Olis hududdagi imomlar Diniy idora faoliyati bilan tanishdi (Foto+)
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari tashabbusi bilan respublikamizning olis hududlarida faoliyat yuritayotgan 50 nafarga yaqin imom-xatib va imom noiblarining poytaxtimizga safari tashkil etildi. Unda ishtirokchilar Diniy idora faoliyati bilan yaqindan tanishib, “Hazrati Imom” majmuasi ziyoratida bo‘ldilar.
Dastlab imomlar Qaffol Shoshiy maqbarasini ziyorat qilib, bu yerda qo‘nim topgan ulamolar hayoti va faoliyati to‘g‘risida ma’lumotga ega bo‘lishdi. Shuningdek, majmuadagi Mo‘yi muborak madrasasida joylashgan Hazrati Usmon mus'hafi ziyorat qilindi, O‘zbekistondagi Islom sivilizatsiyasi markazi binosi ko‘zdan kechirildi.
Kun davomida imomlar Diniy idora bo‘limlarining ish jarayonini ko‘zdan kechirdilar. Ularga mas’ul vakillar har bir bo‘limning asosiy maqsad va vazifalari, qilayotgan ishlari, erishgan yutuq va muvaffaqiyatlari, shuningdek, kelgusi rejalari to‘g‘risida atroflicha so‘zlab berdi. Xususan, imomlar muslim.uz portalining yangi zamonaviy studiyasini ko‘zdan kechirib, bu yerda matnli, audio va video materiallar tayyorlanishi haqida kerakli ma’lumotlarni olishdi. Shu bilan birga, Fatvo markazi va “Shamsudinxon Boboxonov” nashriyot matbaa ijodiy uyi faoliyatlari, Toshkent islom instituti o‘quv jarayoni bilan ham yaqindan tanishildi.
Ziyorat va tanishuvlardan so‘ng O‘zbekiston musulmonlari idorasi raisi o‘rinbosari Zayniddin domla Eshonqulov, Diniy idora bo‘lim mudirlari Shayx Alijon qori Haydarov va Muzaffar Kamolovlar imomlar bilan uchrashuv o‘tkazdi.
Samimiy muloqotda mutasaddilar imomlarni tashrif bilan qutlab, yurtimizda diniy sohada bo‘layotgan o‘zgarishlar, Diniy idora tomonidan amalga oshirilayotgan ishlar to‘g‘risida ma’lumot berish barobarida har bir imom mas’uliyatli va sharafli vazifasini bekami ko‘st ado etishi, peshvolik maqomiga munosib bo‘lib, har jihatdan xalqimizga o‘rnak bo‘lish lozimgini alohida ta’kidlashdi.
Tadbir so‘ngida mazkur imomlarga esdalik sovg‘alari topshirilib, ularning haqqiga xayrli duolar qilindi.
O‘zbekiston musulmonlari idorasi
Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
