Alloh taolo Jannat ne’matlarini qo‘lga kiritish yo‘lida musobaqalashishga buyurib, bunday marhamat etadi: «Bas, musobaqachilar shu (ne’matlar) yo‘lida musobaqa qilsinlar!» (Mutaffifun, 26).
Boshqa bir oyatda: «Rabbingizdan (bo‘luvchi) mag‘firatga va kengligi osmonlaru Yerga teng, taqvodorlar uchun tayyorlab qo‘yilgan jannat sari (solih amallar qilish bilan) shoshilingiz!» (Oli Imron, 133).
Musobaqada kuchli raqiblar ko‘p ekan! Negaki, shoshilish kerakligi alohida farmoyish bilan ta’kidlanmoqda! Musobaqa shartlari nimadan iborat ekan? Bu mukofotlar qaysi amallarni qilganlar uchun ekan? Ular haqida qayerdan bilsak bo‘larkan? Ularni qanday xislatlari bor ekan-a?!
«Ular (mazkur taqvodorlar) farovonlik va tanglik kunlarida ham xayr-cadaqa qiladigan, g‘azablarini yutadigan, odamlarni (xato va kamchiliklarini) afv etadiganlardir. Alloh ezgulik qiluvchilarni sevar. Ular biror fahsh ish qilib qo‘ysalar yoki o‘zlariga zulm qilib qo‘ysalar, (darhol) Allohni eslab, istig‘for aytadilar. Vaholanki, gunohlarni faqat Allohgina mag‘firat etar. Yana, ular bila turib, qilmishlarida davom etmaydigan kishilardir. Aynan ularning mukofotlari – Parvardigorlaridan mag‘firat va ostidan anhorlar oqib turuvchi jannat bog‘lari bo‘lib, o‘sha joyda abadiy bo‘lurlar. (Solih) amal qiluvchilarning mukofoti naqadar yaxshi!» (Oli Imron, 134-136).
«(Ey, insonlar!) Rabbingiz tomonidan bo‘ladigan mag‘firatga hamda Alloh va Uning payg‘ambarlariga imon keltirgan zotlar uchun tayyorlab qo‘yilgan, kengligi osmon va Yerning kengligi kabi bo‘lgan jannatga musobaqalashingiz! Bu Allohning fazli bo‘lib, uni O‘zi xohlagan kishilarga ato etur. Alloh ulug‘ fazl sohibidir» (Hadid, 21).
Musobaqada ishtirok etganmisiz? Ishtirokchilarni kuzatganmisiz? Ha, baraka toping! Ishtirokchilar hamisha marra chizig‘i tomon shoshadilar, to‘g‘rimi? Kim birinchi bu chiziqdan o‘tganini esa hakamlar belgilab, hammaga o‘ziga munosib baho qo‘yadilar. Birorta qatnashuvchi yugurib, yelmay, jonini koyitmay, musobaqa boshlang‘ich chizig‘ida turganicha g‘olib bo‘lgan deyilsa, ishonasizmi?
Musobaqa bo‘lgach, uning boshlang‘ich va nihoya chizig‘i hamda hakami bo‘ladi! Boshlang‘ich nuqtasi qo‘lingizdagi mol-davlat o‘z ehtiyojingizdan ortib, nisobga yetgan kunidir! Bu musobaqaning nihoya-marra chizig‘i boshqa musobaqalardan farqliroq: buning marra chizig‘i oxak bilan chiziladigan oddiy oq chiziq emas.
Musobaqa sakkizta sovrinli o‘rin uchun sakkiz “nominatsiya”da bo‘ladi!
«Albatta, sadaqalarni faqat faqirlar, miskinlar, unda (sadaqa ishida) ishlovchilar, dillari oshna qilinuvchi (kofir)lar, (pul to‘lab ozod etiluvchi) qullar, qarzdorlarga va Alloh yo‘lida hamda yo‘lovchiga (musofirga berish) Alloh (tomoni)dan farz (etildi). Alloh ilmli va hikmatli zotdir» (Tavba, 60).
Hakam Alloh taoloning O‘zidir! Bu Hakamning hukmi ayni adolat bo‘ladi. Qandaydir yo‘llar bilan Uning hukmini aslo o‘zgartirib bo‘lmaydi! Musobaqa shartiga muvofiq bu jonli marra chizig‘i va odil Hakam tomonga musobaqa ishtirokchisi sifatida siz borishingiz kerak!
Oyatda sanalgan sakkiz toifa kishilar qo‘lida sizga Jannatning sakkiz eshigini biridan ichkariga kirish huquqini beruvchi biletlar bor. Barchalaridan sotib olsangiz ham bo‘laveradi. Ammo sizning biletni kimdan sotib olganingizga qarab, Uning qaysi eshigidan kirishingiz, U yerdagi darajangiz eng yuqori, o‘rta yoki pastroqda bo‘lishi belgilanadi! Zero, Jannatning har bir eshigi alohida bir yaxshilik qilgan kishilarga xosdir. Masalan, namoz o‘quvchilar biridan, ro‘za tutuvchilar boshqasidan, begonalarga sadaqa qiluvchi yana bir eshikdan kirsa, qarindoshiga sadaqa qilgan undanda yuqoriroq darajaga olib boruvchi eshikdan, ham qo‘shni, ham qarindoshiga hamda begonalarga ham yordam qo‘lini cho‘zuvchi kishi esa, avvalgidan ham yuqori maqomga olib boruvchi eshikdan kirish biletini qo‘lga kiritadi va hokazo. Shuning uchun biletni quyidagi ko‘rsatmaga amal qilib, sotib olinsa, maqsadga muvofiq bo‘ladi:
Toriq Muhoribiydan rivoyat qilinadi: “Madinaga kelsak, Rasululloh sollallohu alayhi va sallam minbarda turib, odamlarga xutba qilib, bunday deb turgan ekanlar: “(Sadaqa) Beruvchining qo‘li yuqori (qo‘l hisoblanuvchi)dir! (Xayr-sadaqa berishni avvalo) O‘z qaramog‘ingdagi (kishilar)dan boshlagin: onang, otang, opa-singling, aka-ukang so‘ng eng yaqin kishing, so‘ng undan keyingi yaqin kishiga bergin!” (Imom Nasoiy rivoyati).
Yaqinlarga qilingan xayr-ehsonlarning savobi ikki barobar ko‘p: ham qarindoshlik aloqalarini bog‘lash savobi, ham sadaqa savobi bo‘ladi... Umuman olganda ehtiyojmand mo‘min-musulmonlarga yordam berilsa bas!
Bahodir BAHROMJON o‘g‘li
“Sayyid Muhyiddin maxdum” o‘rta
maxsus islom bilim yurti mudarrisi
Alloh taolo Qur’onda bunday marhamat qiladi:
"Allohdan bandalari ichidan faqat olimlarigina qo‘rqarlar" (Fotir surasi, 28-oyat).
Bu oyat bizga ilmning ulug‘ligini va haqiqiy olimlar Allohdan qo‘rqadigan, haqiqat yo‘lida xizmat qiladigan insonlar ekanini bildiradi.
Islom tarixiga nazar tashlasak, ko‘plab allomalar, adiblar va mutafakkirlar ilm-ma’rifat bilan ummatga xizmat qilganini ko‘ramiz. Ana shunday buyuk zotlardan biri Alisher Navoiy bo‘lib, nafaqat she’riyat, balki tilshunoslik, tasavvuf, axloqiy tarbiya va davlat boshqaruvi sohalarida ham ulkan iz qoldirgan.
Bugungi maqolamizda biz Alisher Navoiyning hayoti, ilmiy va diniy qarashlari va tolibi ilmlar uchun ibrat bo‘ladigan jihatlari haqida fikr yuritamiz.
Navoiy hayoti va ilm yo‘lidagi harakatlari
Alisher Navoiy hijriy 844-yil (milodiy 1441-yil) 9-fevral kuni Hirotda tavallud topgan. Yoshliklaridan Qur’on, hadis, tafsir, fiqh, nahv (arab tili grammatikasi) va mantiq ilmlarini o‘rgangan. Ularning ilmga bo‘lgan muhabbati shunchalik kuchli edi-ki, butun umrini ilm va ma’rifatga xizmat qilishga bag‘ishlagan.
Hazrat Navoiyning ustozlari ichida mashhur olimlar, xususan, Jomiy hazratlari ham bor edi. Jomiy tasavvuf va fiqh ilmlarida yetuk olim bo‘lib, Navoiyning ilmiy va axloqiy shakllanishiga katta ta’sir ko‘rsatgan.
Alisher Navoiy ilmni insonni kamolot sari yetaklovchi eng muhim vosita deb bilgan. U shunday degan:
"Jaholatdan ilmu yiroq qilg‘ay,
Bilim ila ko‘ngling charog‘ qilg‘ay".
