Imom Navaviy «Sahihi muslim» kitobining sharhida shunday keltiradilar: «Albatta, Ahli sunna val jamoa ulamolari Alloh taoloni ko‘rish mumkinligini ta’kidlaydilar. Shuningdek ular bu hodisaning oxiratda bo‘lishiga ham ijmo qilganlar. Alloh taoloni faqatgina mo‘minlar ko‘radilar, kofirlar emas. Bid’at ahli bo‘lgan ba’zi toifalar – mo‘tazilalar, xavorijlar va ba’zi murjialar Alloh taoloni maxluqotlaridan hech biri ko‘rmaydi, bu aqlga to‘g‘ri kelmaydigan ish deydilar. Ammo ularning bu qarashlari ochiq-oydin xato va johillikdir. Kitob va sunnatda, sahobalar va ulardan keyingi ulamolarning ijmolarida Alloh taoloni oxiratda ko‘rish sobit ekaniga dalillar yetarlichadir. Bu haqda yigirmaga yaqin sahobalar tomonidan Payg‘ambarimiz sollallohu alayhi vasallamdan hadislar rivoyat qilingan. Ko‘plab ahli sunna mutakallim ulamolarining adashgan toifalarga bergan javoblari ham mashhurdir. Alloh taoloni bu dunyoda ko‘rish mumkinligi ham xabarlarda kelgan. Lekin mutakallim ulamolarning jumhuri Alloh taolo dunyoda ko‘rilmasligini ta’kidlaydilar».
Mutakallim ulamolardan Najmiddin Umar Nasafiy rohmatullohi alayh o‘zlarining «Aqoidi Nasafiy» matnlarida bu borada shunday keltiradilar: «Alloh taoloning bandalariga ko‘rinishi aqlan joiz, naqlan vojibdir. Ha, oxirat diyorida mo‘minlarning Alloh taoloni ko‘rishlarini tasdiqlovchi sam’iy dalillar kelgandir. Bas, biror makonda bo‘lmasdan, biror muqobil tarafda bo‘lmasdan, yoki nurga chulg‘anmasdan, yoki ko‘ruvchi bilan Alloh taolo o‘rtasida masofa sobit bo‘lmasdan ko‘rinadi».
Alloh subhanahu va taolo Qur’oni karimda shunday marhamat qiladi: «U kunda chiroyli yuzlar bor. O‘z Robbisiga nazar soluvchilar». (Qiyomat surasi 22 23-oyatlar)
Mo‘minlar Jannatga kirgach,ularga ko‘zlar ko‘rmagan va quloqlar eshitmagan son-sanoqsiz ne’matlar beriladi. O‘sha ne’matlarning eng ulug‘i Alloh taologa nazar solish hisoblanadi. Bandalar Alloh taoloni shaklsiz, idroksiz va biror timsolsiz ko‘radilar. Bu haqda So‘fi Ollohyor bobomiz o‘z baytlarida shunday keltirganlar:
Ko‘ngulda kechsa, ko‘zga tushsa har shay
Erur andin munazzah Xoliqi Hay.
Ya’ni insonning ko‘nglida Alloh taoloning qandayligi to‘g‘risida qanday fikr o‘tsa ham, uning ko‘ziga qanday ulug‘vor narsa ko‘rinsa ham Alloh taolo barchasidan boshqa bo‘lgan, oliy va buyuk Zotdir.
Idroksiz ko‘rish deganda esa ko‘rilgan narsani tasvirlab bera olmaydigan, uning qandayligini tushuntirib bera olmaydigan hamda yodida saqlab qola olmaydigan darajada ko‘rish ma’nolari tushuniladi. Shu ma’noda mo‘minlar Alloh taoloning jamoliga shaklsiz, idroksiz va biror timsolsiz ravishda nazar tashlaydilar.
Kofirlar esa o‘sha kunda Alloh taoloni ko‘rishdan to‘siladilar. Bu haqida Qur’oni karimda quyidagicha xabar berilgan: «Yo‘q!!! Albatta, ular o‘sha kunda o‘z Robbilarini ko‘rishdan to‘silurlar» (Mutoffifin surasi 15 oyat).
Imom Shofe’iy rohmatullohi alayh: «Ushbu oyatda mo‘minlarning Alloh taoloni ko‘rishlariga dalil bor»,-deganlar.
