O'zbekistonda 2023 yili eng ko'p qo'yilgan ismlar
Mamalakatimizda 2023 yil davomida tug'ilgan bolalarga qo'yilgan eng ko'p ismlar top 10 taligi e'lon qilindi. Unda o'g'il bolalarga eng ko'p Muhammadali, qizlarga esa Soliha ismi qo'yilgan. Bu haqda Adliya vazirligi ma'lum qildi.
O'tgan yilda tug'ilgan 27 431 nafar o'g'il bolaga Muhammadali ismi qo'yilgan. Shuningdek, Mustafo (22 880), Abdulloh (18 116), Muhammad (17 025), Muhammadyusuf (13 774), Muhammadamin (12 450), Nurmuhammad (9 017), Muhammadjon (8 843), Imronbek (8 591) va Muhammadziyo (8 135) ismlari ketma-ketlik bo'yicha 10 talikdan joy olgan.
Qizlarga esa 2023 yilda eng ko'p Soliha ismi qo'yilgan (24 365) bo'lsa, keyingi qatorlardan Yasmina (19 911), Muslima (15 918), Hadicha (10 759), Imona (10 310), Shukrona (9330), Sumayya (9279), Ifora (7586), Sa'diya (6639) va Mubina (6558) ismlari o'rin olgan.
O'zbekiston musulmonlari idorasi
Matbuot xizmati
Mustaqillik bayrami arafasida Qashqadaryoda bosh imomlar yig‘ilishi bo‘lib o‘tdi
O‘zbekiston musulmonlari idorasining Qashqadaryo viloyati vakilligida shahar va tumanlar bosh imom-xatiblari ishtirokida yig‘ilish o‘tkazildi.
Tadbirni viloyat bosh imom-xatibi Rahmatillo domla Usmonov kirish so‘zi bilan ochib, yig‘ilganlarni yaqinlashib kelayotgan Mustaqilligimizning 35 yillik bayrami bilan samimiy muborakbod etdi. Uchrashuvda davlatimiz Rahbarining tegishli Farmoni bilan bir guruh diniy soha xodimlari «Imom Buxoriy» ordeni bilan taqdirlangani yurtimizda ma’naviy-ma’rifiy sohaga ko‘rsatilayotgan yuksak e’tibor va tarixiy voqea ekani alohida e’tirof etildi.
Yig‘ilishda «Yagona Vatan, yagona xalq bo‘lib, yangi hayot va kelajak yaratamiz!» ezgu shiori ostida vohada amalga oshirilayotgan xayrli ishlar, yoshlarni Vatanga sadoqat va milliy-diniy qadriyatlarga hurmat ruhida tarbiyalash borasidagi faoliyat sarhisob qilindi.
Shuningdek, tadbir davomida imom-xatiblarga quyidagi ustuvor vazifalar yuklatildi:
-
Ehtiyojmand, boquvchisini yo‘qotgan va yakka-yolg‘iz keksalar holidan muntazam xabar olish;
-
Oilalar totuvligini mustahkamlash va mahallalarda ijtimoiy-ma’naviy muhit barqarorligini ta’minlash;
-
Masjidlar, qadamjolar va qabristonlarni obodonlashtirish hamda tozalik tadbirlarida faollik ko‘rsatish.
Yig‘ilish yakunida diniy soha xodimlarining kelgusi faoliyatiga muvaffaqiyatlar tilandi.
O‘zbekiston musulmonlari idorasi
Qashqadaryo viloyati vakilligi
Matbuot xizmati
