Taroveh – solih zotlar odati
To‘rtinchi kun ro‘zasini yorug‘ yuz bilan qiyomiga yetkazdik, deb xursand bo‘lib iftor qilib oldik, Alloh taolo ibodatimizni qabul aylagan bo‘lsin. Ikki piyola choy ichib tanamiz rohatlangach, tahoratimizni yangilab mushku anbarlardan surib masjidga oshiqamiz. Bugun beshinchi tarovehni o‘qiymiz – Xatm ul-Qur’onni besh poraga yetkazamiz, inshaalloh.
Allohning rahmatidan umidvor bandalarning bir qismi poytaxtimizning “Oq-tunuka” masjidida tarovehga hozir bo‘ldilar. Binobarin, Imom Termiziy Abu Umoma roziyallohu anhudan rivoyat qilishicha, Payg‘ambarimiz sollallohu alayhi vasallam mana bunday deganlar:
“O‘zingizga kechalari qoyim bo‘lishni lozim tuting. Zero, u sizdan oldingi solih zotlarning odatidir. U Parvardigoringizga sizni yaqinlashtiradigan, yomonliklar uchun kafforat bo‘ladigan, gunohlardan qaytaradigan amaldir”.
Imom-noib xalqaro tanlov g‘olibi bo‘ldi
Toshkent shahar Yunusobod tumanidagi "Kulol-Qo‘rg‘on" jome masjidi imom noibi Bahodir domla Muhammadiyev O‘zbekiston – Buyuk Britaniya hamkorligida o‘tkazilgan xalqaro konferensiya doirasidagi «Buyuk xizmat – Oliy sharaf» ilmiy-amaliy ko‘rik-tanlovida g‘olib deb topildi.
Imom-domlamizning ilmiy faoliyati, ta’lim sohasidagi tashabbuslari hamda fidokorona mehnatlari yuqori baholanib, u kishi «Buyuk xizmat – Oliy sharaf» xalqaro esdalik va sharaf nishonlari hamda maxsus guvohnoma bilan taqdirlandilar.
Bahodir domlani ushbu yuksak e’tirof bilan samimiy qutlaymiz!
Alloh taolo domlamizning ilmlarini bundan-da ziyoda qilsin, dinimiz va el-yurtimiz rivoji yo‘lidagi ijodiy va ilmiy faoliyatlariga baraka bersin!
O‘zbekiston musulmonlari idorasi
Matbuot xizmati