Imom Molik rohmatullohi alayh: «Uning dushmanlari to‘silgan va Uni ko‘ra olmaganlaridan keyin, O‘zining do‘stlariga tajalliy (O‘zini namoyon) qiladiki, U Zotni ko‘radilar»,-deganlar.
Jarir ibn Abdulloh roziyallohu anhudan rivoyat qilinadi: “Bizlar Nabiy sollallohu alayhi vasallamning huzurlarida edik, u zot to‘lin oy kechasida oyga nazar soldilarda: «Sizlar yaqinda Robbilaringizni bu oyni ko‘rgandek ko‘rasizlar, Uni ko‘rishda qiynalmaysizlar, agar quyosh chiqishidan oldin va botishidan oldin namozga kuch sarflashga qodir bo‘lsalaringiz, albatta, uni ado qilinglar»,-dedilar”. (Muttafaqun alayh)
Rasululloh sollallohu alayhi vasallamning «Bu oyni ko‘rgandek ko‘rasizlar» deyishlari ko‘riladiganni ko‘riladiganga o‘xshatish emas, balki ko‘rishni ko‘rishga o‘xshatishdir. Alloh taoloni ko‘rishni oyni ko‘rishga o‘xshatishda ikki xil ma’no bor:
Abu Hurayra roziyallohu anhudan rivoyat qilinadi: “Ba’zi odamlar: «Ey Allohning Rasuli, qiyomat kuni Robbimizni ko‘ramizmi?»,- deyishdi. Shunda Rasululloh sollallohu alayhi vasallam: «To‘lin oy kechasida oyni ko‘rishda bir-biringizga ziyon-zahmat yetkizasizlarmi?»,-dedilar. Ular: «Yo‘q, ey Allohning rasuli», deyishdi. U zot sollallohu alayhi vasallam: «Bulut yo‘q kunda quyoshni ko‘rishda bir-biringizga ziyon-zahmat yetkizasizlarmi?», dedilar. Ular: «Yo‘q», deyishdi. U zot sollallohu alayhi vasallam: «Albatta, sizlar U Zotni ana shunday ko‘rasizlar»,-dedilar. (Imom Buxoriy va Imom Muslim rivoyat qilishgan)
Alloh taoloni tushda ko‘rish borasida esa quyidagi rivoyatlar kelgan. Albatta, bu ko‘rish ham oddiy ko‘z bilan emas, balki qalb ko‘zi bilan bo‘ladi:
Imom A’zam rohmatullohi alayh Alloh taoloni tushlarida yuz marta ko‘rganliklari rivoyat qilingan.
Ta’bir beruvchilarning imomi Muhammad ibn Siyrin shunday deganlar: «Kim Alloh taoloni tushida ko‘rsa, Jannatga kiradi va g‘am-tashvishlaridan xalos bo‘ladi».
Imom Ahmad rohmatullohi alayh shunday deganlar: “Alloh subhanahu va taoloni tushimda ko‘rdim va ibodatlarning eng afzali haqida so‘radim. Shunda Alloh taolo «Qur’onni tilovat qilish».- dedi”.
Rivoyat qilinganki, Hamza Qori rohmatullohi alayh tushlarida Alloh subhanahu va taoloning O‘ziga Qur’nni boshidan to oxirigacha o‘qib berganlar.
Alloh taolo barchamizga jamolini ko‘rishlik baxtini nasib etsin. Omin.
Toshkent islom instituti talabasi
Nuriddin Turg‘unboyev
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Oisha onamiz roziyallohu anhoning barcha sifatlari ham kamolot sifatlariga daxldor ekaniga shubha bo‘lishi mumkin emas. U kishining buyuk hayotlarini diqqat bilan o‘rgangan ulamolar Oisha onamiz roziyallohu anhoda boshqalarda bo‘lmagan qirqta komilalik sifatlari bor ekanini ta’kidlaydilar. Ana shuning uchun ham bu haqda bir-ikki og‘iz so‘z aytmoqni ravo ko‘rdik.
