O'zbekistonlik mutaxassislar Malayziyada islom moliyasi bo'yicha malaka oshirmoqda
27 mart kuni O'zbekistonning Kuala-Lumpur shahridagi elchixonamiz Malayziya Yutara universiteti bilan hamkorlikda O'zbekistonning iqtisodiy, sarmoyaviy, ta'lim va turizm salohiyati bag'ishlangan qo'shma tadbir o'tkazildi. Unda Malayziya oliy ta'lim vaziri Mohamed Halid Nordin, Yutara universiteti rektori vazifasini bajaruvchi Shahimi Moxtar, ushbu davlat siyosiy, ilmiy-akademik va ishbilarmon doiralari hamda OAV vakillari ishtirok etdi. Bu haqda «Dunyo» axborot agentligi xabar bermoqda.
Tadbirda O'zbekistonda olib borilayotgan keng ko'lamli ishlar, O'zbekiston va Malayziya o'rtasidagi hamkorlikning hozirgi holati va istiqbollari bo'yicha batafsil axborot berildi.
Shuningdek, uchrashuvda Yutara universiteti rektori vazifasini bajaruvchi Shahimi Moxtar O'zbekiston Bank-moliya akademiyasi (BMA) bilan islom moliyasi bo'yicha mutaxassislarni tayyorlash sohasida o'rnatilgan hamkorlikni olqishladi va ushbu aloqalarni kelajakda yanada kengaytirishga qiziqish bildirdi.
Tadbir davomida Malayziya Yutara universiteti qoshidagi Islom biznes maktabi 10 kunlik maxsus islom moliyasi bo'yicha o'quv kurslarini muvaffaqiyatli tugatgan 21 ta BMA tinglovchilariga tegishli sertifikatlar topshirildi. Shuni ta'kidlab o'tish kerakki, joriy yilning boshidan jami bo'lib respublikaning 42 ta mutaxassislari Malayziyada islom moliyasi bo'yicha malakasini oshirdi.
Malayziya Yutara universitetining Islom biznes maktabi 2011 yilda tashkil etilgan bo'lib, u dunyoda birinchi bo'lib Universitetlar qoshidagi biznes maktablarni rivojlantirish xalqaro assosiatsiyasi (Association to Advance Collegiate Schools of Business) tomonidan ro'yxatga olingan Islom biznes maktabi hisoblanadi.
Tadbir yakunida joriy yil iyun' oyida Malayziya Yutara universiteti huzuridagi Islom biznes maktabi delegatsiyasining O'zbekistonga tashrifini amalga oshirish va respublika mutaxassislari uchun seminar hamda treninglar o'tkazish bo'yicha kelishuvlarga erishildi.
O'zbekiston musulmonlari idorasi Matbuot xizmati
“Uthaym” gazetasi: Madaniy merosni asrash Yangi O‘zbekiston taraqqiyotining muhim yo‘nalishiga aylangan
Shri-Lankaning “Uthaym” nashrida O‘zbekistonning boy tarixiy-madaniy merosi, uni asrab-avaylash va kelajak avlodlarga bezavol yetkazish borasida amalga oshirilayotgan ishlarga bag‘ishlangan maqola e’lon qilindi, deb xabar bermoqda “Dunyo” AA.
Materialda Yangi O‘zbekistonda milliy qadriyatlarni tiklash, madaniy meros obyektlarini muhofaza qilish, ilm-fan va ma’rifatni rivojlantirishga qaratilgan islohotlar yuksak baholangan.
Ta’kidlanganidek, so‘nggi yillarda O‘zbekistonda ma’naviy-ma’rifiy sohani tubdan takomillashtirish, xalqning ko‘p asrlik boy ilmiy-madaniy merosini o‘rganish hamda uni jahon hamjamiyatiga keng targ‘ib etish davlat siyosatining ustuvor yo‘nalishlaridan biriga aylandi.
Mamlakatda tarixiy obidalarni restavratsiya qilish, muzeylar va arxivlar faoliyatini modernizatsiya qilish, qo‘lyozmalarni asrab-avaylash va raqamlashtirish, milliy madaniy merosni xalqaro miqyosda targ‘ib qilishga qaratilgan tizimli ishlar amalga oshirilayotgani qayd etilgan.
Maqolada Prezident Shavkat Mirziyoyev tashabbusi bilan ilgari surilgan Uchinchi Renessans g‘oyasi mamlakat taraqqiyotining muhim strategik yo‘nalishi sifatida alohida e’tirof etilgan. Muallif fikricha, mazkur g‘oya nafaqat tarixiy merosni asrab-avaylash, balki ilm-fan, ta’lim, madaniyat va innovatsiyalarni uyg‘un rivojlantirish orqali mamlakatning intellektual va ma’naviy salohiyatini yuksaltirishga xizmat qilmoqda.
Uchinchi Renessans konsepsiyasi O‘zbekistonning buyuk ilmiy an’analarini qayta tiklash, yosh avlodni bilimli va vatanparvar etib tarbiyalash hamda mamlakatning xalqaro nufuzini yanada mustahkamlashga qaratilgan umummilliy dastur sifatida baholanmoqda.
Gazetaning yozishicha, O‘zbekistonda kechayotgan o‘zgarishlar faqat madaniy sohadagi islohotlar bilan cheklanmaydi. Ular mamlakatning ilmiy, ma’naviy va intellektual taraqqiyotini ta’minlashga qaratilgan uzoq muddatli strategiyaning ajralmas qismi hisoblanadi. Ilmiy muassasalar faoliyatini qo‘llab-quvvatlash, tarixiy manbalarni tadqiq etish, madaniy merosni muhofaza qilish va zamonaviy ta’lim tizimini rivojlantirish kabi yo‘nalishlar yagona maqsad — Yangi O‘zbekistonning mustahkam ma’naviy poydevorini yaratishga xizmat qilayotgani alohida qayd etilgan.
Maqolada Toshkent shahrida barpo etilgan O‘zbekiston Islom sivilizatsiyasi markazi faoliyatiga keng o‘rin ajratilgan.
Prezident Shavkat Mirziyoyev tashabbusi va g‘oyasi asosida barpo etilgan mazkur betakror majmua O‘zbekistonning madaniy va ilmiy siyosatidagi eng muhim istiqbolli loyihalardan biri bo‘ldi. Markazda VII asrga oid noyob Usmon Mus'hafi saqlanayotgani uning tarixiy ahamiyatini yanada oshiradi.
Shu bilan birga, bu yerda qo‘lyozmalarni ilmiy o‘rganish, restavratsiya qilish, arxiv materiallarini tizimlashtirish va zamonaviy texnologiyalar asosida raqamlashtirish uchun barcha zarur sharoitlar yaratilgan.
Gazetada O‘zbekistonning YUNЕSKO va boshqa xalqaro tashkilotlar bilan madaniy merosni muhofaza qilish sohasidagi hamkorligi, tarixiy obidalarni asrab-avaylash, ularni xalqaro turizm va ilmiy tadqiqotlar bilan uyg‘un rivojlantirishga qaratilgan sa’y-harakatlari haqida so‘z yuritilgan.
O‘zbekiston musulmonlari idorasi Matbuot xizmati
- «
- »