Ayni kunlarda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiliklaridagi bir guruh ulamolar Respublikamiz bo‘ylab xalqimiz vakillari ishtirokida ma’naviy-ma’rifiy tadbirlar, yuzma-yuz muloqotlar va jonli savol-javoblar o‘tkazmoqdalar. 

Shu yil 14-15 avgust kunlari Muftiy hazratlari Toshkent shahar Olmazor tumanidagi aholi vakillari bilan ma’rifiy uchrashuvlar o‘tkazdilar. 

Shayx Nuriddin Xoliqnazar hazratlari yig‘ilganlarga yurtimizda diniy sohada olib borilayotgan o‘zgarishlar, yangi ochilgan masjid-madrasalar, Qur’oni karim kurslari, haj-umra safarlaridagi qulayliklarni so‘zlash barobarida tinchlik-hamjihatlikning qadriga yetish, qarindoshlik aloqalarini mustahkamlash, yoshlarning ta’lim-tarbiyasiga e’tibor berish, ota-onaga xizmat qilish, birovning haqqidan qo‘rqish, amallarga riyo aralashtirmasdan xolis Alloh uchun qilish fazilati haqida ma’ruza qilib berdilar. 

Muftiy hazratlari Islom mohiyatini to‘g‘ri anglash, kishilar musulmon ummati sifatlariga munosib bo‘lishi, hadisi shariflarda bayon etilgan komil mo‘min fazilatlari bilan ziynatlanishi, har ishda mo‘tadillik, odamlar orasida salomni keng yoyish kabi dinimizning ezgu ta’limotlariga amal qilishga chaqirdilar. 

Mazkur ma’rifiy uchrashuv va to‘g‘ridan to‘g‘ri savol-javoblardan aholi o‘z minnatdorliklarini izhor etdi. 

O‘zbekiston musulmonlari idorasi
Matbuot xizmati