Haqiqiy din qanday bo‘ladi?
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Nihoyat Makka fath qilindi. Unga o‘zligi qaytarildi. Tavhid qiblasi, mo‘minlar qalbining ma’shuqasi shirk botqog‘idan qutqarildi. Endi navbat butun arab jazirasini shirkdan qutqarishga kelgan edi.
Nabiy sollallohu alayhi vasalom islom arsloni Ali ibn Abi Tolib roziyallollohu anhuni chaqirdilar. U zotni qo‘shinga bosh qilib, Toy qabilasi buti Fulsni parchalagani yubordilar.
Hazrati Ali karramallohu vajhahu qo‘shin bilan borib yuklatilgan vazifani a’lo darajada bajarib asirlar bilan Madinaga qaytdilar. Asirlarni Rasululloh sollallohu alayhi vasallam nima qilish haqida mashvarat qilish uchun masjid oldida qo‘ydilar.
Ertasi kuni Rasululloh sollallohu alayhi vasallam masjidga kirayotganlarida u zotni asir ayollardan biri to‘xtatib dedi:
– Ey Muhammad! Agar mumkin bo‘lsa meni ozod qilsang. Arablar mendan kulishmasa yaxshi bo‘lar edi. Otam o‘ldi. Kelib-ketuvchilar to‘xtadi. Menga iltifot qil, Alloh ham senga iltifot qilsin! Otam qavmining sayyidi edi. U qiynalganlarga yordam qilar, jinoyat qilganlarni avf qilar, qo‘shnichilikni saqlar, sharafni himoya qilar, faqirlarni suyar, ularga taom berar, salomni tarqatar, yuki og‘irlarning yukini ko‘tarar, taqdir zarbalariga uchraganlarga yordam berar edi. Hojatini so‘rab kelgan biror kishini noumid qilgan emas. Men Hotam Toiyning qizi Saffona bo‘laman.
Rasululloh sollallohu alayhi vasallam unga dedilar:
– Bular haqiqiy musulmonning sifatlaridir. Agar otang musulmon bo‘lganida biz Allohdan unga rahm qilishini so‘ragan bo‘lar edik.
So‘ngra sahobalarga qarab:
– Uni qo‘yib yuboringlar. Uning otasi go‘zal axloqqa da’vat qilar edi, dedilar.
Yuqoridagi sifatlar haqiqatdan ham musulmonlarning sifati. Biz e’tibor beradigan joy mana shu yer.
Haqiqiy din masjidda emas, joynamoz ustida ham emas.
Haqiqiy din tijorat va mansabdagi omonatdorlikda.
Haqiqiy din ota-ona oldidagi kamtarlikda.
Haqiqiy din aka-ukalar va opa-singillarga qilinadigan yaxshilikda.
Haqiqiy din jufti halolning aziyatiga sabr etish va farzandlarga rahm qilishda.
Haqiqiy din qo‘shnilaring bilan qilinadigan muomalada.
Haqiqiy din bemorga pul yig‘ilganida baxillik qilmaslikda.
Haqiqiy din birov g‘iybat qilinganda g‘iybatchilarga qo‘shilib ketmaslikda.
Haqiqiy din odamlarning aybini yashirishda.
Haqiqiy din ishonib aytilgan sirni saqlay olishda.
Tavhid, namoz, ro‘za va boshqa ibodatlar Allohning bandalari ustidagi haqqidir. Ular dinning yarmi. Qolgan yarmi esa, boshqalar bilan qanday muomala qilishingdadir.
Hayotda ko‘rinmaydigan dindorlik ichi bo‘sh dindorlikdir.
Seni yumshoq, saxiy va birovga zarari tegmaydigan bo‘lishingni ta’minlamagan iymon nuqsonli iymondir.
To‘g‘ri, kishi agar kufrda vafot etsa bu axloqlar unga foyda bermaydi. Ammo xulqsiz iymon ham oqsoq iymondir.
Ushbu ibrat naqadar o‘rinli: «Dinning barchasi xulqdir. Kim sendan xulqda o‘zib ketgan bo‘lsa, demak dinda o‘zib ketibdi!».
O‘zbekiston dunyodagi eng tinch mamlakatlar reytingida 37-o‘rinni egalladi
Mamlakatimizning xalqaro maydondagi ijobiy imiji yana bir muhim reytingda o‘z tasdig‘ini topdi.
Iqtisodiyot va tinchlik instituti (Institute for Economics & Peace — IEP) tomonidan e’lon qilingan «Global Peace Index 2026» reytingida O‘zbekiston 163 davlat orasida 37-o‘rinni egalladi. Mamlakatning umumiy ko‘rsatkichi 1,726 ballni tashkil etdi, xabar bermoqda O‘zA.
E’tiborlisi, O‘zbekiston bir yil ichida reytingda sezilarli yuqorilagan. 2025 yilda mamlakat 67-o‘rinda qayd etilgan bo‘lsa, 2026 yilda 37-pog‘onaga ko‘tarildi. Bu bir yilda 30 pog‘ona yuqorilash degani.
O‘zbekiston nafaqat global reytingda yuqori o‘rinni egalladi, balki Markaziy Osiyo davlatlari orasida ham birinchi bo‘ldi. Reytingda Qozog‘iston 44-o‘rinni, Tojikiston 47-o‘rinni, Qirg‘iziston 61-o‘rinni, Turkmaniston esa 66-o‘rinni egallagan.
Shu tariqa, O‘zbekiston mintaqada tinchlik va barqarorlik darajasi bo‘yicha qo‘shni davlatlar orasida eng yuqori ko‘rsatkichni qayd etdi.
O‘zbekistonning “Global Peace Index 2026” reytingida 37-o‘rinni egallashi mamlakatning xalqaro turistik imiji uchun ham muhim ijobiy ko‘rsatkich hisoblanadi.
Samarqand va Buxoroning tarixiy merosi, Xivaning betakror muhiti, Toshkentning zamonaviy qiyofasi sayyohlarni jalb qilsa, mamlakatdagi tinchlik va xavfsizlik ularning O‘zbekistonni sayohat manzili sifatida tanlashini yanada rag‘batlantirishi mumkin.
67-o‘rindan 37-o‘ringa ko‘tarilish esa O‘zbekistonning xalqaro miqyosda tinch, xavfsiz va barqaror mamlakat sifatidagi imiji mustahkamlanayotganini ko‘rsatuvchi muhim natijalardan biri.
O‘zbekiston musulmonlari idorasi Matbuot xizmati
