“3 dekabr – Xalqaro nogironlar kuni” munosabati bilan 2016 yil 30 noyabr kuni Qarshi shahridagi “Ayollar maslahat markazi”da markaz rahbari O. Anorova, viloyat Ma’naviyat targ‘ibot markazi rahbari L. Saodatova, “Mahalla” xayriya jamoat fondi Qarshi shahar bo‘limi xodimasi Yu. Allayeva, viloyat Tadbirkor ayollar uyushmasi rahbari O. Ochilova, O‘zbekiston musulmonlari idorasining Qashqadaryo viloyati vakilining xotin-qizlar masalalari bo‘yicha yordamchisi Sh. Karomova va madaniyat xodimlari hamda mahallalardagi kam ta’minlangan oilalar ishtirokida tadbir bo‘lib o‘tdi.

Unda Qashqadaryo viloyati vakilining xotin-qizlar masalalari bo‘yicha yordamchisi Sh. Karomova so‘zga chiqib, “Tinchlik – oliy ne’mat” mavzuida ma’ruza qilib, mahallalardagi kam ta’minlangan oilalarga moddiy va ma’naviy yordam ko‘rsatish, nogiron, boquvchisini yo‘qotganlar holidan xabar olish ulkan savob ekanini oyat, hadis va hayotiy misollar bilan yoritib berdi.

Tadbir so‘ngida O‘zbekiston musulmonlari idorasining Qashqadaryo viloyatidagi vakilligi tomonidan 12 nafar imkoniyati cheklangan, boquvchisini yo‘qotgan, kam ta’minlangan oilalarga moddiy-xayriya yordamlari ko‘rsatildi.

Bekmurod SAHRIYEV,

O‘zbekiston musulmonlari idorasining

Qashqadaryo viloyati vakilligi mas’ul xodimi