O'zbekistonning turizm salohiyatini taqdim etish maqsadida Yekaterinburgda Bosh konsulxona tomonidan tadbir tashkil etildi, deb xabar bermoqda «Dunyo» AA muxbiri.
Unda Sverdlovsk viloyati hokimiyati mutasaddilari, Rossiya TIVning Uraldagi vakilining o'rinbosari, Ozarbayjon, Frantsiya, Qirg'iziston va Tojikistonning Yekaterinburgdagi Bosh konsullari va diplomatlari, shuningdek, Dog'iston, Ingushetiya, Checheniston hukumatlarining Uraldagi doimiy vakillari, o'zbek diaspora faollari hamda vatandosh talabalar ishtirok etdilar.
Tadbir davomida ishtirokchilarga O'zbekistonning ziyorat turizmi sohasidagi sayyohlik salohiyatini ochib beruvchi videofil'm va taqdimot namoyish etildi. Shuningdek, taqdimot davomida ishtirokchilar islom tsivilizatsiya rivojiga ulkan hissa qo'shgan buyuk allomalarimiz haqida ma'lumot oldilar.
Shu bilan birga, mehmonlarga o'zbekistonlik hunarmandlar tomonidan ishlab chiqarilayotgan dekorativ-amaliy san'at mahsulotlari, mamlakatimizdagi gastronomik turizmning o'ziga xos xususiyatlari haqida so'zlab berildi.
Ishtirokchilarda respublikamizning ziyorat turizmi salohiyati taqdimoti katta taassurot uyg'otdi. Jumladan, Boshqirdistonning Chelyabinsk viloyatidagi sobiq doimiy vakili, Chelyabinsk viloyat televideniyasi «OTV» rahbarining o'rinbosari A.Habibullin O'zbekiston zaminida tug'ilib o'sgan ulamolar islom tsivilizatsiyaciga o'zlarining munosib hissalarini qo'shganliklarini alohida ta'kidlab, ishtirokchilarni Imom Buxoriy yurtini ziyorat qilishga chaqirdi.

O'zbekiston musulmonlari idorasi Matbuot xizmati