Diniy idoraga martabali mehmonlar tashrif buyurdi
Joriy yilning 9 sentyabr kuni O‘zbekiston musulmonlari idorasi raisi o‘rinbosari, Toshkent islom instituti rektori, professor Muhammadolim domla Muhammadsiddiqov va Din ishlari bo‘yicha qo‘mita raisining birinchi o‘rinbosari Davron Maxsudov BMTning Aholishunoslik jamg‘armasi – UNFPA O‘zbekistondagi mas’ullari va Misrning O‘zbekistondagi elchisi hamda Al-Azhar majmuasi vakillari iborat martabali mehmonlar bilan uchrashuv o‘tkazdi.
Muloqot avvalida Muhammadolim domla Muhammadsiddiqov mehmonlarni tashrif bilan qutlash barobarida keyingi yillarda yurtimizda barcha yo‘nalishlar qatori diniy-ma’rifiy sohada ham katta ijobiy o‘zgarishlar bo‘layotgani, jumladan, fuqarolarga Qur’oni karim va tajvidni o‘rgatish ishlari tizimli yo‘lga qo‘yilgani, yangi diniy ta’lim muassasalari ochilayotgani, ulardagi fan dasturlari sifat va mazmun jihatdan takomillashtirilayotgani, ziyoratchilarimizni umraga cheklanmagan hisobda yuborish yo‘lga qo‘yilgani, haj safari kvotasi ham yildan-yilga oshirib borilayotganini alohida qayd etdi. Shuningdek, O‘zbekiston musulmonlari idorasi faoliyati haqida so‘zlab berdi.
Din ishlari bo‘yicha qo‘mita raisining birinchi o‘rinbosari Davronbek Maxsudov so‘nggi yillarda Prezidentimiz tashabbusi bilan mamlakatimizning yangi taraqqiyot davrida barcha islohotlar inson va uning qadrini yuksaltirishga qaratilgani, diniy-ma’rifiy jabhada ham ko‘lamli islohotlar amalga oshirilayotgani, xorijiy davlat va xalqaro tashkilotlar bilan samarali hamkorlik aloqalari yo‘lga qo‘yilgani, mazkur uchrashuv ham ana shu yo‘nalishda birgalikdagi yaqin aloqalar natijasi ekanini ta’kidladi.
Islom oliy ulamolar kengashi bosh kotibi, professor doktor Abbas Sho‘mon, Al-Azhar majmuasining Xalqaro islom aholishunoslik va tadqiqot Markazi direktori professor Jamoliddin Abdulsurur, Misr Arab Respublikasining O‘zbekistondagi elchisi Amira Fahmi xonim, BMTning Aholishunoslik jamg‘armasi – UNFPA O‘zbekistondagi doimiy vakili Nigina Abaszade samimiy qabul, xayrli tilak va manfaatli suhbat uchun tashakkur aytishdi.
Martabali mehmonlari o‘z so‘zi davomida yangilanayotgan O‘zbekistonda o‘zaro hamkorlikdagi xayrli ishlarni yanada rivojlantirishga imkoniyat va sharoitlar yaratilayotgani, kelgusida hamkorlikdagi dasturlarni amalga oshirishda zamonaviy axborot texnologiya va metodlardan foydalanish zarurligi, dasturlarning keng yoyilishi va amalga oshishida diniy soha vakillarining ahamiyati nihoyatda kattaligini qayd etdi.
Ma’lumot uchun, mazkur martabali mehmonlar shu kunlarda Toshkent shahrida bo‘lib o‘tayotgan “O‘zbekistonda ayollar huquqlariga oid islom ta’limoti me’yorlarini o‘rganishning nazariy-tadbiqiy jihatlari” mavzusidagi xalqaro o‘quv seminarda ishtirok etmoqda. 9 sentyabr kuni mazkur anjumanning ochilish marosimi bo‘lib o‘tdi. Unda O‘zbekiston musulmonlari idorasi raisi o‘rinbosari, Toshkent islom instituti rektori, professor Muhammadolim domla Muhammadsiddiqov ma’ruza bilan qatnashdi. O‘quv seminar 12 sentyabrgacha davom etadi.
O‘zbekiston musulmonlari idorasi
Matbuot xizmati
Qashqadaryoda imom va noiblar uchun navbatdagi qiroat mashg‘ulotlari boshlandi
O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining tashabbuslari bilan tizimda faoliyat yuritayotgan imom-xatiblar va imom noiblarining kasbiy mahoratini oshirish hamda Qur’oni karim qiroatini yanada mukammallashtirishga qaratilgan tizimli o‘quv mashg‘ulotlari davom etmoqda.
Mazkur loyiha soha xodimlarining nafaqat ilmiy salohiyatini yuksaltirish, balki tajvid qoidalarini amaliyotda go‘zal va bexato qo‘llash ko‘nikmalarini puxtalashga xizmat qilmoqda.
Reja asosida tashkil etilayotgan navbatdagi darslar bugun Qashqadaryo viloyatida yuqori saviyada o‘tkazilmoqda. Qur’on va tajvidni o‘rgatish hamda Masjidlar bilan ishlash bo‘limlari hamkorligida tashkil etilgan ushbu mashg‘ulotlarni malakali mutaxassisi – Mamasoliyev Samandar qori aka olib bormoqda.
Ushbu o‘quv jarayonidan ko‘zlangan asosiy maqsad — masjidlardagi qiroatlar sifatini yuqori bosqichga ko‘tarish va soha xodimlarining tajvid ilmi bo‘yicha nazariy hamda amaliy bilimlarini yanada mustahkamlashdir.
Bu kabi amaliy saboqlar imom-xatib hamda imom noiblarining ma’naviy va ilmiy rivojida muhim pog‘ona bo‘lib xizmat qiladi.
O‘zbekiston musulmonlari idorasi Matbuot xizmati
