Chempionlik muborak bo‘lsin!
Joriy yilning 16 may kuni O‘zbekiston musulmonlari idorasi tizimidagi futbol jamoalari o‘rtasida 9-may “Xotira va qadrlash kuni” munosabati bilan o‘tkazilgan futbol turnirining final o‘yini bo‘lib o‘tdi.
Unda Toshkent viloyati imom-xatiblaridan tashkil topgan “Do‘stlik” jamoasi va Toshkent shahri imom-xatiblaridan tashkil topgan “Minor” jamoalari o‘zaro to‘p surishdi. Shiddatli kechgan uchrashuvda “Do‘stlik” jamoasi “Minor” jamoasini 8:6 hisobida mag‘lub etib, turnir kubogini qo‘lga kiritdi.
Final uchrashuvida, ko‘plab mehmonlar, jamoalar murabbiylari, hamda O‘zbekiston musulmonlari idorasi Toshkent shahar Bosh imom-xatibi Anvar qori Tursunov tashrif buyurdi.
Quyida, g‘olib jamoalar va turli nominatsiyalar bo‘yicha taqdirlanganlarni e’lon qilamiz:
1-o‘rin – “Do‘stlik” jamoasi;
2-o‘rin – “Minor” jamoasi;
3-o‘rin – “Buxoriy avlodlari” jamoasi.
Turli nominatsiyalar bo‘yicha taqdirlanganlar:
Eng yaxshi murabbiy – Xayrulla Turmatov
Eng yaxshi darvozabon – Umidjon Sodiqov
Eng yaxshi himoyachi – Shavkat Apisov
Eng yaxshi yarim himoyachi – G‘ayrat Rahmatullayev
Eng yaxshi hujumchi – Shuxrat Xodjiboyev
Eng ko‘p to‘purar – Saidov Otabek
Eng jonkuyar muxlis – Bahriddin Sharipov
Eslatib o‘tamiz, navbatdagi turnir Istiqlolimizning 26 yilligi munosabati bilan o‘tkaziladi. Ushbu turnirga, Toshkent shahridagi "Ko‘kaldosh" o‘rta maxsus islom bilim yurti mezbonlik qiladi.
O‘zbekiston musulmonlari idorasi
axborot xizmati
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »