O‘zbekiston elchisi Karomiddin Gadoyev mintaqa bilan savdo-iqtisodiy va turizm sohalaridagi aloqalarni yanada rivojlantirish maqsadida Malayziyaning Perlis shtatiga tashrif buyurdi, deb xabar bermoqda “Dunyo” axborot agentligi.

  Perlis – Malakka yarim orolida joylashgan, mamlakatning asosan musulmonlar istiqomat qiladigan davlatlaridan biri. Mintaqada qishloq va baliqchilik yuqori darajada rivojlangan, shuningdek, u Malayziyada shakarqamish va tabiiy kauchuk ishlab chiqarishda yetakchi sanaladi.

Tashrif doirasida O‘zbekistonning Malayziyadagi elchixona delegatsiyasini Malayziyaning Perlis sultoni Sayyid Sirojuddin Sayyid Jamolullayl qabul qildi.

 Uchrashuvda O‘zbekiston va Malayziya o‘rtasidagi munosabatlarning bugungi holati, istiqboldagi rejalari, o‘zaro manfaatli hamkorlikni yanada rivojlantirish istiqbollari yuzasidan fikr almashildi.

 Sulton Sirojuddin 2003 yilda Malayziya qiroli sifatida O‘zbekistonga davlat tashrifi bilan kelganini, O‘zbekiston taraqqiyoti bilan tanishganini iliqlik bilan esladi.

 Shuningdek, tashrif davomida ushbu davlat muftiysi Muhammad Asri Zaynul Obiddin bilan uchrashuv bo‘lib o‘tdi. Uchrashuvda O‘zbekiston va Malayziya o‘rtasida turizmni, jumladan, ziyorat turizmini rivojlantirish masalalari muhokama qilindi.

  Malayziya tomoni bu hamkorlik O‘zbekistonning sayyohlik salohiyati, boy tarixiy-madaniy merosini malayziyaliklar orasida targ‘ib qilishga katta hissa qo‘shadi, – deb ma’lum qildi.

  Tashrif yakunlari bo‘yicha Malayziya tomoni O‘zbekistonda qator loyihalarni amalga oshirishdan manfaatdor ekanligini bildirdi. Doimiy aloqalarni davom ettirish va o‘zaro manfaatli hamkorlik bo‘yicha takliflarni qo‘llab-quvvatlash bo‘yicha kelishuvga erishildi.

O‘zbekiston musulmonlari idorasi

Matbuot xizmati