Bilim yurtida “Quvnoqlar va zukkolar”
Istiqlol tufayli yurtimizda barcha sohalar taraqqiyotiga alohida e’tibor berildi. Qaysi jabhaga boqmang, ijobiy yangilanishlar, ulkan o‘zgarishlarning samaralarini ko‘ramiz. Shular qatorida diniy sohaga ham mustaqilligimizning dastlabki yillaridanoq juda katta e’tibor qaratib kelinmoqda. Buning birgina misoli tariqasida Bosh Qomusimiz bo‘lgan Konstitutsiyamizda ham o‘z aksini topgan, bundan tashqari O‘zbekiston Respublikasining birinchi Prezidenti I. Karimovning Farmoyishlariga binoan mana necha yildan buyon Qurbon va Ramazon hayit bayramlarini va eng asosiysi bo‘lgan ota-bobolarimizning azaliy orzusiga aylangan muborak haj ziyoratini ham emin-erkinlikda ado etib kelmoqda. Bularning barchasi mustaqillikning bizga bergan ulkan imkoniyati va Alloh taoloning bizga bergan inoyati deb bilamiz.
Shu asosda O‘zbekiston musulmonlari idorasining 2016 yil to‘rtinchi chorakka mo‘ljallangan ish rejasiga muvofiq, joriy yilning 29 oktyabr kuni “Muhammad ibn Ahmad al-Beruniy” o‘rta maxsus islom bilim yurti talabalari orasida «Diniy sohada mustaqillik yillarida erishilgan yutuqlarni yoritib beruvchi “Quvnoqlar va zukkolar” (KVN)» musobaqasi o‘tkazildi.
Tanlovni Qoraqalpog‘iston musulmonlari qoziyoti qozisi, “Muhammad ibn Ahmad al-Beruniy” o‘rta maxsus islom bilim yurti mudiri Shamsuddin Bahouddinov kirish so‘zi bilan ochib berdi va tanlov ishtirokchilariga omad tiladi.
Tanlovda bilim yurti 1-kurs talabalarining “Nihol” jamoasi, 2-kurs talabalarining “Yigitlar”, 3-kurs talabalarining “Quvnoq talabalar” jamoasi va 4-kurs talabalarining “Beruniy avlodlari” jamoalari ishtirok etishdi.Ular to‘rtta shart bo‘yicha o‘zaro bellashdilar.
Tanlovda Berdaq nomidagi Qoraqalpoq davlat universiteti, Ajiniyoz nomidagi Nukus davlat pedagogika institutidan kelgan bilim yurti o‘qituvchilari hamda ma’naviyat va ma’rifat ishlari bo‘yicha mudir o‘rinbosari, bilim yurti o‘qituvchilaridan iborat besh kishi tanlovga hakamlik qildi.
Birinchi shartda tanishtiruv (salomnoma) sharti bo‘lib, jamoalar o‘zlari jamoa nomi, unga berilgan ta’rif va jamoa a’zolari haqida qisqa ma’lumot berib o‘tdilar. Qo‘shimcha slayd hamda videorolik ishlaridan foydalanildi.
Ikkinchi shart “Internetdagi tahdidlardan himoya” kitobi asosida tayyorlangan tezkor savol-javob o‘tkazildi.
Uchinchi shartda jamoalar mustaqillik yillarida diniy sohadagi yutuqlarni yoritib beruvchi bannerlar, foto-videoslayd, plakatlar, she’riyat olami, ma’ruzalar bilan ishtirok etishdi.
To‘rtinchi shartda jamoalar uyga vazifa qilib berilgan “Dinning yoshlar turmushidagi tutgan o‘rni” mavzusi orqali ajoyib sahna ko‘rinishlarini ishtirokchilarga havola etishdi.
Qizg‘in va murosasiz kechgan bellashuv natijalariga ko‘ra, birinchi darajali diplom bilan 2-kurs talabalarining “Yigitlar” jamoasi, ikkinchi darajali diplom bilan 1-kurs talabalarining “Nihol” jamoasi, uchinchi darajali diplom bilan 3-kurs talabalarining “Quvnoq talabalar” jamoasi va “Eng faol ishtirok etgan jamoa” yo‘nalishi bo‘yicha 4-kurs talabalarining “Beruniy avlodlari” jamoasi taqdirlandilar. Shuningdek, ishtirokchilarga bilim yurti tomonidan qimmatbaho esdalik sovg‘alari topshirildi.
SALAMAT KUDAYBЕRGЕNOV,
“Muhammad ibn Ahmad al-Beruniy”
o‘rta maxsus islom bilim yurti o‘qituvchisi
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
