Maqtanchoq o‘rdak
Bir ko‘lda maqtanchoq o‘rdak yashar ekan. Kunlarning birida u atrofdagi qurbaqalarga maqtanib shunday debdi: "Dunyoda mendek jonivor yo‘q. Chunki men ham suvda suzaman, ham quruqlikda yuraman, ham osmonda ucha olaman". Buni eshitib turgan qari toshbaqa unga: "Ko‘p maqtanaverma, hoy o‘rdak, sen suzishni bilganing bilan baliqdek suza olmaysan. Yugurganing bilan kiyikdek yugura olmaysan. Uchganing bilan burgutdek ucha olmaysan. Sen bularning hammasini bir o‘rdakdek qila olasan, xolos", debdi.
Ey inson, bilginki, har bir odamning o‘ziga yarasha qobiliyati bo‘ladi. Aqlli odam shu qobiliyatni rivojlantirib, undan o‘zi va boshqalar manfaat ko‘radi. Aqlsiz esa umr bo‘yi boshqalarga taqlid qilib, vaqtini zoye ketkazadi.
Akbarshoh RASULOV
Mirzaobodda 110 dan ortiq oilaning holidan xabar olindi
Sirdaryo viloyati Mirzaobod tumanidagi «Zomin» jome masjidida diniy soha xodimlari faoliyati samaradorligini oshirishga qaratilgan tashkiliy yig‘ilish bo‘lib o‘tdi.
Unda O‘zbekiston musulmonlari idorasining Sirdaryo viloyati vakilligi rahbariyati, tuman va shahar bosh imom-xatiblari, hudud masjidlari imomlari, otinoyilar, «Haj» ziyoratchilari hamda MFY raislari qatnashdi.
Uchrashuvda yurt tinchligini asrash, yosh avlodni milliy va diniy qadriyatlar ruhida tarbiyalash, oilalarda ijtimoiy-ma’naviy muhit barqarorligini ta’minlash hamda noxush holatlarning oldini olish kabi muhim masalalar muhokama qilindi.
Shuningdek, tadbir doirasida amaliy sa’y-harakatlar ham olib borildi:
-
Imom-xatiblar va otinoyilar mahallalardagi ehtiyojmand va ko‘makka muhtoj oilalar xonadonlariga tashrif buyurdilar.
-
Jarayonda jami 112 ta xonadon (imom-xatiblar tomonidan 83 ta, otinoyilar tomonidan 29 ta oila) holidan xabar olinib, ularning muammo va takliflari o‘rganildi.
-
Fuqarolarga ma’naviy-ma’rifiy dalda berilib, zarur amaliy yordamlar ko‘rsatildi.
O‘MI Sirdaryo viloyati vakilligi
Matbuot xizmati