Oisha onamiz roziyallohu anhoning kamolot sifatlari haqida so‘z yuritar ekanmiz, bu sifatlar ro‘yxatining boshida Rasululloh sollallohu alayhi vasallamdan vorid bo‘lgan hadisi shariflar turishini aytib o‘tmog‘imiz lozim. U zot Oisha onamiz roziyallohu anho haqlarida ajoyib madhlarni aytganlar.
Oisha roziyallohu anhodan rivoyat qilinadi. Rasululloh sollallohu alayhi vasallam: «Ey Oisha! Mana bu Jabroil, u senga salom aytmoqda», dedilar.
«Va alayhissalomu va rohmatullohi va barokatuhu! Ey Allohning Rasuli, siz men ko‘rmagan narsani ko‘rasiz», dedim».
Jabroil alayhissalom bu dunyoda payg‘ambarlardan boshqa kimga salom aytganlar?
Jabroil alayhissalom bu dunyoda payg‘ambarlardan boshqa birgina insonga – Oisha onamiz roziyallohu anhoga salom aytganlar.
Mana shu ulug‘ maqomning o‘zi bir olamga tatiydi.
Abu Muso roziyallohu anhudan rivoyat qilinadi:
Nabiy sollallohu alayhi vasallam:
«Erkaklardan ko‘pchilik barkamol bo‘ldilar. Ayollardan Maryam Imron qizi va Fir’avnning ayoli Osiyodan boshqasi barkamol bo‘lmadi.
Oishaning boshqa ayollardan ustunligi sariydning boshqa taomlardan ustunligiga o‘xshaydir», dedilar».
Ikkisini Buxoriy, Muslim va Termiziy rivoyat qilganlar.
Ushbu hadisi sharifda aslida ayollarning, xususan, Maryam onamiz, Osiyo onamiz va Oisha onamizning boshqa ayollardan ustun bo‘lgan fazllari haqida so‘z boradi.
«Erkaklardan ko‘pchilik barkamol bo‘ldilar».
Erkaklardan barkamol bo‘lganlar ro‘yxatining avvalida Payg‘ambar alayhissalomlar turadilar. Ulardan boshqa barkamol erkaklar ham bor. Bu haqiqat hammaga ma’lum.
«Ayollardan Maryam Imron qizi va Fir’avnning ayoli Osiyodan boshqasi barkamol bo‘lmadi».
Bu ikki ulug‘ zotning barkamol bo‘lganliklari Qur’oni karimda ularning birgalikda, xos zikr qilinishlaridan ham bilib olinadi.
Alloh taolo «Tahrim» surasida:
«Alloh iymon keltirganlarga Fir’avnning xotinini misol qilib keltirdi. O‘shanda u: «Robbim! Menga O‘z huzuringda, jannatda bir uy bino qilgin. Menga Fir’avndan va uning ishidan najot bergin va menga zolim qavmdan najot bergin», deb aytdi», degan (11-oyat).
Fir’avnning xotini o‘sha paytdagi eng katta podshohning ayoli edi. Yemak-kiymakda to‘kin edi. Nimani xohlasa, shuni qilishi mumkin edi. Qasrlarda, turli ne’matlar ichida farog‘atda yashashiga qaramasdan, u kofir va zolim eriga hamda qavmiga qarshi chiqdi. Allohga iymon keltirdi. Allohdan jannatda uy qurib berishini so‘radi. Bu hol esa dunyo hoyu havasidan ustun kelishning oliy misolidir.
Mo‘minlarning ikkinchi misoli Maryam binti Imrondir.
«Va farjini pok saqlagan Imron qizi Maryamni (misol keltirdi). Bas, unga O‘z ruhimizdan pufladik va U Robbining so‘zlarini hamda kitoblarini tasdiq qildi va itoatkorlardan bo‘ldi» (12-oyat).
Imronning qizi Maryam Allohga sof e’tiqodda bo‘lganlar va o‘zlarini ham sof tutganlar. Yahudiylar tuhmat qilganlaridek, nopok bo‘lmaganlar. Alloh taolo Jabroil farishta orqali ana shu pok jasadga o‘z ruhidan «puf» deyishi bilan Iyso alayhissalomni ato qilgan.
«Oishaning boshqa ayollardan ustunligi sariydning boshqa taomlardan ustunligiga o‘xshaydir».
