Bilimdon imomlar saralandi
Ko‘rik-tanlov
Mo‘min-musulmonlar so‘zi va amali bir-biriga uyg‘un insongagina ergashadi, uning gaplariga quloq soladi, aytganlarini bajari, hurmatini joyiga qo‘yadi.
Shu bois imom har doim aytganlariga, avvalo, o‘zi amal qiladigan, ma’rifatli, o‘z ustida tinimsiz ishlashi, sohaga doir yangiliklardan doimo xabardor bo‘lishi kerak.
Bunday darajaraga erishish uchun esa O‘zbekiston musulmonlari idorasi tizimida faoliyat yuritayotgan imom-xatiblar o‘rtasida an’anaviy tarzda o‘tkazib kelinayotgan «Yil imomi» ko‘rik-tanlovi muhim o‘rin tutadi.
Tanlovning shahar-tuman bosqichlarida g‘oliblikni qo‘lga kiritgan 22 nafar imom-domla Toshkent viloyati bosqichida qatnashdi.
«Zangiota» masjidida «Yil imomi» ko‘rik-tanlovining Toshkent viloyati bosqichi bo‘lib o‘tdi.
Qur’oni karim tilovati bilan boshlangan tadbirni Toshkent viloyati bosh imom-xatibi Jasurbek domla Raupov ochib berdi.
Ishtirokchilarning chiqishlari hakamlar hay’ati tomonidan baholab borildi.
Yakuniy natijalarga ko‘ra quyidagilar «Yil imom – 2024» tanlovining Toshkent viloyati bosqichi g‘olibi deb topildi:
I o‘rin: Bekobod tumani «Chanoq» jome masjidi imom-xatibi Yoqubjon domla Buxarboyev;
II o‘rin: Bo‘stonliq tumani «Mulla Po‘lat ota» jome masjidi imom-xatibi Ne’matulloh domla Isomov;
III o‘rinlar: Ohangaron shahar «Xonobod» jome masjidi imom-xatibi Abdulhakim domla Akmalov hamda Zangiota tumani «Mir Abdulla eshon» jome masjidi imom-xatibi Farrux domla Sultonov.
Tadbir so‘ngida g‘oliblar O‘MI viloyat vakilligi va «Vaqf» xayriya jamoat fondining viloyat filiali tomonidan diplom va esdalik sovg‘alari bilan taqdirlandi.
«Yil imomi–2024» ko‘rik-tanlovi viloyat bosqichida birinchi o‘rinni egallagan Bekobod tumani «Chanoq» jome masjidi imom-xatibi Yoqubjon domla Buxarboyev tanlovning respublika bosqichida qatnashadi.
Vakilimizga tanlovning respublika bosqichida muvaffaqiyat tilab qolamiz.
Toshkent viloyati vakilligi
Matbuot xizmati
Zeki Kaymaz: Kelgusi o‘n yil ichida O‘zbekistonni turkiy dunyoda yorqin yulduz sifatida ko‘raman
Turk tili instituti Ilmiy kengashi a’zosi, filolog olim, professor Zeki Kaymaz O‘zbekiston mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.
– Avvalo, O‘zbekiston xalqini istiqlolning 35 yilligi munosabati bilan chin ko‘ngildan tabriklayman. O‘ttiz besh yil oz vaqt emas. Men yuz yildan oshgan mustaqil Turkiya fuqarosi sifatida Sizlarga ham yana ko‘p asrlar mustaqillik shodiyonasini nishonlashingizni tilayman.
Tarixga nazar tashlasak, Markaziy Osiyo, xususan, O‘zbekiston bilan yaqin munosabatda bo‘lib kelganmiz. Ayniqsa, Turkiyadagi milliy ozodlik kurashi davrida bizga bu diyordan jo‘natilgan ko‘makni doimo katta minnatdorlik bilan yodga olamiz.
Qardosh o‘zbek xalqi biz uchun doimo yaqin birodar, qalin do‘st bo‘lib kelgan. O‘zbekistonning bugungi taraqqiyoti bizni juda mamnun qiladi. Ushbu zaminga har borganimda go‘zal va obod mamlakatni ko‘ramaz. Yurtingizda madaniyat va ma’rifat o‘choqlari bisyor. Albatta, bu tamaddun va sivilizatsiyaning ildizlari uzoq o‘tmishga borib taqaladi.
Markaziy Osiyodagi ilk o‘rta asrlardagi Birinchi renessans hamda Amir Temur asos solgan Ikkinchi renessans davrlarida bu zaminda buyuk sivilizatsiya shakllandi. Toshkentda bunyod etilgan Islom sivilizatsiyasi markazi, Samarqanddagi Imom Buxoriy majmuasi, Imom Moturidiy ziyoratgohi kabi madaniy-ma’naviy maskanlar islom olamida muhim ahamiyatga ega.
Geostrategik mavqei nuqtayi nazaridan, men kelgusi o‘n yil ichida O‘zbekistonni turkiy dunyo, xususan, Markaziy Osiyo davlatlari orasida yorqin yulduz sifatida ko‘raman.
Buning sabablari bor, albatta. Avvalo, mamlakatdagi kuchli iqtisodiyot. Qolaversa, chuqur ildizlarga ega bo‘lgan boy madaniyat va tarix. Turkiya bilan O‘zbekiston o‘rtasidagi mustahkam do‘stlik va yaqin hamkorlik aloqalari ham muhim ahamiyat kasb etadi.
Tilagim – do‘stlik rishtalarimiz yanada mustahkamlansin, davlatlarimiz o‘rtasidagi hamkorlik aloqalari yuqori darajaga ko‘tarilsin.
Yana bir bor mustaqillik bayrami bilan chin qalbimdan tabriklayman va o‘zbek xalqiga samimiy salomlarimni yo‘llayman.
O‘zbekiston musulmonlari idorasi Matbuot xizmati
