Hamma otalar ham qizlarini yaxshi ko'rishadi, faqat buni qizlariga ochiq aytishmaydi. Men esa qizimga uni yaxshi ko'rishimni oshkora aytishni yaxshi ko'raman. Unga tabassum qilib, qulog'iga “Seni yaxshi ko'raman bolam” deb shivirlayman. Qizim bundan juda xursand bo'lib ketadi.

Bu ishni qizim 5 yoshligida boshlagan bo'lsam, bugun mana 10 yil vaqt o'tdi. Qizim 15 ga to'ldi. Lekin har safar bu gapni eshitganida o'zgacha sevinadi. Ko'pincha bu gapim xafa bo'lib o'tirgan qizimning kayfiyatini ko'tarib yuborishda qo'l keladi. Ayniqsa onasidan gap eshitgan paytlari o'zi oldimga kelib “Dada, menga aytadigan gapingiz yo'qmi?” deb jilmayadi. “Ha, bor, qizim” deb yana uni yaxshi ko'rishimni aytaman.

Ota erkak kishi bo'lsa ham, oilada farzandlariga, ayniqsa, gulg'unchadek o'sayotgan qizlariga o'z muhabbatini izhor qilib turishi, ularga bo'lgan sevgisi faqat qalbida qolib ketmasligi kerak. Bu narsa qizlarning mehrga to'yib o'sishlarini ta'minlaydi.

Doktor Abdulloh Muhammad Abdulmu'tining
"Farzand tarbiyasida 700 ta saboq" kitobidan
G'iyosiddin Habibulloh, Kamronbek Islom tarjimasi.