Musulmonlar uchun o‘n ikki oyning eng go‘zali bo‘lgan Ramazon oyi qachon kirishi aniq bo‘ldi. O‘tgan hafta bu muborak oyni munosib tarzda o‘tkazish yuzasidan muhtaram Prezidentimizning qarori ham e’lon qilindi.

Millionlab musulmonlar ishtiyoq va sabrsizlik bilan kutayotgan Ramazon har yilgidek farahli bir suratda kirib kelayotir. 

Ilk saharlik va iftor vaqti qachon kiradi?

Mashinada ketayotib Sebzordagi chorrahada qizil chiroqqa to‘xtasangiz, oldingizda Ramazon taqvimi sotib yurgan yigitlar paydo bo‘ladi. Bozorlardagi yer osti yo‘llariga kirish va chiqishda ham taqvim sotayotganlar bilan duchlashasiz. Aslida ana shu ham musulmonlarning bir-biriga moddiy-ma’naviy yordami hisoblanadi. Shunday  vaqtda bir-ikki ehtiyojmand kishilar uch-to‘rt so‘m ishlab qoladi-da. O‘sha taqvimlardan hammamiz bilib olgan bo‘lsak-da, yana bir bor eslab olsak foydadan xoli bo‘lmaydi.

Birinchi saharlik vaqti jumadan shanbaga o‘tar kechasi 03.25; iftor vaqti esa 19.47. Ramazonning eng qisqa vaqti ham shu kun. Keyingi kunlar boshidan oxiriga qarab cho‘zilib boraveradi. 

Taroveh qanday o‘qiladi?

Taroveh juma kuni oqshom boshlab o‘qiladi. Taroveh – xufton va vitrning orasida o‘qiladigan namoz. Tarovehni to‘rt rakatda bir salom bilan o‘qish joiz bo‘lsa-da, ikki rakatda bir namoz bilan o‘qish yanada fazilatlidir.  Namozning har to‘rt rakatida bir oz o‘tirib nafas rostlab olinadi. Shu vaqtda tasbeh aytiladi.

Tarovehni uyda o‘qisa ham bo‘ladi, ammo jamoa bilan bir safda o‘qishning savobi kattadir.

Damin JUMAQUL  tayyorladi.