Endi Payg‘ambar sollallohu alayhi vasallamning zavjai mutohharalari – Oisha onamizning fazllari haqida so‘z ketmoqda. Payg‘ambar sollallohu alayhi vasallam u kishining boshqa ayollardan fazllarini sariyd deb nomlanadigan taomning o‘sha vaqtdagi boshqa taomlardan ustunligiga o‘xshatmoqdalar.
O‘sha paytda Payg‘ambar sollallohu alayhi vasallam va sahobai kiromlar yashab turgan jamiyatning sharoiti va taomiliga ko‘ra, sariyd boshqa taomlardan afzal taom hisoblanar edi.
Xuddi shunga o‘xshab, Oisha onamiz ham boshqa ayollardan afzal edilar.
Bu dunyoda kim ushbu maqomga sazovor bo‘libdi?!
Ushbu maqomga bu dunyoda faqat Oisha onamiz roziyallohu anho sazovor bo‘ldilar.
Termiziy va Buxoriy Amr ibn Os roziyallohu anhudan rivoyat qiladilar:
«Nabiy sollallohu alayhi vasallam meni Zotus-Salosil askariga boshliq qildilar. Qaytib kelganda:
«Ey Allohning Rasuli, odamlarning qaysinisi siz uchun eng mahbubdir?» dedim.
«Oisha», dedilar.
«Erkaklardan-chi?» dedim.
«Uning otasi», dedilar.
«So‘ngra kim?» dedim.
«So‘ngra Umar», dedilar va bir necha odamlarni sanadilar. Bas, meni oxirlarida qilib qo‘ymasinlar, deb, sukut saqladim».
Allohning Rasuli uchun odamlarning qaysinisi eng mahbub ekan?
Allohning Rasuli uchun odamlar ichida Oisha onamiz roziyallohu anho eng mahbub ekanlar.
Bu dunyoda kim ushbu maqomga sazovor bo‘libdi?
Ushbu maqomga bu dunyoda Oisha onamiz roziyallohu anho sazovor bo‘libdilar.
Imom Abu Ya’lo «Musnad»larida Oisha onamiz roziyallohu anhodan rivoyat qiladilar:
«Menga hech bir ayolga berilmagan to‘qqiz narsa berilgan:
– Rasululloh sollallohu alayhi vasallam menga uylanishga amr qilinganlarida Jabroil alayhissalom suratimni olib tushib, u zotga ko‘rsatgan.
– U zot menga bokira holimda uylanganlar. Mendan boshqaga bokira holida uylanmaganlar.
– Rasululloh sollallohu alayhi vasallam boshlari mening quchog‘imda turgan holda vafot etdilar.
– Rasululloh sollallohu alayhi vasallam mening uyimda dafn qilindilar.
– Farishtalar mening uyimni o‘rab olgan edilar. U zotga men u kishining ko‘rpalarida turganimda vahiy nozil bo‘lar edi. U zot meni o‘zlaridan uzoqlashtirmas edilar.
– Men u zotning xalifalari va siddiqlarining qiziman.
– Mening oqlovim osmondan nozil bo‘lgan.
– Men pokning huzurida pok yaratilganman.
– Menga mag‘firat va karamli rizq va’da qilingan».
Imom Qurtubiy o‘z tafsirlarida Oisha onamiz roziyallohu anhoning kamolot sifatlari haqida so‘z yuritar ekanlar, jumladan, quyidagilarni aytganlar:
«Ba’zi ahli tahqiqlar ayturlar:
«Yusuf alayhissalom fahsh ishda tuhmat qilinganida Alloh u kishini beshikdagi go‘dakning tili bilan oqladi.
Maryam fohishalikda tuhmat qilinganida Alloh u kishini o‘g‘illari Iyso alayhissalomning tili bilan oqladi.
Oisha fahsh ishda tuhmat qilinganida Alloh u kishini Qur’on bilan oqladi. Alloh u kishi uchun go‘dakning oqlashini yoki nabiyning oqlashini ravo ko‘rmadi. Alloh u kishini tuhmatdan O‘z kalomi ila oqladi».
Alloh taolo bu dunyoda kimni tuhmatdan O‘z kalomi ila oqlabdi?
Alloh taolo bu dunyoda faqat Oisha onamiz roziyallohu anhoni tuhmatdan O‘z kalomi ila oqlagan.
"Nubuvvat xonadoni xonimlari" kitobidan.