Bismillahir Rohmanir Rohiym
1. Laa havla va laa quvvata illa billah – jannat eshiklaridan biri.
ألا أدلك على باب من أبواب الجنة قال: وما هو؟ قال: لا حول ولا قوة إلا بالله
Muoz ibn Jabal roziyallohu anhu aytadilar: "Rasululloh sollallohu alayhi vasallam: “Seni jannat eshiklaridan bir eshikka dalolat qilayinmi?” dedilar. Men: “U nima?” deb so‘radim. Nabiy alayhissalom: “Laa havla va laa quvvata illa billah”, dedilar" (Imom Tabaroniy rivoyati).
2. Laa havla va laa quvvata illa billah – jannat xazinalaridan biri.
قل: لا حول ولا قوة إلا بالله فإنها كنز من كنوز الجنة
Abu Hurayra roziyallohu anhu aytadilar: "Rasululloh sollallohu alayhi vasallam menga: “Laa havla va laa quvvata illa billah”ni aytgin. Albatta, u jannat xazinalaridan biridir", dedilar" (Imom Termiziy rivoyati).
3. Laa havla va laa quvvata illa billah – jannat ko‘chati.
Rasululloh sollallohu alayhi vasallam: “Jannat ko‘chatlarini ko‘paytiringlar”, dedilar. “Yo Allohning rasuli, uning ko‘chatlari nima?” deyishdi. U zot alayhissalom: “Laa havla va laa quvvata illa billah”, dedilar (Imom Tabaroniy rivoyati).
4. Laa havla va laa quvvata illa billah – 99 dardga shifo bo‘ladi.
مَنْ قَالَ لا حَوْلَ وَلا قُوَّةَ إِلاَّ بِاللهِ كَانَتْ دَوَاءٌ مِنْ تِسْعَةٍ وَتِسْعِينَ دَاءٍأَيْسَرُهَا الْهَمُّ
Rasululloh sollallohu alayhi vasallam: "Kim Laa havla va laa quvvata illa billah”ni aytsa, to‘qson to‘qqiz dardga davo bo‘ladi. Eng yengili g‘amdir", dedilar (Imom Tabaroniy, Imom Hokim rivoyati).
5. Laa havla va laa quvvata illa billah – faqirlikni daf qiladi.
Rasululloh sollallohu alayhi vasallam: "Kim har kuni yuz marta “Laa havla va laa quvvata illa billah”ni aytsa, unga faqirlik yetmas", dedilar (Ibn Abu Dunyo rivoyati).
6. Laa havla va laa quvvata illa billah – ne’matlarning bardavom bo‘lishiga sabab bo‘ladi.
Rasululloh sollallohu alayhi vasallam: "Kimga Alloh ne’mat bersa-yu, u bu ne’matning o‘zida davomiyligini istasa, “Laa havla va laa quvvata illa billah”ni ko‘p aytsin", deganlar (Imom Tabaroniy rivoyati).
7. Laa havla va laa quvvata illa billah – balo-musibatlardan xalos etadi.
Hazrat Ali roziyallohu anhu aytadilar: "Rasululloh sollallohu alayhi vasallam menga: "Ey Ali, senga qiyin ahvolga tushib qolganda aytiladigan kalimalarni o‘rgataymi?" dedilar. "Alloh meni sizga fido qilsin, o‘rgating, yo Rasululloh", dedim. Shunda Rasululloh sollallohu alayhi vasallam: "Qiyin ahvolga tushib qolsang, “Bismillahir rohmanir rohiym. Va laa havla va laa quvvata illaa billaahil ’aliyyil ’aziym”, deb ayt. Chunki mana shu duo bilan Alloh xohlaganicha har turli balolardan xalos qiladi», dedilar.
Molik Ashja’iyning o‘g‘li asirga tushib qolganda Rasululloh sollallohu alayhi vasallam unga odam yuborib “Laa havla va laa quvvata ilaa billah”ni ko‘p aytishni buyurganlar. Natijada o‘g‘li asirlikdan xalos bo‘lgan.
Rasululloh sollallohu alayhi vasallamning sahobalari o‘z tajribalarida “Laa havla va laa quvvata ilaa billah”ni aytish bilan mushkullari oson, balo-ofatlari daf bo‘lishini ko‘p sinab ko‘rganlar.
Olimlardan biri aytadilar: “Kimning g‘am-tashvish va musibatlari ko‘payib ketsa: “Laa havla va laa quvvata illa billah” kalimasini ko‘p aytsin”.
Davron NURMUHAMMAD
#xabar #muftiy #juma
Bugun, 18 iyul kuni O‘zbekiston musulmonlari idorasi raisi muftiy, Shayx Nuriddin Xoliqnazar hazratlari juma namozini Toshkent shahridagi "Yakkasaroy" jome masjidida ado qildilar.
Muftiy hazratlari jamoat namozidan oldin yig‘ilganlarga “O‘zganing haqqidan hazar qilaylik!” mavzusida manfaatli suhbat qilib berdilar.
Mav’izada bugungi kunda birovning molini noto‘g‘ri yo‘l bilan yeyish va o‘zganing xaqqiga xiyonat qilishdek og‘ir gunohlar, jumladan, qarzini qaytarmaslik, tarozidan urish, mualliflik huquqini poymol qilish, poraxo‘rlik, qimorbozlik, firibgarlik kabi illatlardan hazar qilish lozimligini qat’iy ta’kidladilar.
Shayx Nuriddin Xoliqnazar hazratlari Qur’oni karimdagi: “Ey, imon keltirganlar! Mol-mulklaringizni o‘rtada nohaq (yo‘llar) bilan yemangiz!...” (Niso surasi, 29) oyatini sharhlash asnosida Alloh taolo insoniyatni Yer yuzida halol rizq talab qilishga amr etgani, uning aksi bo‘lmish haromdan hazar qilishga buyurgani hamda halol va harom narsalarni ochiq bayon qilganini aytib o‘tdilar.
Suhbat yakunida Haq taolodan elu yurtimiz tinchlik-farovonligi va halol-pok molu davlat topish, nohaq-botil yo‘llar orqali keladigan mollardan asrashini so‘rab xayrli duolar qilindi.
O‘zbekiston musulmonlari idorasi
Matbuot xizmati