Olamlarga rahmat Payg‘ambar
Rasululloh (sallollohu alayhi va sallam)ning muborak hayotlari, sunnatlari va yuksak odoblaridan namuna olish, Ul zotga munosib ummat bo‘lish istagida 19 dekabr kuni “Xadichai Kubro” ayol-qizlar bilim yurtida “Olamlarga rahmat Payg‘ambar” shiori ostida mavlid tadbiri bo‘lib o‘tdi. Tadbir Qur’on tilovati va salavot bilan boshlandi.
Rasululloh (sollallohu alayhi va sallam)ning xulqlari, siyratlari talaba qizlar tomonidan yoritib borildi. Olamlarga rahmat Payg‘ambarimizning xulqlari, go‘zal sunnatlariga ergashgan insonlarning hayotlarini tarixiy voqealar asosida ijro qilib berishdi. Xususan, Salmon Forsiy (raziyallohu anhu)ning Islom diniga kirishi, haq din yo‘lida mashaqqat chekkanlari, Ahli Kitoblardan bo‘lmish yahudiylarning Tavrotda kelgan Rasulullohning habarlarini berkitishlari, ammo Abdulloh ibn Salom bor haqiqatni aytib musulmon bo‘lishi, Oxiri zamon payg‘ambarining chiqish vaqti yaqinlashganda xazrajliklar va yahudiylar Payg‘ambar bizdan chiqadi deya qattiq nizolashishi, va nihoyat risolat nuri porlab, butun olamni munavvar aylagani, Makka mushriklari, ayniqsa, Abu Jahl boshchiligidagi Makka zodagonlarining Muhammad (sallollohu alayhi va sallam)ga dushmanchilik qilishi, Alloh O‘z payg‘ambari va uning sahobalari hamda do‘stlarini himoya qilib turishi talaba qizlar tomonidan katta mahorat bilan ijro qilindi.
Talaba qizlar har bir sahna ko‘rinishidan so‘ng, Rasulullohni madh etuvchi salavotlar kuylashib, kechaga yanada tarovat bag‘ish etishdi.
Tadbir nihoyasida ishtirokchilar esdalik sovg‘alar bilan taqdirlandi.
Nilufar SAIDAKBAROVA,
bilim yurti o‘qituvchisi
Banklar va mikromoliya tashkilotlari o‘z faoliyatini islomiy bank faoliyatiga o‘zgartirishi mumkin
Adliya vazirligi Mikromoliya tashkiloti va bank faoliyatini o‘zgartirish tartibi to‘g‘risidagi nizomga o‘zgartirish va qo‘shimchalarni davlat ro‘yxatidan o‘tkazdi (ro‘yxat raqami 3656-1, 01.08.2026 y.), xabar bermoqda huquqiyaxborot Telegram kanali.
Mazkur idoraviy hujjat "O‘zbekiston Respublikasining ayrim qonun hujjatlariga O‘zbekistonda islomiy bank faoliyatini joriy etishga qaratilgan qo‘shimcha va o‘zgartirishlar kiritish to‘g‘risida" 2026 yil 27 martdagi O‘RQ–1126-son Qonunga muvofiq ayrim kredit tashkilotlari faoliyatini o‘zgartirishning quyidagi tartib-taomillarini belgilaydi:
- mikromoliya tashkilotini faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini faqat islomiy bank faoliyatini amalga oshiruvchi bankka o‘zgartirish;
- faqat islomiy bank faoliyatini amalga oshiruvchi bankni faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini mikromoliya tashkilotiga o‘zgartirish;
- bankni faqat islomiy bank faoliyatini amalga oshiruvchi bankka o‘zgartirish.
Shuningdek, o‘z faoliyatini faqat islomiy bank faoliyatini amalga oshiruvchi bankka o‘zgartirishga faqat islomiy bank faoliyatini amalga oshiruvchi mikromoliya banki haqli.
Mikromoliya bankini davlat ro‘yxatidan o‘tkazish va bank faoliyatiga doir tegishli litsenziya (litsenziyalar) olish uchun nogironligi bo‘lgan shaxslar uchun mikromoliya banki binolarida shaharsozlik normalari va qoidalarida belgilangan talablarga muvofiq qulay shart-sharoitlar yaratilganligi bo‘yicha Qurilish va uy-joy kommunal xo‘jaligi sohasida nazorat qilish inspeksiyasining xulosasi mavjud bo‘lishi kerak.
Tashabbus Fors ko‘rfazi mamlakatlaridan investitsiyalarni jalb qilishga qaratilgan bo‘lib, dastlabki hisob-kitoblarga ko‘ra, ushbu chora-tadbirlarni amalga oshirish iqtisodiyotga depozitlar va to‘g‘ridan to‘g‘ri investitsiyalar ko‘rinishida taxminan 1 milliard dollar jalb qilishi mumkin. Mutaxassislarning prognozlariga ko‘ra, 2035 yilga borib O‘zbekiston ushbu tizim ishga tushirilgandan beri dunyoda islom moliyasining eng tez o‘sishini namoyish etadi.
O‘zbekiston musulmonlari idorasi Matbuot xizmati
