To‘rt savolga bir javob
Kunlardan birida Hasan Basriy rahmatullohi alayhning oldilariga to‘rt kishi shikoyat qilib keldi. Ulardan biri qurg‘oqchilikdan, boshqasi qashshoqlikdan, uchinchisi befarzandlikdan, so‘nggisi esa hosilning yo‘qligidan qanday qutilish mumkinligi haqida maslahat so‘radi.
Shunda Hasan Basriy rahmatullohi alayh ularga yuzlanib:
- Tavba qiling, – dedi.
Haligi odamlar hayron bo‘lib:
- Ey solih, bizning muammolarimiz turlicha bo‘lsa, sen bizga bir xil maslahat berding”, – deyishdi.
So‘ngra Hasan Basriy rahmatullohi alayh Allohning kalomi Qur’oni karimning ushbu oyatini tilovat qildi: Bas, dedimki: «Robbingizdan mag‘firat so‘rangiz! Albatta, U (bandalariga nisbatan) o‘ta kechirimli Zotdir. (Shunda, ya’ni istig‘for aytsangiz) ustingizga osmondan (barakali) yomg‘ir yog‘dirur, sizlarga mol-dunyo, farzandlar bilan madad berur hamda sizlarga bog‘lar (barpo) qilur va sizlarga anhorlarni (ato) qilur (Nuh, 10-12).
Darhaqiqat, xolis tavba bandaga ko‘plab foyda keltiradi. Tavba qiluvchi uchun Alloh taolo bu dunyo va oxiratda ajrini tayyorlab qo‘ygan. Albatta, Alloh bandalariga nima yaxshi ekanini yaxshi biladi.
Davron NURMUHAMMAD
tayyorladi
Toshkent islom instituti o‘qituvchilari Al-Azhar universitetida malaka oshirdilar
Al-Azhar universiteti huzuridagi Xorijiy talabalar ta’limini rivojlantirish markazida Imom Buxoriy nomidagi Toshkent islom instituti professor-o‘qituvchilari uchun tashkil etilgan arab tili bo‘yicha malaka oshirish dasturi yakunlandi, deb xabar bermoqda “Dunyo” AA muxbiri.
Ikki hafta davom etgan o‘quv kursi arab tili o‘qituvchilarining kasbiy salohiyatini oshirish, zamonaviy pedagogik yondashuvlar va til o‘qitishning ilg‘or metodikalarini o‘rganishga qaratildi.
Dastur yakunida o‘tkazilgan tantanali marosimda markaz rahbari, professor-doktor Nahla as-Saidiy ishtirokchilarga sertifikatlarni topshirdi. U mazkur tashabbus Al-Azharning arab tilini xalqaro miqyosda ommalashtirishga qaratilgan loyihalari doirasida amalga oshirilganini ta’kidladi.
Tadbir davomida ta’lim sohasidagi hamkorlikni yanada kengaytirish masalalari muhokama qilindi. Nahla as-Saidiy Toshkent islom instituti bilan akademik aloqalarni mustahkamlash va qo‘shma dasturlarni amalga oshirish maqsadida hamkorlik memorandumini imzolash tashabbusini ilgari surdi.
O‘z navbatida, Toshkent islom instituti vakillari dastur yuqori saviyada tashkil etilgani uchun Al-Azhar universiteti rahbariyatiga minnatdorlik bildirdilar.
O‘zbekiston musulmonlari idorasi
Matbuot xizmati
- «
- »