turistik xizmatlarni eksport qilgan. WTTC ma’lumotlariga ko‘ra, 2025 yilda O‘zbekiston Markaziy Osiyo aholisi uchun eng ommabop sayohat yo‘nalishi bo‘ldi.
“Umuman olganda, bu ko‘rsatkichlar turizmning mintaqaviy xarakterga ega ekanini anglatadi. Markaziy Osiyo aholisi ko‘pincha o‘z mintaqasi ichida sayohat qiladi”, – deyiladi maqolada.
“Network News Pakistan” WTTC prognoziga tayanib yozishicha, 2036 yilga borib turizm sohasining Markaziy Osiyo iqtisodiyotiga qo‘shadigan umumiy hissasi 29,7 milliard AQSH dollariga yetadi.
O‘zbekiston musulmonlari idorasi Matbuot xizmati
