Ko‘zi ojiz kishining tahorati
Cavol: Do‘stimning ko‘zi ojiz. Unga ayoli tahorat qildirib qo‘yadi. Do‘stim ba’zida ayniqsa, sahar vaqtida ayolimni bezovta qilib uyg‘otgim kelmaydi. Uni uyg‘otmasdan tayammum qilib olsam, bo‘ladimi, deb so‘radi. Shunday qilsa bo‘ladimi?
Javob: Bismillahir Rohmanir Rohiym. Tayammum qilish uchun bir qancha shartlar bilan ruxsat beriladi. Shulardan biri tahorat qilishga yordam beradigan shaxs bo‘lmasa, tayammum qilishi mumkin. Agar ayoli kabi tahorat qilishga yordam beradigan shaxs bo‘lsa, tayammum qila olmaydi, balki tahorat oladi. Do‘stingiz ham uyalmasdan ayolini uyg‘otsin va ayoli tahorat qildirishga yordamlashsin. Bu uchun ayoli ko‘plab ajru savoblarga ega bo‘ladi. Qolaversa, qiblani aniqlab berish, namoz o‘qish uchun pok joy topib berish ham kerak. Bu haqda fiqhiy manbalarda ham javob berilgan. Jumladan, “Fatovoi Olamgiriya” kitobida bunday deyilgan:
أوكان لا يجد من يوضئه ولا يقدر بنفسه فإن وجد خادما أو ما يستأجر به أجيرا أو عنده من لو استعان به أعانه فعلى ظاهر المذهب أنه لا يتيمم؛ لأنه قادر. كذا في فتح القدير
“Tahorat qildirib qo‘yadigan kishi topa olmagan va o‘zi ham tahorat qilishga qodir bo‘lmagan kishi tayammum qilsa bo‘ladi. Agar biror xizmatchi yoki ishchi yollasa yoki yonida yordam so‘rasa, yordam beradigan odami bo‘lsa, mazhabdagi zohir gapga ko‘ra bunday kishi tayammmum qilmaydi. Chunki u tahorat qilishga qodir hisoblanadi. “Fathul qadir”da shunday kelgan”. Vallohu a’lam.
O‘zbekiston musulmonlari idorasi
Fatvo markazi.
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »