Yangi masjid muborak
Avval xabar berganimizdek, O‘zbekiston Respublikasi Prezidenti Shavkat Mirziyoyevning tashabbusi va rahbarligida joriy yilning 31 may kuni Sherobod tumanida Imom Termiziy ziyoratgohi va jome masjidining ochilish marosimi bo‘lib o‘tdi.
Marosimda O‘zbekiston musulmonlari idorasi raisi, muftiy Usmonxon Alimov hazratlari ishtirok etdi. Dastlab majmuada shom namozi ado etildi, so‘ngra, iftorlik dasturxoni yozilib, duolar qilindi. Yangi jomeda Xufton va tarovih namozi o‘qildi. Namozdan so‘ng, muftiy hazratlari tinchlik va shukronalik haqida ma’ruza qildilar.
Majmuada qad rostlagan yangi masjidda Tarovih namozini ado etish uchun bir yarim mingga yaqin namozxon tashrif buyurdi. Quyida masjidning ochilish marosimiga oid fotolavhalarni e’tiboringizga havola etamiz.
O‘zbekiston musulmonlari idorasi axborot xizmati
Ozarbayjon prezidenti turkiy davlatlar muftiylarini qabul qildi
Bugun, 15 sentyabr kuni Ozarbayjon Respublikasi Prezidenti Ilhom Aliyev Boku shahrida bo‘lib o‘tayotgan Turkiy davlatlar muftiylari yig‘ilishi va xalqaro anjumanning nufuzli ishtirokchilarini qabul qildi.
Samimiy va do‘stona ruhda o‘tgan muloqotda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Ozarbayjon yetakchisiga Davlatimiz Rahbarining samimiy salomi va ezgu tilaklarini yetkazdilar.
Uchrashuvda qardosh davlat Rahbari nutq so‘zlab, xalqaro anjumanlarning ahamiyatiga to‘xtaldi. Muloqot chog‘ida so‘nggi yillarda mamlakatlarimiz o‘rtasidagi strategik sheriklik va do‘stona aloqalar yangi bosqichga ko‘tarilgani alohida e’tirof etildi.
Turkiy davlatlar yetakchilarining qat’iy siyosiy irodasi va sa’y-harakatlari natijasida ilm-fan, ta’lim, madaniy-gumanitar hamda diniy-ma’rifiy jabhalarda hamkorlik jadal sur’atlarda rivojlanayotgani ta’kidlandi. Bu ezgu sa’y-harakatlar Diniy idoralar rahbarlarining mushtarak maqsadlar yo‘lida birlashishi, xalqlarimiz o‘rtasidagi qardoshlik rishtalarini yanada mustahkamlash, tinchlik-osoyishtalikni asrash hamda zamonning dolzarb masalalari bo‘yicha mushtarak fatvo va bayonotlar qabul qilishda muhim poydevor bo‘layotgani qayd etildi.
O‘zbekiston musulmonlari idorasi Matbuot xizmati
