150 ta oilaga moddiy va ma’naviy ko‘mak berildi (Fotolavha)
Toshkent shahar imom-xatiblari ishtirokida sayyor yig‘ilishlar, ma’rifiy tadbirlar, hojilar bilan birgalikda ma’naviyat targ‘iboti ishlari faol olib borilmoqda.
Shu yil 7 oktyabr kuni poytaxtimizning Shayxontohur tumanidagi “Shayx Zayniddin” jome masjidida imom-xatiblar yig‘ilishi bo‘lib o‘tdi. Unda O‘zbekiston musulmonlari idorasi raisi o‘rinbosari Zayniddin domla Eshonqulov faoliyatni yanada rivojlantirish bo‘yicha tavsiyalar berish borasida amalga oshiriladigan amaliy ishlarni tushuntirdi.
Shundan so‘ng ishchi guruh a’zolari, imom-xatiblar, otinoyilar, faol hojilar birgalikda mahallalardagi ehtiyojmand, notinch xonadonlarga kirilib, ularning muammolari o‘rganilib, taklif, fikr-mulohazalari tinglandi. Natijada kun davomida 150 ta oilaga kirilib, ma’naviy-ma’rifiy targ‘ibot va amaliy yordam tadbirlarini olib bordi.
Xususan, notinch bo‘lib turgan 20 ta oilaga nasihat qilinib, arazlashganlarni yarashtirish choralari ko‘rildi. Shuningdek, 50 ga yaqin yot g‘oyalar va giyohvand moddalar ta’siriga tushib qolgan kishilar bilan suhbatlashilib, ularga to‘g‘ri yo‘l ko‘rsatildi. Bundan tashqari, nogironligi bo‘lgan va bemor kishilar, kam ta’minlangan oilalar holidan xabar olinib, yaxshi so‘zlar bilan ularning ko‘ngli ko‘tarilib, dori darmon, oziq-ovqat, kiyim-kechaklar ulashildi, moddiy yordamlar ko‘rsatildi.
Mazkur xayrli ishlar poytaxtimizning boshqa tumanlarida ham davom etmoqda.
O‘zbekiston musulmonlari idorasi
Matbuot xizmati
“Arab Tourist”: Samarqand, Buxoro va Xiva — islom sivilizatsiyasi va jahon madaniy merosining bebaho durdonalari
Saudiya Arabistonining turizm va sayohatlarga ixtisoslashgan “Arab Tourist” elektron nashrida “Markaziy Osiyoning qoq markazida joylashgan va Buyuk ipak yo‘li bilan bog‘langan mamlakat” sarlavhali tahliliy maqola e’lon qilindi, deb xabar bermoqda “Dunyo” AA.
Maqolada Buyuk ipak yo‘li tarixida o‘zbek shaharlarining tutgan o‘rni alohida e’tirof etiladi. Xususan, Samarqand, Buxoro va Xiva kabi tarixiy shaharlar asrlar davomida Sharq va G‘arb o‘rtasidagi savdo, fan va madaniyat markazlari sifatida xizmat qilgani ta’kidlanadi. Registon maydoni, Ichan-qal’a va Buxorodagi me’moriy obidalar islom sivilizatsiyasi hamda jahon madaniy merosining bebaho durdonalari sifatida tilga olinadi.
Bundan tashqari, nashr O‘zbekistonning rang-barang tabiati va geografik relefiga to‘xtalib o‘tgan. Qizilqum cho‘li, serhosil Farg‘ona vodiysi, Tyan-Shan va Pomir-Oloy tog‘ tizmalari aholi joylashuvi va qishloq xo‘jaligi rivojida muhim o‘rin tutishi qayd etiladi.
Nashr, shuningdek, Buyuk Mirzo Ulug‘bek kabi donishmandlarning astronomiya va matematika sohasidagi buyuk kashfiyotlarini alohida e’tirof etgan.
Xulosada ta’kidlanganidek, Toshkent, Samarqand, Buxoro, Namangan va Andijon kabi shaharlar bugungi kunda nafaqat ma’muriy va iqtisodiy, balki jadal rivojlanayotgan yirik madaniy-turistik markazlar sifatida dunyo sayyohlari e’tiborini o‘ziga jalb etmoqda.
O‘zbekiston musulmonlari idorasi Matbuot xizmati