Shu yil 4 avgust kuni Saudiya Arabistonining Makka shahrida dunyoning 60 ta davlati vakillari ishtirokida Islom olami davlatlarining Islom ishlari va vaqflari vazirlarining “Mo‘tadillik tamoyillarini targ‘ib qilish va qadriyatlarni mustahkamlashda Islom ishlari va vaqflarining o‘rni” mavzusidagi IX xalqaro konferensiya o‘z ishini boshladi.

Mazkur konferensiyada O‘zbekiston delegatsiyasi sifatida  O‘zbekiston musulmonlari idorasi raisi o‘rinbosari Muhammadolim domla Muhammadsiddiqov va “Vaqf” xayriya jamoat fondi rahbari Isoxon domla Abdullayev ishtirok etmoqda.

    Islom ishlari va vaqflar vazirlarining joriy IX xalqaro konferensiyasi Saudiya Arabistoni Islom ishlari, da’vat va hidoyat vazirligi tomonidan tashkil etilmoqda.

    Anjumanning ko‘plab sessiyalari mavzulari umuminsoniy qadriyatlar va birgalikda yashash qadriyatlari, islom va musulmonlarga nisbatan nafratning namoyon bo‘lishi muammosi, ekstremizm, radikalizm va terrorizm ko‘rinishlariga qarshi kurashga oid  fatvolar berish va musulmon ulamolari malakasini oshirishdan iborat.    

    Barcha munozaralarning markaziy mavzusi diniy nutqni zamon talablariga mos ravishda yangilash, jumladan, fatvo berish jarayonida zamonaviy axborot vositalari va madaniy globallashuv sharoitida islomiy o‘zlikni anglashdan iborat. 

O‘zbekiston musulmonlari idorasi

Matbuot xizmati