Farg‘ona viloyati Quvasoy shahridagi “Islom” jome masjidi...
Farg‘ona viloyatining Quvasoy shahri A.Navoiy ko‘chasida joylashgan “Islom” jome masjidi 1989-1993 yillar davomida hashar yo‘li bilan qurilgan. Adliya boshqarmasidan 1998 yil qayta ro‘yxatdan o‘tib, faoliyat yuritib kelmoqda.
Masjid binosi pishiq g‘ishtdan qurilgan bo‘lib, darvoza va uchta kichik eshikdan iborat. Masjid elektr energiya, tabiiy gaz va ichimlik suvi bilan to‘liq ta’minlangan. Masjid sakkizta bir-biriga tutash honaqohlardan iborat. Hozirgi kunda masjid hududida imom-xatib, imom noibi va hisobchi uchun xizmat xonalari, shuningdek, kutubxona, qorovulxona, oshxona va zamonaviy qulayliklarga ega tahoratxona mavjud. Hovli sahniga tungi yoritqich chiroqlari o‘rnatilgan.
Ushbu maskan namozxonlar uchun yetarli shart-sharoit va qulayliklar bilan ta’minlangandir.
Shuningdek, masjidda obodonlashtirish ishlari ham olib borilmokda, bir qancha mevali va manzarali daraxtlar, turli xil gul ko‘chatlari o‘tqazilgan.
Masjidda Buxoro shahridagi “Mir-Arab” o‘rta maxsus islom bilim yurtini tamomlagan Naimov Alisher imom-xatiblik vazifasida ishlab kelmoqda.
O‘MI Masjidlar bo‘limi
«HAJ – 2026» MAVSUMIDA FIDOIYLIK KO‘RSATGANLAR TAQDIRLANDI
Allohga hamdlar bo‘lsin, yurtdoshlarimizning bu yilgi haj ibodatlari ham yuqori saviyada, tartibli va muvaffaqiyatli o‘tdi. Shu munosabat bilan mavsum davomida kechani kecha, kunduzni kunduz demay sidqidildan xizmat qilgan ishchi guruhi, malakali shifokorlar hamda mohir oshpazlarni taqdirlashga bag‘ishlangan tadbir o‘tkazildi.
Bir piyola choy ustida tashkil etilgan yig‘in an’anaga muvofiq Qur’oni karim tilovati bilan boshlandi.
Yig‘ilganlarga mavsumning eng hayajonli va fidokorona lahzalari muhrlangan maxsus videorolik namoyish etildi.
Tadbirda dastlab Din ishlari bo‘yicha qo‘mita raisi Sodiqjon Toshboyev so‘zga chiqib, mavsum davomida ko‘rsatilgan fidokorlik uchun ishtirokchilarga minnatdorlik bildirdi.
Haj mavsumi davomida yurtimiz hojilari, ayniqsa, bu yil ilk bor “Prezident hojisi” sifatida borgan joriy etilgan 100 nafar fidoiy yurtdoshlarimiz Davlatimizning bevosita ko‘magi va g‘amxo‘rligini his qilib turganlari, ular uchun barcha shart-sharoitlar muhayyo etilganini alohida qayd etdi.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari o‘z nutqida bu yilgi haj safari Muhtaram Yurtboshimizning bevosita ko‘rsatmalari, mutasaddi tashkilotlarning hamkorlikdagi xizmati evaziga yangi bosqichga ko‘tarilganini e’tirof etdilar. Bu narsa, ayniqsa, Mino, Arafot, Muzdalifa va Jamarot maydonlarida ziyoratchilarning xavfsiz va tartibli harakatlanishi, ibodatlarini xotirjam ado etishlarida kuzatilganini ta’kidladilar. Shuningdek, hamyurtlarimizning haj ibodati ko‘tarinki ruhda o‘tgani Saudiya Arabistoni mutasaddilari tomonidan ham yuqori baholangani qayd etildi.
Shundan so‘ng «Haj-2026» mavsumida jonbozlik ko‘rsatgan Ishchi guruhi a’zolari, shifokorlar jamoasi hamda mohir oshpazlarga tashkilotchilarning tashakkurnomalari, esdalik hadyalari topshirildi.
O‘zbekiston musulmonlari idorasi
Matbuot xizmati
