Har kim mehr va e’tibor og‘ushida
O‘zbekiston Respublikasi Konstitutsiyasining 24 yilligi hamda 3 dekabr – «Xalqaro nogironlar kuni» munosabati bilan, joriy yilning 24 noyabr kuni, Toshkent shahar Yunusobod tumani bosh imom xatibi Rahmatulloh Sayfuddinov rahbarligida, homiylar ishtirokida, Olmazor tumanida joylashgan «Muruvvat» nomli 1-son internat nogiron bolalar uyida mehrga muhtoj bolalar holidan xabar olinib, dasturxon atrofida xayriya tadbiri o‘tkazildi.
Xayriya tadbirini tashkil etishdan asosiy maqsad joriy yilning «Sog‘lom ona va bola yili» deb e’lon qilinishi munosabati bilan, mehr va muruvvatga tashna qalb egalari – imkoniyati cheklangan bolalarni ma’naviy va moddiy qo‘llab quvvatlash, ularning holidan xabar olish, ehtirom bildirish, ko‘nglini ko‘tarish, xursandchilik va yuqori kayfiyat shu bilan birga ularga xamisha e’zozda ekanliklarini xis qilish tuyg‘ularini baxsh etish ko‘zlandi.
Tadbirda «Mirza Yusuf» jome masjidi imom xatibi Rahmatulloh Sayfuddinov, masjid xodimlari va 1-son internat uyi ishchi xodimlari ishtirok etdilar. Yig‘ilganlar uchun bayram dasturxoni yozilib, milliy taomimiz bo‘lgan osh tarqatildi.
Tadbir boshida Rahmatulloh Sayfuddinov so‘z olib, yig‘ilganlarni O‘zbekiston Respublikasi Konstitutsiyasining 24 yilligi hamda 3 dekabr – «Xalqaro nogironlar kuni» munosabati bilan muborakbod etib, bu joyda xizmat qilayotgan, nogiron bolalarga o‘z mehrini ulashayotgan tarbiyalovchilarga alohida minnatdorchilik bildirib, bu sharafli va savobli xizmat ekanligini ta’kidlab o‘tdi.
So‘ngra Qur’oni karim tilovat qilinib, mehrga muhtoj bolalar haqiga duolar qilindi.
Muruvvat uyi murabbiy va tarbiyalanuvchilari ushbu tashabbus uchun o‘zlarining chuqur minnatdorchiliklarini bildirdilar.
Adham DO‘SMATOV
Toshkent islom universiteti magistranti
«Mirza Yusuf» jome masjidi imom-noibi
O‘zbekiston turistik kompaniyalari Ar-Riyozdagi xalqaro ko‘rgazmada ishtirok etdi
Saudiya Arabistoni poytaxtida “WTM Spotlight Riyadh 2026” xalqaro turistik ko‘rgazmasi bo‘lib o‘tdi. Unda O‘zbekiston turizm industriyasi vakillari ishtirok etdi, deb xabar bermoqda “Dunyo” AA.
Mamlakatimiz turistik salohiyatini «Asialuxe Travel», «Zamin DMC» va «Bazar Travel» kompaniyalari namoyish etdi. Ular ko‘rgazmaning ishbilarmonlik dasturida faol ishtirok etib, Saudiya Arabistoni hamda boshqa xorijiy davlatlar turizm sohasi vakillari bilan bir qator samarali uchrashuvlar o‘tkazdilar.
“WTM Spotlight Riyadh” Saudiya Arabistoni turizm bozorining xalqaro hamkorlar bilan o‘zaro aloqalari uchun asosiy professional maydonlardan biriga aylandi. Ko‘rgazma turoperatorlik biznesi, qabul qiluvchi kompaniyalar, mehmonxona sektori, aviatsiya tarmog‘i, turistik texnologiyalar va industriyaning boshqa yo‘nalishlari vakillarini birlashtirdi. Tadbirda mintaqaviy va xalqaro tashrif buyuruvchilar, 450 dan ortiq eksponentlar hamda 30 dan ortiq mamlakat vakillari qatnashdi.
Uch kun davomida o‘zbekistonlik kompaniyalar vakillari saudiyalik turoperatorlar, turistik agentliklar va bozorning boshqa ishtirokchilari bilan muzokaralar o‘tkazdilar. Muloqotlarda sheriklik dasturlarini rivojlantirish, Saudiya Arabistonidan O‘zbekistonga sayyohlar oqimini oshirish hamda yangi qo‘shma turistik mahsulotlarni shakllantirish imkoniyatlari muhokama qilindi.
O‘zbekistonni madaniy-ma’rifiy, oilaviy, premium va individual turizm uchun jozibador yo‘nalish sifatida targ‘ib qilishga alohida e’tibor qaratildi. Saudiyalik hamkorlarga Samarqand, Buxoro, Xiva, Toshkent va mamlakatimizning boshqa hududlarining turistik imkoniyatlari, Buyuk ipak yo‘lining tarixiy merosi, zamonaviy mehmonxona infratuzilmasi, milliy taomlar hamda individual va guruhli turistik dasturlarni tashkil etish imkoniyatlari namoyish etildi.
O‘zbekiston turizm tarmog‘i vakillari, shuningdek, saudiyalik hamkorlar bilan sayyohlarni kutib olishni tashkil etish, Ko‘rfaz mamlakatlaridan keluvchi sayohatchilarning afzalliklarini hisobga olgan holda ixtisoslashtirilgan yo‘nalishlarni ishlab chiqish hamda Saudiya Arabistoni bozorida O‘zbekistonning turistik salohiyatini yanada targ‘ib qilish masalalarini muhokama qildilar.
O‘zbek turistik kompaniyalarining “WTM Spotlight Riyadh 2026” ko‘rgazmasidagi ishtiroki podshohlik turistik biznesi vakillari bilan bevosita aloqalarni kengaytirish va hamkorlikning yangi yo‘nalishlarini izlash uchun qo‘shimcha imkoniyat bo‘ldi.
O‘zbekiston musulmonlari idorasi Matbuot xizmati
