“Yil imomi - 2016” ko‘rik tanlovining Toshkent viloyat bosqichi
“Yil imomi – 2016” ko‘rik tanlovining viloyat bosqichi g‘olibilari aniqlandi.
“Yil imomi – 2016” ko‘rik tanlovini o‘tkazish to‘g‘risidagi O‘zbekiston musulmonlari idorasining 2016 yil 15 apreldagi 01A/19 sonli buyrug‘i hamda Nizomidan kelib chiqqan holda viloyat vakilligi qoshida tashkil qilingan “Maxsus Hay’at” tomonidan 2016 yilning 22 avgust kuni Zangiota tumanidagi “Zangiota” jome masjid binosida shahar va tuman bosqichida g‘olib bo‘lgan imom-xatiblar o‘rtasida o‘tkazildi. Mazkur bosqichda jami 15 nafar imom-xatib ishtirok etdi.
Hakamlar imom-xatiblarni bilet savollariga javoblari, shuningdek, o‘z ustida ishlashi, izlanishi, OAVda dolzarb mavzularda chiqishlari, masjidda amalga oshirgan obodonlashtirish ishlari, imomning faoliyati davomida erishgan yutuqlari, ma’ruzalarining ta’sirchanligi va boshqa fazilatlarini inobatga olib, baholadilar.
Tanlov yakuniga ko‘ra 50 ballik tizimda Ohangaron tuman “Abduqaxxor Maxsum” jome masjidi imom-xatibi, Akmalov Abdulxakim Majitovich 45.4 balni qo‘lga kiritib 1-o‘rinni egalladi. Qibray tumani “Sa’dulla ota” jome masjidi imom-xatibi, Mirxamidov Obid Mirg‘ofir o‘g‘li 45 balni qo‘lga kiritib 2-o‘rinni egalladi. Zangiota tumani “Imomi A’zam” jome masjidi imom-xatibi, Shokirov Ilyos Abdisaidovich 44 balni qo‘lga kiritib 3-o‘rinni egalladi. Tanlov g‘oliblari – Ohangaron tumani “Abduqaxxor Maxsum” jome masjidi imom-xatibi, Akmalov Abdulxakim Majitovich tanlovning respublika bosqichiga ishtirok etish uchun yo‘llanma oldi.
O‘MI Toshkent viloyat vakilligi
24–29 avgust kunlari Toshkentda “Islom sivilizatsiyasi: yangi nigoh, yangi kashfiyotlar” mavzusida xalqaro mediaforum bo‘lib o‘tadi
24–29 avgust kunlari O‘zbekiston poytaxtida “Islom sivilizatsiyasi: yangi nigoh, yangi kashfiyotlar” mavzusida xalqaro mediaforum o‘tkaziladi, deb xabar bermoqda “Dunyo” AA.
Tadbirning asosiy qismi O‘zbekistondagi Islom sivilizatsiyasi markazida o‘tkaziladi. Unda xorijiy ommaviy axborot vositalari vakillari, xalqaro ekspertlar va media sohasi mutaxassislari jam bo‘ladi.
Forum dasturidan tantanali ochilish marosimi, yalpi majlislar, mavzuga oid media-ko‘rgazmalar, matbuot anjumanlari va ikki tomonlama uchrashuvlar o‘rin olgan. Sho‘ba yig‘ilishlari doirasida hujjatli kino va tarixiy xotira, nashriyot loyihalari, zamonaviy texnologiyalar, shuningdek, media sohasidagi xalqaro loyihalarni rivojlantirish masalalari muhokama qilinadi.
Bundan tashqari, O‘zbekiston talabalari uchun jahon media sanoatining yetakchi mutaxassislari ishtirokida mahorat darslari tashkil etiladi. Ishtirokchilar zamonaviy jurnalistika, media mahsulotlar yaratish va xalqaro axborot makonida samarali faoliyat yuritish borasida tajriba almashadi.
27 avgust kuni forum qatnashchilari uchun Samarqand shahriga sayohat uyushtiriladi. Dastur doirasida mehmonlar Imom Buxoriy majmuasini ziyorat qiladi va shaharning tarixiy-madaniy merosi bilan tanishadi. Shuningdek, Toshkent shahrida xorijiy OAV vakillari uchun maxsus media-tur o‘tkazilishi rejalashtirilgan.
Forum 28 avgust kuni yakuniy yalpi majlis va tantanali yopilish marosimi bilan o‘z ishini yakunlaydi. Xorijlik mehmonlar, O‘zbekiston davlat mustaqilligining 35 yilligiga bag‘ishlangan tadbirlarda ham ishtirok etadi.
O‘zbekiston musulmonlari idorasi Matbuot xizmati
