Qoraqalpog‘iston musulmonlari qoziyoti qozisi Baxramaddin domla Razov hojilar va imom-xatiblar bilan birga “Yangi O‘zbekiston fidoyisi bo‘lib, ma’naviyat targ‘ibotchisiga aylanamiz” shiori ostidagi faoliyatni davom etish maqsadida yordamga muhtoj oilalar holidan xabar olish maqsadida Ellikqal’a tumanida xizmat safarida bo‘ldi.

Tuman bosh imomi Ismoil Atajanov va hojilar bilan “Ibn Sino” mahallasida yashovchi ijtimoiy himoyaga muhtoj va diniy oqim ta’siridagi oilalarning yashash sharoitlari bilan tanishdi. Ular bilan bilan mo‘minga hos fazilat va farzand tarbiyasi mavzusida suhbatlashish barobarida homiylar ko‘magida maktab sumkasi, daftar, qalam va oziq-ovqat mahsulotlari taqdim etilmoqda.

So‘ng soha mutasaddilari tumandagi “Abdulloh Norinjoniy” masjidida bo‘lib, obodonlashtirish va qurilish ishlarini ko‘zdan kechirdi. Shuningdek, bu yerdagi sharoitlar, namozxonlar uchun yangi tashkil qilingan kutubxona bilan tanishdi.

Safar davomida Baxramaddin domla Ellikqal’a tumanidagi “Sanoat saroyi”da “Aholi orasida aqidaparastlikning oldini olish” shiori ostida tashkil qilingan “Jaholatga qarshi – ma’rifat” mavzusidagi tadbirda ishtirok etdi.

Suhbat asnosida qozi domla islom – tinchlik dini, millatlararo totuvlik va diniy bag‘rikenglik haqida oyati karima va hadisi shariflardan misollar keltirib ma’ruza qildi.

Tadbirda Qoraqalpog‘iston Respublikasi Vazirlar Kengashi, Din ishlari bo‘yicha qo‘mitaning hududiy boshqarmasi vakillari, Nukus davlat pedagogik instituti professorlari, Ellikqal’a tumani aholisi, mahalla faollari, imom-xatiblar, otinoyilar ishtirok etdi.

Safar yakunida qozi domla tumandagi imom-xatib va imom-noiblar bilan uchrashib, sohaga tegishli topshiriqlar berdi.

Qoraqalpog‘iston musulmonlari qoziyoti