Ko‘rik-tanlovning respublika bosqichi g‘olibi aniqlandi
Qoraqalpog‘iston musulmonlari qoziyotiga qarashli masjidlarda xizmat qilib kelayotgan imom-xatib va imom-noiblari ishtirokida “Yil imomi –2024” ko‘rik-tanlovining respublika bosqichi bo‘lib o‘tdi. Unda qoziyot qozisi B.Razov, qoziyot xodimlari, Nukus Muhammad ibn Ahmad al-Beruniy madrasasi xodimlari, barcha masjid imom-xatiblari va imom-noiblari ishtirok etdi.
O‘zbekiston musulmonlari idorasi tarafidan har yili tashkillashtiriladigan “Yil imomi” ko‘rik-tanlovida ijodiy izlanishlari, xalqimizning turmush obodonligi va Islom dini rivojiga hissa qo‘shgan, shuningdek, imom-xatiblarning diniy va dunyoviy bilimlari, o‘z hududida olib borayotgan targ‘ibot ishlari, axborot vositalarida chiqishlari bo‘yicha faollik ko‘rsatgan, tanlovning birinchi bosqichida g‘olib bo‘lgan imom-xatib va imom-noiblar bellashdi.
Yakuniy natijalarga ko‘ra, Qo‘ng‘irot tumani “Mo‘lla Isxoq” jome masjidi imom-xatibi Altinbek Zinullayev ko‘rik-tanlovning ikkinchi bosqichi g‘olibi bo‘ldi. U Qoraqalpog‘iston musulmonlari qoziyoti tarafidan diplom va esdalik sovg‘alari bilan tag‘dirlandi va Toshkent shahrida bo‘lib o‘tadigan respublika bosqichiga yo‘llanma oldi.
Qoraqalpog‘iston musulmonlari qoziyoti
Matbuot xizmati
Xalo va istibro
Namozning maqbul bo‘lish shartlaridan biri tozalik va poklikdir. Namozxonning badani, libosi va namoz o‘qiydigan joyi har qanday najasdan pok bo‘lishi shart. Mazkur masalalarga oid turkum maqolalar nashrlarimiz sahifalarida ilgari ham berilgan edi. Avvalo, takror foydadan xoli emas, qolaversa, ko‘p yoshlarimiz namozxonlar safiga qo‘shilayotganini e’tiborga olib, tahorat va namozga oid masalalarni qayta yoritishga qaror qildik.
Inson xilqatan bir necha narsalarga mubtalodir. Aqli qusurli odam bu holni unutib, kibrlanadi. Inson mubtalo bo‘lgan narsalardan biri uning har kuni bir necha bor hojatga chiqishga majburligidir.
Dinimizda inson hayotining barcha holatlarining, jumladan, tahorat ushatishning ham odob va hukmlari bayon etilgan. Qanday joylarda tahorat ushatib bo‘lmaydi?
Qabriston, yo‘llarda, daraxtlar osti, hovuz, quduq, buloq, ariq va daryo qirg‘oqlari, tahorat olinadigan joyda; yer va devor yoriq-kovaklariga, jonivorlar inlari, shuningdek, shamolga qarab hojat chiqarib bo‘lmaydi.
Xalojoyga kirish va poklanish tartibi
Xalojoyga hojat tangligi kuchaymasidan avvalroq borish lozim. Xaloga oyat, hadis, Alloh taoloning va payg‘ambarlarning nomlari yozilgan narsalarni olib kirish mumkin emas. Ularni tashqarida qoldirish kerak. Xaloga boshyalang kirish makruh.
Xalo eshigiga yetgach, “Bismillah, Allohim, meni ifloslardan va ozor beruvchilardan asra”, deyiladi. Hojatxonaga chap oyoq bilan kirib, o‘ng oyoq bilan chiqiladi. Hojat joyiga yetmay, pastki kiyim yechilmaydi. Xaloda chap yelkani qibla tarafga qilib, avrat va iflos joylarga nazar qilmay, oyoqlar orasini keng tutib o‘tiriladi.
Hojatni tik turib, uzrsiz yalang‘ochlanib (yopiq joyda bo‘lsa ham), qiblaga yuzlanib yoki qiblaga orqa qilib chiqarish, yosh bolalarni ham mazkur holatlarda to‘sish tahrimiy makruhdir. Xaloda yozib-chizish, atrofga alanglash va badanni o‘ynash mumkin emas. Xaloda fiqh va o‘zga ilmlar haqida fikr yuritilmaydi, salomga va azonga javob qaytarilmaydi. Burun qoqilmaydi. Yo‘talmaslikka, tezroq bo‘shanishga harakat qilish zarur.
Hojat ushatilgach, erkaklar turmaslaridan, siydik yo‘lini orqadan uchiga qarab siqishlari kerak. Orqa yo‘l chap qo‘l bilan toza kesak, tosh, qiymati yo‘q eski latta yoki eski paxta yoki maxsus hojat qog‘ozi bilan artib tozalanadi.
Istibro nima va u qanday qilinadi?
Istibro – siydik yo‘lida bir tomchi ham qoldirmay tozalanish bo‘lib, erkaklar uchun vojib. Buning uchun kiyimni ko‘tarib hojat o‘rnidan turgach, peshob yo‘liga kesak tutib yurish yo silkinish yo yo‘talish kerak. Siydik yo‘lida hech narsa qolmaganiga to‘la ishonch hosil bo‘lgach, suv bilan tozalanishga o‘tiladi.
(Davomi keyingi sonda)
Muhammad SHARIF JUMAN
“Islom nuri” gazetasining 2026 yil 11-sonidan
http://hidoyatuz.taplink.ws
