Diniy idoraga martabali mehmonlar tashrif buyurdi
Joriy yilning 9 sentyabr kuni O‘zbekiston musulmonlari idorasi raisi o‘rinbosari, Toshkent islom instituti rektori, professor Muhammadolim domla Muhammadsiddiqov va Din ishlari bo‘yicha qo‘mita raisining birinchi o‘rinbosari Davron Maxsudov BMTning Aholishunoslik jamg‘armasi – UNFPA O‘zbekistondagi mas’ullari va Misrning O‘zbekistondagi elchisi hamda Al-Azhar majmuasi vakillari iborat martabali mehmonlar bilan uchrashuv o‘tkazdi.
Muloqot avvalida Muhammadolim domla Muhammadsiddiqov mehmonlarni tashrif bilan qutlash barobarida keyingi yillarda yurtimizda barcha yo‘nalishlar qatori diniy-ma’rifiy sohada ham katta ijobiy o‘zgarishlar bo‘layotgani, jumladan, fuqarolarga Qur’oni karim va tajvidni o‘rgatish ishlari tizimli yo‘lga qo‘yilgani, yangi diniy ta’lim muassasalari ochilayotgani, ulardagi fan dasturlari sifat va mazmun jihatdan takomillashtirilayotgani, ziyoratchilarimizni umraga cheklanmagan hisobda yuborish yo‘lga qo‘yilgani, haj safari kvotasi ham yildan-yilga oshirib borilayotganini alohida qayd etdi. Shuningdek, O‘zbekiston musulmonlari idorasi faoliyati haqida so‘zlab berdi.
Din ishlari bo‘yicha qo‘mita raisining birinchi o‘rinbosari Davronbek Maxsudov so‘nggi yillarda Prezidentimiz tashabbusi bilan mamlakatimizning yangi taraqqiyot davrida barcha islohotlar inson va uning qadrini yuksaltirishga qaratilgani, diniy-ma’rifiy jabhada ham ko‘lamli islohotlar amalga oshirilayotgani, xorijiy davlat va xalqaro tashkilotlar bilan samarali hamkorlik aloqalari yo‘lga qo‘yilgani, mazkur uchrashuv ham ana shu yo‘nalishda birgalikdagi yaqin aloqalar natijasi ekanini ta’kidladi.
Islom oliy ulamolar kengashi bosh kotibi, professor doktor Abbas Sho‘mon, Al-Azhar majmuasining Xalqaro islom aholishunoslik va tadqiqot Markazi direktori professor Jamoliddin Abdulsurur, Misr Arab Respublikasining O‘zbekistondagi elchisi Amira Fahmi xonim, BMTning Aholishunoslik jamg‘armasi – UNFPA O‘zbekistondagi doimiy vakili Nigina Abaszade samimiy qabul, xayrli tilak va manfaatli suhbat uchun tashakkur aytishdi.
Martabali mehmonlari o‘z so‘zi davomida yangilanayotgan O‘zbekistonda o‘zaro hamkorlikdagi xayrli ishlarni yanada rivojlantirishga imkoniyat va sharoitlar yaratilayotgani, kelgusida hamkorlikdagi dasturlarni amalga oshirishda zamonaviy axborot texnologiya va metodlardan foydalanish zarurligi, dasturlarning keng yoyilishi va amalga oshishida diniy soha vakillarining ahamiyati nihoyatda kattaligini qayd etdi.
Ma’lumot uchun, mazkur martabali mehmonlar shu kunlarda Toshkent shahrida bo‘lib o‘tayotgan “O‘zbekistonda ayollar huquqlariga oid islom ta’limoti me’yorlarini o‘rganishning nazariy-tadbiqiy jihatlari” mavzusidagi xalqaro o‘quv seminarda ishtirok etmoqda. 9 sentyabr kuni mazkur anjumanning ochilish marosimi bo‘lib o‘tdi. Unda O‘zbekiston musulmonlari idorasi raisi o‘rinbosari, Toshkent islom instituti rektori, professor Muhammadolim domla Muhammadsiddiqov ma’ruza bilan qatnashdi. O‘quv seminar 12 sentyabrgacha davom etadi.
O‘zbekiston musulmonlari idorasi
Matbuot xizmati
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati
