Samarqand masjidlarida Ramazon shukuhi
Ramazon oyi ibodat oyi, Qur’on oyi bo‘lish bilan bir qatorda mutasaddilar uchun mas’uliyat oyi hamdir. Masjidlarda namozxonlar uchun qulay shart-sharoitlar yaratish, taroveh namozi va Xatmi Qur’onlarning tinch-osuda o‘tishini ta’minlash maqsadida viloyat vakilligi, shahar va tuman bosh imomlari hamda masjid imom-xatiblari barcha kerakli ishlar, zarur chora-tadbirlarni amalga oshirmoqdalar. Jumladan,
27 may Ramazon oyining ilk kunida Samarqand viloyati bosh imom xatibi Zayniddin Eshonqulov, viloyat bosh imom xatibi o‘rinbosari Yoqubjon Mansurov birgalikda Samarqand shahridagi "Domla Kamoliddin", “Abdulloh ibn Abbos”, “Xo‘ja Is'hoqi Valiy” masjidiga tashrif buyurdi.
"Domla Kamoliddin" masjidida Peshin namozini, “Abdulloh ibn Abbos” masjidida Asr namozini ado etib bergan viloyat bosh imomi Z.Eshonqulov ibodat nihoyalangach yig‘ilganlarga Ramazon oyining fazilatlari, shukronalik hissi bilan yashash, bu oydan unumli foydalanib qolish borasida oyat va hadislar asosida qisqacha ma’ruza qilib berdi. Ma’ruza yakunida O‘zbekiston musulmonlari idorasi raisi, muftiy Usmonxon Alimov hazratlarining salom va tabriklari jamoatga yetkazildi.
Shundan so‘ng masjid imom xatiblariga masjid hovlisi va tahoratxonasini toza - ozoda tutish, taroveh namozini ado etishda namozxonlarga qulayliklar yaratib berish, ogohlik va hushyorlikni oshirish to‘g‘risida birqancha ko‘rsatmalar berib o‘tildi.
“Xo‘ja Is'hoqi Valiy” masjidida Ramazon oyi uchun ko‘rilgan tayyorgarliklarni ko‘zdan kechirish bilan bir qatorda masjid sharqidan yangidan bunyod etilayotgan xonaqodagi qurilish jarayoni bilan tanishildi. Yangi masjid binosida ishlar nihoyalanish arafasiga kelib qolgan bo‘lib, imom-xatib va me’morlar Ramazon hayitiga namozxonlarga tuhfa tariqasida masjidni foydalanishga topshirishni rejalashtirayotganlarini ma’lum qildilar.
Viloyat vakilligi rahbariyati tomonidan muborak oy davomida ko‘plab masjidlarga tashrif buyurish rejalashtirilgan bo‘lib, bundan masjidlardagi sharoitlar bilan yaqindan tanishish, muammo va kamchiliklarni joyida bartaraf etish, Ramazon oyining tinch-osuda o‘tishiga erishish ko‘zda tutilgan.
Samarqand shahridagi “Xo‘ja Abdu Darun” jome masjidida o‘tkazilayotgan Xatmi Qur’ondan fotolavhalar
Usmonxon Muhammadiyev,
O‘MI Samarqand viloyati
vakilligi mutaxassisi
Misr OAV: O‘zbekiston muftiysining Rabiul avval oyiga bag‘ishlangan maqolalari ma’naviy yangilanish va Nabaviy sunnatga ergashishga chorlamoqda
Misrning nufuzli ommaviy axborot vositalarida O‘zbekiston muftiysi, shayx Nuriddin Xoliqnazarning Muhammad alayhissalom tavallud topgan muqaddas Rabiul avval oyiga bag‘ishlangan turkum maqolalari chop etildi, deb xabar bermoqda “Dunyo” AA muxbiri.
Xususan, Misrning “Al Gomhuria” nashri sahifalarida Rabiul avval oyi musulmonlar qalbida alohida o‘rin tutishi va Ummaning Payg‘ambarimizga bo‘lgan cheksiz muhabbati tufayli bu oy an’anaviy ravishda “Mavlid oyi” deb atalishi haqidagi fikrlar keng yoritilgan. Materialda Muftiyning ushbu davrni yangi ma’naviy ko‘tarinkilik bilan kutib olish, uni “Nabaviy siyrat oyi” va “Ibratli ummat oyi”ga aylantirish, ibodat, axloq va madaniyat masalalarida Payg‘ambarimiz o‘gitlarini amaliy o‘zlashtirishga qaratilgan da’vati alohida ta’kidlangan.
“Ya7dosal2an” nashri ham Islom e’tiqodining ajralmas qismi va chin imonning asosiy sharti bo‘lgan Payg‘ambarimizga bo‘lgan muhabbat sabablari haqidagi metodologik masalani qayd etgan. Maqolada sahobalarning sadoqatiga oid tarixiy misollar va guvohliklar keltirilgan.
“Aldawlanews” resursida Islomni amaliy tushunishning oliy manbai sifatida Nabaviy siyratni o‘rganishning ahamiyati ko‘rib chiqilgan bo‘lib, unda shunchaki sanalarni yodlash o‘rniga har bir tarixiy voqeadan sabr, adolat va rahmat kabi hayotiy saboqlarni chiqarish zarurligi urg‘ulangan.
“Al Diplomacy” nashri esa Payg‘ambarimizga bo‘lgan chin muhabbatning uch asosiy belgisiga — siyrat haqida tafakkur qilish, sunnatga so‘zsiz ergashish va ruhlar shifosi hamda jamiyatda axloqni mustahkamlashning ma’naviy asosi bo‘lgan ko‘p salavot aytishga e’tibor qaratdi.
“Sada El Balad” rasmiy resursi O‘zbekiston muftiysining Rabiul avval oyini oilalar va ta’lim muassasalari uchun keng qamrovli tarbiyaviy loyihaga aylantirish tashabbusini yoritib, musulmonlarni ushbu oyni yuksak axloq va jipslikning oliy namunasiga ergashish yo‘lidagi yangi debochaga aylantirishga chaqirdi.
“Eldameer” axborot portali ham O‘zbekiston muftiysining asarlarini atroflicha taqdim etib, Rabiul avval oyining chuqur mazmuni va sunnatga ergashish orqali ma’naviy poklanishning muhimligiga e’tibor qaratdi.
O‘zbekiston musulmonlari idorasi Matbuot xizmati
