Shu yilning 20-30 aprel kunlari Birlashgan Arab Amirliklarining Sharja (ash-Shoriqa) shahridagi “Qosimiya” universiteti tomonidan “Qur’oni karim va sunnati nabaviya” muassasasi bilan hamkorlikda Qur’oni karim va sunnati nabaviya musobaqasi o‘tkaziladi.

Musobaqada Fors ko‘rfazida Hamkorlik kengashiga a’zo davlatlar, Saudiya Arabistoni Podshohligidagi “Al-Javf” universiteti, O‘mon sultonligidagi  “Sulton Qobus” universiteti va Kuvayt shahridagi “Al-Kuvayt” universiteti hamda BAAdagi 24 ta universitet talabalaridan iborat 300 dan ortiq qori yigit va qoriya qizlar ishtirok etmoqda.

Musobaqa quyidagi 5 yo‘nalishda o‘tkaziladi:

1. Qur’oni karimning 30 porasini tajvid qoidasi bilan to‘liq yoddan o‘qish.
2. Qur’oni karimning 20 porasini tajvid qoidasi bilan to‘liq yoddan o‘qish.
3. Qur’oni karimning 10 porasini tajvid qoidasi bilan to‘liq yoddan o‘qish.
4. Qur’oni karimning 5 porasini tajvid qoidasi bilan to‘liq yoddan o‘qish.
5. Sunnati nabaviya yo‘nalishida hadisi shariflarni yoddan aytib berish.

G‘oliblar pul mukofotlari bilan taqdirlanadi. “Qosimiya” universiteti rektori Doktor Rashshod Solim musobaqaning dastlabki davrasi universitet talabalari ishtirokida, so‘ngra BAAdagi universitet talabalari, so‘nggi davralari esa BAA bilan Fors ko‘rfazidagi Hamkorlik kengashi davlatlaridagi oliygoh talabalari o‘rtasida bo‘lib o‘tishini ta’kidlab, musobaqani o‘tkazishdan talaba yoshlarni Qur’oni karim va hadisi shariflarni yodlashda musobaqalashishga qiziqtirish hamda  “Qosimiya” universiteti bilan boshqa arab davlatlaridagi universitetlar o‘rtasidagi o‘zaro hamkorlik munosabatlarini orttirish maqsad qilinganini ma’lum qildi.

Xalqaro aloqalar bo‘limi xodimi

Ilyosxon AHMЕDOV

tayyorladi