2016 yilning 18 yanvar kuni Farg‘ona viloyati imom-xatiblari va imom-noiblarining 2016 yil yakuniga bag‘ishlangan umumiy yig‘ilishi bo‘lib o‘tdi. Unda viloyat hokimi o‘rinbosari Qamariddin Imomov, O‘zbekiston musulmonlari idorasi Masjidlar bo‘limi mudiri Muhammadnazar Qayumov, ishtirok etdi.
O‘zbekiston musulmonlari idorasining Farg‘ona viloyatidagi vakili Tursunali Erbo‘tayev vakillik xodimlari va imom-xatiblarning 2016 yilgi faoliyati bo‘yicha umumiy hisobot berdi.
Yig‘ilishda o‘tgan davr mobaynida amalga oshirilgan ishlar va yo‘l qo‘yilgan kamchiliklar tanqidiy ko‘rib chiqildi. Jumladan, 2016 yilda ish faoliyati, ma’naviy-ma’rifiy tadbirlar va ommaviy axborot vositalaridagi chiqishlar bo‘yicha kamchilik va sustkashlikka yo‘l qo‘ygan xodimlarga nisbatan birma-bir qattiq tanbeh berilib, kelgusida o‘z vazifasini suiiste’mol qilgan xodimlarga qattiq intizomiy chora ko‘rish va hatto vazifasidan ozod etilish to‘g‘risida ogohlantirildi.
Imom-xatiblarga OAVlarda yoshlarning har xil zararli oqimlar ta’siriga tushib qolishini oldini olishga qaratilgan maqolalarni gazeta, jurnal va internet saytlarida muntazam yoritib borish, kitobxonlikni oshirish shu bilan birga vakillik tasarrufidagi barcha masjidlarda obodonlashtirish ishlarini olib borish, namozxonlar uchun qulay sharoitlar yaratish hamda yong‘in xavfsizligi choralarini kuchaytirish bo‘yicha zaruriy ko‘rsatmalar berib o‘tildi.
Yig‘ilishda kelgusida bajarilishi lozim bo‘lgan ishlar yuzasidan tadbirlar rejasi belgilab olindi.
Yig‘ilish yakunida 2016 yilda samarali mehnat qilgan, diniy sohada namunali xizmat qilgan, shuningdek, “Hidoyat” jurnali va “Islom nuri” gazetasiga obuna bo‘lishda faollik ko‘rsatgan fidoiy imom-xatiblar “Maqtov yorlig‘i” va esdalik sovg‘alari bilan taqdirlandilar.



O‘zbekiston musulmonlari idorasi
Masjidlar bo‘limi
Muqaddas Haj ibodatini ulug‘ vazifalar va go‘zal amallar bilan ado etgan qashqadaryolik ziyoratchilarning dastlabki guruhlari yurtimizga sog‘-omon yetib kelishdi. Islom arkonlarini bajarib, yuzlarida nur, qalblarida shukronalik bilan qaytgan hojilarni xalqaro aeroportda ularning yaqinlari, keng jamoatchilik vakillari va nuroniylar katta xursandchilik bilan samimiy kutib oldilar.
Muqaddas zamindan qaytgan ziyoratchilar Haj safari davomida qalblaridan kechgan unutilmas ma’naviy kechinmalari va taassurotlari bilan o‘rtoqlashdilar. Hojilar tashkiliy ishlarning yuqori darajada bo‘lganini, ziyoratchilarga ko‘rsatilgan alohida g‘amxo‘rlik va yaratilgan shart-sharoitlar uchun davlatimiz rahbariga hamda soha mutasaddilariga o‘zlarining cheksiz minnatdorchiliklarini bildirdilar.
Kamol hoji bobo To‘rayev, ziyoratchi: — Muqaddas Ka’batulloh poyida turib, qalbimizdagi eng ezgu tilaklar qatorida yurtimiz tinchligi, xalqimiz farovonligi va diyorimiz osoyishtaligini so‘rab duolar qildik. Mamlakatimiz ravnaqi yo‘lida xizmat qilayotgan Yurtboshimizning sog‘liq-omonliklarini, boshlagan xayrli va islohotli ishlariga Yaratgandan ulkan zafarlar tiladik. Ko‘rsatilgan e’tibordan boshimiz ko‘kka yetdi.
Madinai munavvara va makkai mukarramadagi tabarruk maskanlarda, xususan, Arafot va Mino vodiylarida qilingan duolarda yurt tinchligi va el osoyishtaligi bosh mavzu bo‘lgan.
Qashqadaryolik hojilarning tinch-omon qaytib kelishi nafaqat ularning oila a’zolari, balki butun viloyat ahli uchun katta ma’naviy quvonch baxsh etdi.
Alloh taolo barcha hojilarimizning hajlarini mabrur, duolarini mustajob aylasin!
Qashqadaryo viloyati vakilligi
Matbuot xizmati