Muhim asar taqdimoti
Bugungi kunda yoshlar orasida internetning “jozibador” va ko‘zga ko‘rinmas qarmoqlariga ilinib qolishini oldini olish, ularni internetdagi taxdidlaridan himoyalash, kelajak avlodni vatanparvarlik ruhida tarbiyalash va bu borada ma’naviy-ma’rifiy ishlarni faol olib borish borasida keng ko‘lamli ishlar amalga oshirilmoqda. Bu borada yozilgan muhim asarlardan biri, O‘zbekiston musulmonlari idorasi raisi o‘rinbosari Aydarbek Tulepov qalamiga mansub “Internetdagi tahdidlardan himoya” kitobidir.
Joriy yilning 19 aprel kuni Toshkent islom instituti tashabbusi bilan O‘zbekiston musulmonlari idorasi majlislar zalida ushbu kitobning yangi nashri taqdimoti bo‘lib o‘tdi. Taqdimotda O‘zbekiston musulmonlari idorasining Toshkent viloyati bosh imom-xatibi Xayrulla Turmatov, Toshkent shahar Chilonzor tumani bosh imom-xatibi Husniddin Abdukarimov, Toshkent islom instituti rektori Uyg‘un G‘afurov hamda respublikamizdagi barcha diniy ta’lim muassasalaridan kelgan ustoz va talabalar ishtirok etdilar.
Dastlab, Toshkent viloyati vakili Xayrulla Turmatov so‘zga chiqib, ushbu kitobda, hozirgi zamonning eng dolzarb muammolariga munosib yechimlar borligini ta’kidlab o‘tdi. Shundan so‘ng, Chilonzor tumani bosh imom-xatibi Husniddin Abdukarimov so‘zga chiqib, kitobning bugungi kundagi ahamiyati, undagi hayotiy voqe’alardan jonli misollar keltirdi.
Taqdimot davomida talabalar tomonidan tayyorlangan sahna ko‘rinishi taqdim etildi.
Taqdimot so‘ngida, Toshkent islom instituti talabalari orasida “Internetdagi tahdidlardan himoya” kitobining yangi nashri bo‘yicha o‘tkazilgan tanlov natijalari e’lon qilindi. Unga ko‘ra, 1-“b” kurs talabasi Mansurov Musaxon, 2-“d” kurs talabasi Najmiddinov Baxtiyorjon va 3-“b” kurs talabasi Nizamatdinov Yesengeldilar g‘olib deb topilib, faxriy yorliq va esdalik sovg‘alari bilan taqdirlanishdi.
Taqdimot marosimi O‘zbekiston musulmonlari idorasi raisi o‘rinbosari Shayx Abdulaziz Mansur hazratlarining yurtimiz tinchligi va farovonligini so‘rab qilgan ezgu duolari bilan yakunlandi.
Kamoliddin MAHKAMOV,
Toshkent islom instituti
Axborot resurs markazi mudiri.
“The Diplomatic insight”: O‘zbekiston o‘tmishining boy merosini zamonaviy taraqqiyot va milliy yuksalish bilan uyg‘unlashtirayotgan davlat
Pokistonning “The Diplomatic insight” portalida Pokiston tinchlik va diplomatik tadqiqotlar instituti ijrochi direktori Muhammad Asif Nur qalamiga mansub O‘zbekistonning ma’rifatparvar merosi sarlavhali maqolasi e’lon qilindi, deb xabar bermoqda “Dunyo” AA.
“O‘zbekistonning eng katta boyligi faqat Samarqand, Buxoro va Xivaning mahobatida emas. Bu qadim yurtning eng katta boyligi insoniyatga hisoblashni, davolashni, osmon jismlarini kuzatishni, e’tiqodni anglashni, adolat bilan boshqarishni va tilga tamadduniy ohang bag‘ishlashni o‘rgatgan buyuk tafakkur sohiblarining vorisligidadir”, –deb yozgan muallif.
Muhammad Asif Nurning ta’kidlashicha, Prezident Shavkat Mirziyoyev rahbarligida bugun O‘zbekistonda muzeylar, ilmiy markazlar, ixtisoslashtirilgan maktablar, kitobxonlik dasturlari va madaniy diplomatiya orqali Uchinchi Renessansning poydevoriga tamal toshi qo‘yilyapti.
“Bu maqsad 2026 yil 17 mart kuni Toshkentda Islom sivilizatsiyasi markazining ochilishi bilan yanada aniq ifoda topdi. 1 iyunga qadar markazga yarim million kishi, jumladan, 150 dan ortiq xorijiy delegatsiya tashrif buyurdi. Qariyb 2 000 nafar olim 810 ta tegishli loyihada ishtirok etdi, 1 000 dan ortiq madaniy ashyo esa xorijdan O‘zbekistonga qaytarildi. Rasmiy ma’lumotlar mamlakat xotirani ta’lim va milliy ishonchga aylantirayotganini ko‘rsatadi”, – deya qayd etilgan nashrda.
Shuningdek, maqolada 2026 yilda Samarqand yaqinidagi Imom Buxoriy majmuasi qayta qurilib, ziyoratchilar uchun ochilgani e’tiroq etilgan. Unda 10 ming kishilik masjid, muzey va ilmiy-tadqiqot muassasalari barpo etildi. Majmuaning kunlik tashrif buyuruvchilarni qabul qilish imkoniyati 65 ming kishiga yetdi va birinchi oyning o‘zida majmuaga bir milliondan ortiq odam tashrif buyurdi. Bu maskan ziyoratni bilim, tadqiqot va ma’naviy tarbiya bilan uyg‘unlashtiradi.
Muallif o‘z maqolasida Amir Temur va Temuriylar merosining O‘zbekiston tarixi va taraqqiyotida tutgan o‘rniga alohida e’tibor qaratgan.
“Temuriylar davri nafaqat O‘zbekiston, balki jahon tamaddunida ham muhim palla hisoblanadi. Amir Temur Samarqandni qudratli davlat markaziga aylantirdi va me’morchilik, ilm-fan hamda madaniyat taraqqiyotini qo‘llab-quvvatladi. 2026 yilda O‘zbekistonda Amir Temur tavalludining 690 yilligi keng nishonlanmoqda, Temuriylar tarixi davlat muzeyi qayta rekonstruksiya qilindi va aprel – Amir Temur oyi deb e’lon qilindi”, – deyiladi manbada.
Asif Nurning e’tirof etishicha, O‘zbekistonda ma’rifatparvarlik g‘oyalari hech qachon faqat qo‘lyozmalar bilan cheklanib qolmagan. U mahallada, ustoz va keksalarga hurmatda, ustoz-shogird an’analarida va mehmondo‘stlikda yashaydi. U Shashmaqom ohanglarida yangraydi, Lazgi raqsida namoyon bo‘ladi, Askiya san’atida tilga kiradi, baxshilar ijrosida hikoya qilinadi, atlas va adras matolarida o‘z ifodasini topadi. YUNЕSKO tomonidan tan olinishi bu an’analarning jahon miqyosidagi ahamiyatini tasdiqlaydi.
Muallif o‘z maqolasini “O‘zbekistonning ma’rifatparvar merosining ildizlari qadimiy – ammo uning haqiqiy manzili – kelajakdir”, – degan so‘zlar bilan yakunlagan.
O‘zbekiston musulmonlari idorasi matbuot xizmati
