Hashar mehr uyg‘otur
Nimaiki ishni elu yurt birdamlikda, hamjihatlikda bajarsa, shu ishning bajarilish jarayoni o‘z-o‘zidan bayramga aylanib ketadi.
Xalqimiz azaldan ozodalikni, sarishtalikni odat qilib kelgan. Chunki bunga muborak dinimiz buyuradi. Ana shunday pokizalik tadbirlari har bahorda umumxalq hashari ko‘rinishida bajarilgan va bu ezgu an’ana har yili davom etadi. Millatimizning ana shunday ajoyib odatlaridan kelib chiqib, O‘zbekiston Respublikasi Vazirlar Mahkamasining 2017 yil 2 martdagi farmoyishi e’lon qilindi. Ushbu farmoyish asosida mart-aprel oylari yurtimizda obodonlashtirish va ko‘kalamzorlashtirish oyligi, deb e’lon qilindi.
Bugun va ertaga ham respublikamizning barcha hududlarida umumxalq hashari bo‘lib o‘tadi. Shu jumladan, O‘zbekiston musulmonlari idorasi tasarrufidagi masjidlar, ziyoratgohlar va madrasalarda hashar ishlari uyushqoqlik bilan amalga oshirilmoqda. Unda gul ko‘chatlari, mevali va manzarali daraxtlar ekish, oqlash, butash, ko‘chalar, yo‘laklarni tartibga keltirish, qurilish va maishiy chiqindilarni to‘plash, belgilangan joyga olib chiqish, ariqlarni tartibga keltirish ishlari bajarilmoqda.
Masjid-madrasalarda hashar davom etmoqda.
O‘zbekiston musulmonlari idorasi
axborot xizmati
Misr OAV: O‘zbekiston muftiysining Rabiul avval oyiga bag‘ishlangan maqolalari ma’naviy yangilanish va Nabaviy sunnatga ergashishga chorlamoqda
Misrning nufuzli ommaviy axborot vositalarida O‘zbekiston muftiysi, shayx Nuriddin Xoliqnazarning Muhammad alayhissalom tavallud topgan muqaddas Rabiul avval oyiga bag‘ishlangan turkum maqolalari chop etildi, deb xabar bermoqda “Dunyo” AA muxbiri.
Xususan, Misrning “Al Gomhuria” nashri sahifalarida Rabiul avval oyi musulmonlar qalbida alohida o‘rin tutishi va Ummaning Payg‘ambarimizga bo‘lgan cheksiz muhabbati tufayli bu oy an’anaviy ravishda “Mavlid oyi” deb atalishi haqidagi fikrlar keng yoritilgan. Materialda Muftiyning ushbu davrni yangi ma’naviy ko‘tarinkilik bilan kutib olish, uni “Nabaviy siyrat oyi” va “Ibratli ummat oyi”ga aylantirish, ibodat, axloq va madaniyat masalalarida Payg‘ambarimiz o‘gitlarini amaliy o‘zlashtirishga qaratilgan da’vati alohida ta’kidlangan.
“Ya7dosal2an” nashri ham Islom e’tiqodining ajralmas qismi va chin imonning asosiy sharti bo‘lgan Payg‘ambarimizga bo‘lgan muhabbat sabablari haqidagi metodologik masalani qayd etgan. Maqolada sahobalarning sadoqatiga oid tarixiy misollar va guvohliklar keltirilgan.
“Aldawlanews” resursida Islomni amaliy tushunishning oliy manbai sifatida Nabaviy siyratni o‘rganishning ahamiyati ko‘rib chiqilgan bo‘lib, unda shunchaki sanalarni yodlash o‘rniga har bir tarixiy voqeadan sabr, adolat va rahmat kabi hayotiy saboqlarni chiqarish zarurligi urg‘ulangan.
“Al Diplomacy” nashri esa Payg‘ambarimizga bo‘lgan chin muhabbatning uch asosiy belgisiga — siyrat haqida tafakkur qilish, sunnatga so‘zsiz ergashish va ruhlar shifosi hamda jamiyatda axloqni mustahkamlashning ma’naviy asosi bo‘lgan ko‘p salavot aytishga e’tibor qaratdi.
“Sada El Balad” rasmiy resursi O‘zbekiston muftiysining Rabiul avval oyini oilalar va ta’lim muassasalari uchun keng qamrovli tarbiyaviy loyihaga aylantirish tashabbusini yoritib, musulmonlarni ushbu oyni yuksak axloq va jipslikning oliy namunasiga ergashish yo‘lidagi yangi debochaga aylantirishga chaqirdi.
“Eldameer” axborot portali ham O‘zbekiston muftiysining asarlarini atroflicha taqdim etib, Rabiul avval oyining chuqur mazmuni va sunnatga ergashish orqali ma’naviy poklanishning muhimligiga e’tibor qaratdi.
O‘zbekiston musulmonlari idorasi Matbuot xizmati