Bu fikr Qur’onda kelgan quyidagi oyatga mos keladi:
"Sen: Biladiganlar bilan bilmaydiganlar teng bo‘ladimi?, deb ayt. Albatta, aql egalarigina eslarlar" (Zumar surasi, 9-oyat)
Demak, ilm odamni zulmatdan nurlarga olib chiqadi va haq yo‘lni ko‘rsatadi.
Navoiyning adabiy meroslari va tasavvufiy qarashlari
2.1. "Xamsa" va axloqiy tarbiya
Alisher Navoiy buyuk fors shoiri Nizomiy Ganjaviy an’analarini davom ettirib, turkiy tilda birinchi bo‘lib "Xamsa"ni yaratdi. "Xamsa" tarkibidagi asarlar:
"Hayrat ul-abror" – axloq va taqvo haqida.
"Farhod va Shirin" – halol mehnatning ulug‘ligi.
"Layli va Majnun" – ilohiy sevgi va tasavvufiy yuksalish.
"Sab’ai sayyor" – taqdir va sinovlar.
"Saddi Iskandariy" – ilm va adolatning ustunligi.
Bu asarlar orqali Hazrat Navoiy insonning ma’naviy kamolotga yetishi, hayotning sinovlariga sabr qilish va Allohga yaqin bo‘lish zarurligini ko‘rsatgan.
2.2. "Muhokamat al-lug‘atayn" va tilning sharaflanishi
Alisher Navoiy o‘zining "Muhokamat al-lug‘atayn" asarida turkiy tilning forsiy tildan boy va ifodali ekanini ilmiy jihatdan isbotlagan. Ular shunday degan:
"Kimki turkiy tilda go‘zal so‘z ayta olsa, unga forsiy til kerak emas."
Bu fikr Islom dinidagi har bir millat o‘z ona tilida Allohga xizmat qilishi kerak degan g‘oyaga ham mos keladi.
Qur’onda shunday marhamat qilingan:
"Qaysiki Payg‘ambarni yuborgan bo‘lsak, bayon qilib berishi uchun, o‘z qavmi tili ila yuborganmiz" (Ibrohim surasi, 4-oyat)
Shuning uchun ham Hazrat Navoiy ona tillarini rivojlantirishga katta e’tibor qaratgan va biz bugungi yoshlar ham o‘z tilimizni hurmat qilishimiz lozim.
2.3. Tasavvuf va ilohiy muhabbat
Alisher Navoiy tasavvuf ilmini chuqur o‘rganib, o‘z asarlarida nafsni poklash, dunyoning foniyligi va Allohga muhabbat bilan bog‘lanish masalalarini ko‘p yoritgan:
"Ko‘nglingni dunyo ishi bilan qorama,
Zero Haq rozi bo‘lmas johil banda."
Demak, inson Alloh roziligi uchun yashasa, u dunyo va oxiratda baxtiyor bo‘ladi.
Navoiy va ilm-ma’rifatning jamiyatdagi o‘rni
Alisher Navoiy ilmli jamiyat taraqqiy etishini tushungan holda, quyidagi ezgu ishlarni amalga oshirgan:
Madrasalar, masjidlar va kutubxonalar qurdirgan.
Faqir va yetimlarga yordam bergan.
Adolatli davlat boshqaruvi tamoyillarini ilgari surgan.
Uning bu ishlari Payg‘ambarimiz sollallohu alayhi vasallamning "Olimning obiddan fazli huddi oyning boshqa yulduzlardan fazliga o‘xshaydi" degan hadislariga mos keladi.
Xulosa: Navoiydan bizga qanday ibrat bor?
Biz, Alisher Navoiyning ilm yo‘lidagi fidoyiligidan va diniy qarashlaridan ibrat olishimiz lozim. Uning bizga qoldirgan saboqlari quyidagilar:
Ilm olishga intilish va ilmni Alloh yo‘lida foydalanish.
Ona tilimizni hurmat qilish va boyitish.
Axloqiy poklik va adolatni targ‘ib qilish.
Nafs tarbiyasi va tasavvufiy yuksalishga intilish.
Navoiy aytganidek:
"Ilm ila ko‘ngling charog‘ qilg‘ay,
Bilim ahli yuksak bo‘lg‘ay."
Alloh taolo bizni ham Navoiyning ilmiy va axloqiy merosidan ibrat olib, ummatga foyda keltiruvchi ilm egalaridan bo‘lishimizni nasib etsin!
Zarifaxon Abduqahhorova,
Toshkent islom instituti talabasi