Fayz va barakaga erishishni xohlaysizmi?
Menimcha yuqoridagi savolni o‘qigan har qanday shaxs, unga javoban: “Albatta, men fayz va barakaga erishishni xohlayman” deya javob bergan bo‘lsa, ajab emas. Chunki, insonlar bu dunyo besh kunlik bo‘lsada, unda yaxshi hayot kechirishni hohlaydilar. Albatta, bunday yaxshi hayot kechirishga Alloh taoloning O‘zi kalomida va Payg‘ambarimiz sollallohu alayhi va sallam hadislarida tavsiyalar berganlar.
Ana shu tavsiyalardan biri “Mulk” surasi haqida bo‘lib, bu suraning fazilatlari haqida Rasululloh sollallohu alayhi va sallamdan bir qancha hadislar rivoyat qilingan.
Hazrati Imom Termiziy rahmatullohi alayhi bobomiz rivoyat qilgan hadisi sharifda Payg‘ambarimiz sollallohu alayhi va sallam: “U (Mulk surasi) saqlovchi va najot beruvchidir. Qabr azobidan najot beradi”, deganlar.
Mulk surasi xalqimiz orasida “Taborak” nomi bilan ham ma’lum-mashxurdir. Shuningdek u “Saqlovchi” va “Najot beruvchi” deb ham yuritiladi, chunki u bandalarni Do‘zax azobidan saqlaydi.
Payg‘ambarimiz sollallohu alayhi va sallam bir hadislarida: “Albatta, Allohning kitobida (Qur’onda) bir sura bor, uning oyatlari o‘ttizta bo‘lib, o‘z o‘quvchisini qiyomat kuni shafoat qiladi. Uni Do‘zaxdan chiqarib, Jannatga kiritadi. U “Taborak (Mulk) surasidir” deganlar.
Boshqa bir hadisda Rasulalloh sollallohu alayhi va sallam: “Mulk surasi har bir mo‘min qalbida bo‘lishini hohlardim”, deganlar.
Rasulalloh sollallohu alayhi va sallam marhamat qilib aytganlarki: “Har kim “Mulk” surasini o‘qisa, Qadr kechasiga yetishganning savobini topadi. Bu sura o‘z o‘quvchisini shafoat qiladi va uning gunohlari avf etiladi. Har kim bu surani o‘qisa, Alloh ta’loning hamma kitoblarini o‘qiganlik savobiga erishadi. Agar sidq bilan uning oyatlarini o‘qisa qabr azobini ko‘rmaydi. Agar qabr boshida o‘qilsa, o‘sha qabodagi mayitning azobi yengil bo‘ladi va qabri Jannat bo‘stoni aylanadi”.
Rivoyat qilinadi, kimki og‘ir bir musibatga uchrasa, Alloh taolodan so‘rab, to‘g‘ri sof iymon-e’tiqod va ixlos bilan ma’nolarini tadabbur va tafakkur qilib, “Mulk” surasini kirq bir marta o‘qisa, inshaa Alloh, U zot yengillik beradi.
Va yana biror bir manzil-makonda yuqorida aytib o‘tilgan shartlarga amal qilgan holda ushbu sura o‘qilsa, u yerda, inshaa Alloh, fayz va baraka ziyoda bo‘ladi.
Agar kimki ko‘z og‘rig‘iga uchragan bo‘lsa, uch kun davomida har kuni uch marta “Mulk” surasini, bunda ham yuqorida aytib o‘tilgan shartlarga amal qilgan holda o‘qisa, insha Alloh, shifo topadi.
Toshkent islom instituti 4-kurs talabasi
Tojiddinov Abdus Somad Abdul Bosit
Fidokorona xizmat e’tirofsiz qolmaydi
O‘zbekiston musulmonlari idorasi tasarrufidagi "Ko‘kaldosh" o‘rta maxsus islom ta’lim muassasasida ko‘p yillar halol va fidokorona mehnat qilgan xodimamiz Ahmadjonova Nilufar Habibullayevnaning 50 yoshlik yubileyi munosabati bilan ta’lim muassasasi hamda kasaba uyushmasi tomonidan tadbir o‘tkazildi.
Tadbirda ta’lim muassasasi mudiri M. Erkayev, o‘quv ishlari bo‘yicha mudir o‘rinbosari N. Djalolov va manaviy-ma’rifiy ishlar bo‘yicha mudir o‘rinbosari, ta’lim muassasasi kasaba uyushmasi raisi A.G‘aniyev ishtirok etishdi. Muassasa mudiri M. Erkayev muhtarama opamizni shaxsan o‘zi tabriknoma bilan taqdirladi. Esdalik sovg‘alari bilan ham mukofotlandi.
Nilufar opa har kuni tong sahardan ilm dargohiga kelib, uning ozoda, shinam va pokiza bo‘lishiga yillarida sabr, ixlos va sadoqat bilan o‘z hissasini qo‘shib kelmoqda. Bunday kamtarin, ammo qadri baland mehnat barchamiz uchun ibrat namunasidir.
Payg‘ambarimiz sollallohu alayhi vasallam: "Pokizalik iymondandir", deb marhamat qilganlar. Ilm va marifat maskanining ta’minlash — talabalar ustozlarning tinch, toza va barakali ilm olishiga munosib hissa qo‘shadigan ezgu ishdir. Ana beminnat xizmat har qanday e’tirof va ehtiromga loyiqdir.
Bilim yurtimiz o‘z yordamga g‘amxo‘rlik qilishni muhim burch deb biladi. Zero, ilm dargohiga qilingan har bir xizmat — Allohning roziligi yo‘lidagi savobli amaldir. Kim ilm ahliga va ilm maskaniga xizmat qilsa, o‘sha ilmdan taralayotgan ezgulikning ajridan bahramand bo‘lishi umid qilamiz.
Muhtarama opamizga mustahkam sog‘lik-salomatlik, uzoq umr, oila baxti va ishlarida baraka tilaymiz. Alloh taolo halol mehnatlarini ajru mukofotsiz qoldirmasin, qilgan ezgu ishlari va mehnatlarining rohatini ko‘rish uzoq yillar davomida nasib etsin!
"Ko‘kaldosh" o‘rta maxsurs islom ta’lim muassasasi
matbuot xizmati
