Qatardagi Qur’on musobaqalari sovrin va g‘oliblari soni ikki baravar oshirildi
Qatarning Vaqf va islom ishlari vazirligi “Shayx Jassim bin Muhammad bin Soniy” deb nomlangan milliy Qur’on musobaqasida ayollar va talabalar yo‘nalishlarida tub o‘zgarishlar kiritilishini e’lon qildi. Endilikda musobaqa sovrinlari va uning g‘oliblari sonini oshirdi.
IQNAning “Halalkhalij.com” nashriga tayanib xabar berishicha, Qatar Vaqflar va islom ishlari vazirligi Shayx Josim bin Muhammad bin Soniy Qur’oni karim musobaqalarida asosiy o‘zgarishlar, jumladan, hakamlar qo‘mitalari va ayollar testlarini ajratish, g‘oliblar soni va ushbu musobaqalarning moliyaviy mukofotlari qiymatini ikki baravar oshirishni e’lon qildi.
Bu haqda Shayx Josim Qur’oni karim musobaqasi qo‘mitasi rahbari Mallulloh Abdurrohman al-Jobir ma’lum qilib, bunday dedi: “Vaqflar vazirligining musobaqani yangi tahrirda o‘tkazish to‘g‘risidagi qarori ushbu tanlovning maqsadlariga erishish uchun faoliyat va yechimlar ko‘lamini kengaytirishda musobaqa tashkiliy qo‘mitasining nufuzini kuchaytirishga olib keladi”.
Al-Jobir bunga aniqlik kiritdi: “Musobaqa tashkiliy qo‘mitasi Qur’oni karimning ahamiyati va mavqeini inobatga olib, ushbu musobaqalar sohasini, ayniqsa, ayollar va qizlar toifasini sifat jihatidan o‘zgartirish, ayollar uchun bo‘limlarni to‘liq ajratishni maqsad qilgan hamda erkaklar ushbu musobaqalarning barcha bosqichlarida ayollar uchun imtihonlar bo‘yicha qo‘mita rahbarligida harakat qiladi. Boshqa tomondan tashkiliy qo‘mita ayollarning uchta asosiy nominatsiyasi bo‘yicha beshta g‘olibni taqdirlash to‘g‘risida qaror qabul qildi. Bundan tashqari, ushbu musobaqalarda erkaklar va ayollar uchun ajratilgan mukofotlar miqdori ikki barobarga oshirilib, maktab o‘quvchilari toifasi bo‘yicha birinchi marta Shayx Jassim Qur’oni karim musobaqasi boshlandi.
Qatarda yashovchi fuqarolar va muhojirlar qatnashishi mumkin bo‘lgan 30- Shayx Jassim Qur’oni karim musobaqasida qatnashishga ro‘yxatdan o‘tish shu oy boshida boshlanadi va yakuniy bosqich oktyabr oyida bo‘lib o‘tadi.
O‘zbekiston musulmonlari idorasi xodimi
Ilyosxon Ahmedov tayyorladi.
Buni shukr deb bo‘ladimi?
Bismillahir Rohmanir Rohiym
Behisob pul va boyliklarni chekish-ichish, kayfu safo uchun sarf qilish – Allohga shukr qilishmi?!
Yoshlik davrini zino va harom ishlar bilan o‘tkazish – Allohga shukr qilishmi?!
Telefon orqali o‘zgalarga zarar yetkazish, har xil bo‘lmag‘ur ishlarda foydalanish – Allohga shukr bo‘ladimi?!
Yeguliklarni chiqindi qutisiga tashlash, uvolni bilmaslik – Allohga shukr qilishmi?!
Zakotni o‘z vaqtida ado etmaslik, sadaqadan tiyilish – Allohga shukr qilish deganimi?!
Internetda foydasiz narsalar uchun vaqt ajratish, vaqtni bekorga zoye qilish – Allohning bergan ne’matlariga shukr qilishmi?!
Axir Alloh taolo bizlarga shukr qilishni va U Zotning fazlini e’tirof qilishga buyurgan-ku: «Bas, Meni yod etingiz, (Men ham) sizlarni yod eturman. Menga shukr qilingiz, noshukrchilik qilmangiz!»[1].
Qolaversa, Alloh taolo shukr qiluvchilarni azoblamasligi xabarini ham bergan: «Agar shukr qilsangiz va iymon keltirsangiz, Alloh sizlarni nega azoblasin?! Alloh shukrni qabul etguvchi va bilguvchi Zotdir»[2].
Shukr – Alloh taolo ato etgan ne’matlarning davomli bo‘lishining garovidir: «Yana Parvardigoringiz bildirgan (bu so‘zlar)ni eslangiz: “Qasamki, agar (bergan ne’matlarimga) shukr qilsangiz, albatta, (ularni yanada) ziyoda qilurman. Bordi-yu, noshukrchilik qilsangiz, albatta, azobim (ham) juda qattiqdir”»[3]. «...Agar shukr qilsangiz (va iymon keltirsangiz) U Zot sizlar uchun rozi bo‘lur...»[4].
Bu dunyoda borligimizga shukr qilish – ota-onalarimizga yaxshilik qilishimizdadir. Zero, Rasululloh sollallohu alayhi vasallam: “Allohning roziligi – ota-onaning rizosidadir” [5], deganlar.
Qarindoshchilik munosabatlarini yo‘lga qo‘yish, ular bilan bordi-keldi qilish, uzilgan rishtalarni tiklash ham Alloh bizga qarindosh, yaqinlar bergani ne’matining shukridir. Nabiy alayhissalom bu borada: “Rizqida kengchilik bo‘lishi, ajali ortga surilishi kimni xursand qilsa, qarindoshchilik aloqalarini bog‘lasin”, deganlar[6].
Sadaqa berish – Alloh bizni mol-dunyo bilan siylagani uchun shukr qilish demakdir. Sadaqa Alloh taoloning g‘azabini o‘chiradi. Nabiy alayhissalom: “Maxfiy qilingan sadaqa Yaratganning g‘azabini o‘chiradi. Qarindoshchilik aloqalarini bog‘lash umrni uzaytiradi. Yaxshilik qilish yomon o‘lim topishdan asraydi”, [7] deganlar.
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.
[1] Baqara surasi, 152-oyat.
[2] Niso surasi, 147-oyat.
[3] Ibrohim surasi, 7-oyat.
[4] Zumar surasi, 7-oyat.
[5] Ibn Hibbon rivoyati.
[6] Imom Buxoriy rivoyati.
[7] Imom Tabaroniy rivoyati.