Yurtimiz qorilari Eronda o‘tkazilgan Qur’oni karim musobaqasida ishtirok etdi
Shu yilning 19-26 aprel kunlari Eron Islom Respublikasining poytaxti Tehron shahrida o‘tkazilgan 34-Xalqaro Qur’oni karim musobaqasida 2 nafar vakilimiz – Toshkent shahar, Uchtepa tumanidagi “Abu Hurayra” jome masjidi imom-noibi Saidov Xudoyqul hamda Toshkent shahar, Uchtepa tumanidagi “Aziz ota” jome masjidi imom-noibi Aminov Muhammadloiq ishtirok etishdi.
Ushbu musobaqada dunyoning 80 dan ortiq davlatlaridan tashrif buyurgan qorilar ishtirok etib, ular orasida vakillarimizdan Saidov Xudoyqul Qur’oni karimni to‘liq yoddan o‘qib berish (hifz) yo‘nalishi bo‘yicha qatnashgan bo‘lsa, Aminov Muhammadloiq esa Qur’oni karimni tajvid qoidasi bilan o‘qib berish (qiroat) yo‘nalishida ishtirok etdi. Musobaqaning hifz yo‘nalishida 1-o‘rinni Eron, 2-o‘rinni Suriya, 3-o‘rinni Sudan, qiroat yo‘nalishida 1-o‘rinni Eron, 2-o‘rinni Iroq, 3-o‘rinni Shvetsiya davlatlari egallashdi. Musobaqa hay’ati tomonidan yurtimiz vakillariga munosib ishtiroki to‘g‘risidagi “Tashakkurnoma” taqdim etildi.
Shuningdek, o‘rta maktab o‘quvchilari, ayol-qizlar va ko‘zi ojizlar ishtirokida ham xalqaro Qur’oni karim musobaqasi bo‘lib o‘tdi. Barcha ishtirokchilar uchun Tehron shahridagi diqqatga sazovor joylarga ziyorat uyushtirildi.
O‘MI Xalqaro aloqalar bo‘limi
Xato – bandaniki
Bir yigit masjidga kelib biroz o‘tirgach, imomga e’tiroz bildirdi:
– Endi masjidga kelib o‘tirmasak ham bo‘larkan...
Imom undan nima uchun bunday deganining sababini so‘radi. Yigit yon-atrofdagi hamma odam telefonga qarab o‘tirgani, ba’zilari o‘zaro gaplashayotgani uchun shu gapni gapirganini aytdi.
Imom biroz o‘ylab turgach, bunday dedi:
– Yaxshi, e’tirozing o‘rinli. Men bu haqda odamlarga eslatib turibman. Lekin sen endi masjidga kelmoqchi bo‘lmasang bir ish qilib ket.
Yigit rozi bo‘ldi. Imom unga bir piyolani to‘ldirib suv berdi va shu suvni bir tmchi ham to‘kmasdan masjidning ichini bir aylanib chiqishini iltimos qildi. Yigit bor diqqat-e’tiborini jamlab, ohista qadamlar bilan, ikki ko‘zini piyoladan uzmagan holda vazifani muvaffaqiyatli ado etdi.
Imom unga dedi:
– Barakalloh! Endi menga ayt-chi, sen shu topshiriqni bajarayotganingda kimlar gapirib o‘tirdi, kimlar telefoniga qaradi?
Yigit javob berdi:
– Men qayerdan bilay, axir butun diqqatim suvni to‘kib qo‘ymaslikda edi.
Imom dedi:
– Ana ko‘rdingmi? Sen topshiriqni bajarayotganingda butun fikru hayolingni bir joyga jamlading. Allohning huzurida turganimizni his qilib, xayolimizni ibodatga, Uning zikriga qaratsak, boshqalarning xatosini ko‘rishga vaqtimiz ham qolmaydi. Albatta, kimdir xato qilsa bu sening hidoyatdan yuz burib ketishingga sabab bo‘lmasligi kerak. Chunki xato dinniki yo masjidniki emas, balki bandaniki...
Yigit o‘ylab ko‘rib, xato qilganini tushundi. Keyingi jamat namozlarida xushu bilan qatnashishda davom etdi.
Akbarshoh RASULOV