Rossiya musulmonlari jamiyati taklifiga ko‘ra, joriy yil Ramazon oyida Chuvashiya Respublikasi, Omsk viloyati, Sibir va Moskva shaharlarida taroveh namozlarini o‘qib berayotgan qorilarimiz Qur’on xatmlarini yakunladilar. Xatmi Qur’on yakunida Chuvashiya Respublikasida vaqtincha mehnat qilayotgan o‘zbekistonliklar ishtirokida katta iftorlik tadbiri bo‘lib o‘tdi. Unda milliy taomimiz – osh damlanib, yig‘ilganlarga tortiq qilindi.
Iftorlik dasturxoni atrofida qorilarimiz tomonidan Qur’on tilovati qilinib, Qadr kechasining fazilati, Ramazon hayiti, hayit odoblari haqida ma’ruzalar qildilar.
Qorilarimiz safarlarini yakunlab, 25 iyun kuni yurtimizga qaytib kelishlari rejalashtirilgan.
O‘zbekiston musulmonlari idorasi
Xalqaro aloqalar bo‘limi
Bugun, 4 aprel kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari juma namozini Samarqand shahridagi "Namozgoh" jome masjidida ado etdilar.
Jamoat namozidan oldin Muftiy hazratlari jomega yig‘ilganlarga qadim Samarqand shahrida bo‘layotgan "Markaziy Osiyo – Yevropa Ittifoqi" birinchi sammiti xalqaro iqlim forumining ahamiyati haqida so‘zlash barobarida “O‘zgalarga ozor bermaslik – dinimiz talabi” mavzusida suhbat qilib berdilar.
Muftiy hazrat ma’ruza davomida ahillik, birodarlik, o‘zaro hamjihatlik bo‘lgan yurtda taraqqiyot, ravnaq va el-yurt osoyishtaligi-yu farovonligi hukm surishi, aksincha qay bir jamiyatda murosasizlik, o‘zaro xusumat kuchaysa, bunday jamiyatlarda urush va mojarolar avj olib, yurt vayron, el parokanda bo‘lishini bayon etdilar. Shuningdek, o‘zga din vakillariga ham ozor bermaslik, ular bilan jamiyatda tinch-osuda, ahil-inoq bo‘lib yashash zarurligi haqida so‘z yuritdilar.
Mav’iza asnosida o‘zgalarga ozor berish dinimizda katta gunohlardan biri sanalishi, Qur’oni karimdagi: “Mo‘min va mo‘minalarga qilmagan gunohlari bilan ozor beradigan kimsalar bo‘hton va aniq gunohni o‘zlariga olgan bo‘lurlar” (Ahzob surasi, 58-oyat), degan mazmundagi oyati karimani sharhlab, unda o‘zgalarga ozor yetkazish nojoizligi, bu ozor yetkazishning har qanday ko‘rinishini o‘z ichiga olishi, o‘zgalarga ozor bermaslik sadaqaning bir turi ekanini hayotiy misollar bilan so‘zlab berdilar.
Mazmunli suhbat yakunida Muftiy hazratlari Haq taolo barchaga ikki dunyo saodatini nasib qilishini so‘rab, elu yurtimiz haqqiga xayrli duolar qildilar.
O‘zbekiston musulmonlari idorasi Matbuot xizmati