Farg‘onada "Yil imomi — 2024" ko‘rik-tanlovining g‘olibi aniqlandi
Bugun, 12 sentyabr kuni Farg‘ona viloyati vakilligida O‘zbekiston musulmonlari idorasi tasarrufidagi masjidlar imom-xatiblari o‘rtasidagi «Yil imomi – 2024» ko‘rik tanlovining viloyat bosqichi bo‘lib o‘tdi. Tanlovning shahar va tuman bosqichida g‘olib bo‘lgan ishtirokchilar viloyat bosqichida bellashdilar.
Ishtirokchilar o‘zlari tanlagan biletdagi tafsir, tajvid, fiqh, aqoid, hadis va siyratga oid savollarga javob berdilar hamda faoliyatlariga doir amalga oshirgan ijodiy ishlarini taqdim qildilar. Ishtirokchilarning chiqishi hakamlar hay’ati tomonidan baholab borildi. Yakuniy natijalarga ko‘ra:
1-o‘rin Toshloq tumani «Burhoniddin Marg‘iloniy» masjidi imom-xatibi Inomjon To‘ychiyev;
2-o‘rin Uchko‘prik tumani «Qorayantoq» masjidi imom-xatibi Fazliddin Burhonov;
3-o‘rin Marg‘ilon shahar «Baraka» masjidi imom-xatibi Otabek Xolmurodov hamda O‘zbekiston tumani «Oqtepa» masjidi imom-noibi Akmalxon Habibullayevlarga nasib etdi.
Tanlovda birinchilikni egallagan Toshloq tumani «Burhoniddin Marg‘iloniy» masjidi imom-xatibi Inomjon To‘ychiyev «Yil imomi — 2024» ko‘rik tanlovining Respublika bosqichida ishtirok etish huquqini qo‘lga kiritdi.
Farg‘ona viloyati vakilligi hamda Alhidoya.uz sayti jamoasi barcha g‘oliblarni muborakobod etib, kelgusi faoliyatlarida muvaffaqiyat tilaydi.
Farg‘ona viloyati vakilligi Matbuot xizmati
Diniy ta’lim sohasida ilk bor Respublika anjumani bo‘lib o‘tadi
Joriy yilning 19-20 avgust kunlari O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani Islom sivilizatsiyasi markazida bo‘lib o‘tadi.
Davlatimiz Rahbari tomonidan har jabhada olib borilayotgan yangilanish va islohotlarga hamohang tarzda Diniy idora tarixida ilk bor o‘tkazilayotgan ushbu tadbirda jami 700 nafar pedagog va soha mutaxassisi, jumladan, 300 nafar ishtirokchi bevosita anjuman zalida, 400 nafar ishtirokchi esa hududlardan videoselektor orqali qatnashadi.
Anjumandan ko‘zlangan maqsad sohadagi istiqbolli rejalarni muhokama qilish, diniy ta’limda pedagogik va kasbiy mahoratni oshirish, ta’lim jarayoniga zamonaviy texnologiyalarni yanada keng tatbiq etish hamda diniy ta’limni yangi bosqichga olib chiqishdir.
Dastur doirasida soha rahbarlari ishtirokida tahliliy ma’ruzalar, taniqli professorlar tomonidan mahorat darslari, ilmiy-metodik mashg‘ulotlar bo‘lib o‘tadi. Shuningdek, ishtirokchilar O‘zbekiston musulmonlari idorasi, Islom sivilizatsiyasi markazi bilan yaqindan tanishib, Hazrati Imom majmuasidagi tarixiy qadamjo va obidalarni ziyorat qilishadi.
O‘zbekiston musulmonlari idorasi Matbuot xizmati