Alloh jonimni namozda olsin
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Yo‘qotish
U oxirgi paytda jizzaki, jahldor, sabrsiz bo‘lib qoldi. Oldingi xushmuomalaligidan asar ham qolmagan. Ayoliga ham qattiq gapiryapti. Ishxonadagilar bilan ko‘p tortishadigan bo‘lib qoldi. Ko‘chadagi tirbandliklarda ham avvalgi xotirjamlik yo‘q. Eng yomoni, namoz o‘qishga ham erinchoqlik paydo bo‘la boshladi. Sababini chuqurroq mulohaza qilib ko‘rsa – tasbehini yo‘qotib qo‘ygan ekan...
Operatsiya
– Do‘xtir, o‘g‘lim yaxshi bo‘lib ketarmikan?
– Operatsiyadan keyin aniq bo‘ladi.
– Iltimos, do‘xtir, bir ilojini qiling. Bu yorug‘ dunyoda o‘g‘limdan boshqa hech kimim yo‘q.
– Qo‘ldan kelgancha harakat qilamiz.
Oliygohni superkontrakt bilan bitirgan shifokor shunday dedi-yu, operatsiyaga kirib ketdi.
Noma
Javondagi qutidan arzimagan pulnigina topa olgan o‘g‘ri uydan chiqib ketayotib, stol ustidagi bir varaq qog‘ozga ko‘zi tushib qoldi. Unda «Hozircha shu pulni amallab tur. Bir oyda qaytaman» deb yozilgan edi.
Tibbiy tekshiruv
Oltita qizdan keyin yana homilador bo‘lib qolgan ayol «Jinsi: qiz» deb yozilgan tahlil qog‘ozni eriga tutqazdi. O‘n yildan beri farzand ko‘rish orzusida yurgan hamshira qiz xonadan chiqib ketayotgan er-xotinni havas bilan kuzatib qoldi-yu, ko‘zini ro‘molchasi bilan artdi.
Ertasi kuni «Shoshilinch yordam» bo‘limida kechagi ayolni ko‘rib qoldi, kaltaklar zarbidan bechoraning bolasi tushib qolgan edi.
Xato
O‘g‘il halloslab kelib, onasining oyog‘iga yopishdi: «Endi hech qachon gap qaytarmayman, oyi! Oldingizda uf tortmayman! Ishdan kelganimda «Charchadim, oyi, oyog‘ingizni boshqa kuni uqalab qo‘ya qolay», demayman. Kech qolayotgan bo‘lsam ham, ertalab choyni siz bilan birga ichib ketaman. Xatoimni tushundim, oyi, meni kechiring!».
– Qani, baravar ko‘taramiz!
Janozaga kelganlar ayolning tobutini ko‘tarishdi.
So‘nggi roman
U yangi romaniga nima deb nom qo‘yishni bilmay, ancha vaqt bosh qotirdi. Nihoyat, kutilmaganda xayoliga kelgan nomni tanlab, birinchi sahifaning boshiga yozib qo‘ydi. Shu payt azon aytildi. Odatdagidek, masjidga chiqib, namozni jamoat bilan o‘qidi. Chap yelkasiga salom berdi-yu, gilam ustiga ohista yiqildi. «Alloh jonimni namozda olsin» nomli romanining chop qilinganini ko‘rish nasib qilmadi.
O‘zbekiston turistik kompaniyalari Ar-Riyozdagi xalqaro ko‘rgazmada ishtirok etdi
Saudiya Arabistoni poytaxtida “WTM Spotlight Riyadh 2026” xalqaro turistik ko‘rgazmasi bo‘lib o‘tdi. Unda O‘zbekiston turizm industriyasi vakillari ishtirok etdi, deb xabar bermoqda “Dunyo” AA.
Mamlakatimiz turistik salohiyatini «Asialuxe Travel», «Zamin DMC» va «Bazar Travel» kompaniyalari namoyish etdi. Ular ko‘rgazmaning ishbilarmonlik dasturida faol ishtirok etib, Saudiya Arabistoni hamda boshqa xorijiy davlatlar turizm sohasi vakillari bilan bir qator samarali uchrashuvlar o‘tkazdilar.
“WTM Spotlight Riyadh” Saudiya Arabistoni turizm bozorining xalqaro hamkorlar bilan o‘zaro aloqalari uchun asosiy professional maydonlardan biriga aylandi. Ko‘rgazma turoperatorlik biznesi, qabul qiluvchi kompaniyalar, mehmonxona sektori, aviatsiya tarmog‘i, turistik texnologiyalar va industriyaning boshqa yo‘nalishlari vakillarini birlashtirdi. Tadbirda mintaqaviy va xalqaro tashrif buyuruvchilar, 450 dan ortiq eksponentlar hamda 30 dan ortiq mamlakat vakillari qatnashdi.
Uch kun davomida o‘zbekistonlik kompaniyalar vakillari saudiyalik turoperatorlar, turistik agentliklar va bozorning boshqa ishtirokchilari bilan muzokaralar o‘tkazdilar. Muloqotlarda sheriklik dasturlarini rivojlantirish, Saudiya Arabistonidan O‘zbekistonga sayyohlar oqimini oshirish hamda yangi qo‘shma turistik mahsulotlarni shakllantirish imkoniyatlari muhokama qilindi.
O‘zbekistonni madaniy-ma’rifiy, oilaviy, premium va individual turizm uchun jozibador yo‘nalish sifatida targ‘ib qilishga alohida e’tibor qaratildi. Saudiyalik hamkorlarga Samarqand, Buxoro, Xiva, Toshkent va mamlakatimizning boshqa hududlarining turistik imkoniyatlari, Buyuk ipak yo‘lining tarixiy merosi, zamonaviy mehmonxona infratuzilmasi, milliy taomlar hamda individual va guruhli turistik dasturlarni tashkil etish imkoniyatlari namoyish etildi.
O‘zbekiston turizm tarmog‘i vakillari, shuningdek, saudiyalik hamkorlar bilan sayyohlarni kutib olishni tashkil etish, Ko‘rfaz mamlakatlaridan keluvchi sayohatchilarning afzalliklarini hisobga olgan holda ixtisoslashtirilgan yo‘nalishlarni ishlab chiqish hamda Saudiya Arabistoni bozorida O‘zbekistonning turistik salohiyatini yanada targ‘ib qilish masalalarini muhokama qildilar.
O‘zbek turistik kompaniyalarining “WTM Spotlight Riyadh 2026” ko‘rgazmasidagi ishtiroki podshohlik turistik biznesi vakillari bilan bevosita aloqalarni kengaytirish va hamkorlikning yangi yo‘nalishlarini izlash uchun qo‘shimcha imkoniyat bo‘ldi.
O‘zbekiston musulmonlari idorasi Matbuot xizmati
